2 KORINTO 3

1Ham awkin gayfan hami bilang wagfadaholon ya hyami sadili? Hami awkin kito yadis iba taw kitay, fag ha sorat gis taw kagfatohoyan ngatay fiya hyami ogali mi nogsabang hayo, ngatay mi noglahaw gi hayo? 2Ham wa ngay ka bilang sorat kagfatohoyan kitay hyami ogali fiya. Ham bilang wansorat sa hyami fangayofan, fagayo kilala wan, hanggan bilang wagbasa. 3Ham wan Kiristo sorat kalag wa fiya fiya, ka hyami fagfalagon has taw, kawan Diyos boyagan it Falad ka fanorat sas fangayofan taw, bohonwa ka famahasding sas manga bato dalafi. 4Mi twag fwayong kitonya kawa mi nogsyag in Diyos gin Kiristo. 5No hyami di sadili, midwa ha fagsyaganon, hyami fagsyaganon fagayo in Diyos wa disag. 6In Diyos kafangayofanan kitay, hami fag tomanggap fagsyaganon kaarakitay imbalit manga fangibolon sat taranggapan bago. To fag taranggapan bohonwa sas togon masoratan it nakatabowanan, dapat sas fangayofan bago. Maskin ka togon masoratan igfatohoyan has kahatayan, dapat in Diyos Falad igdisag haboyagan. 7Hyabi hyabi, is Diyos no nafatohoyan it manga togon kantigib sas bato dalafi, manga togon kagfatohoyan has kahatayan ka mangag sway, in Diyos kasinayan inlag wan, inlafit yadi han Mwisis walong, yakanga araw in Israil manga hasokfonan idyadi wagsompong in Mwisis walong, nyawa kitay kasagaya wan Diyos kasinayan sinya. Ka gibolon taranggapan kan-ganit sas togon sorat kagfatohoyan has kahatayan, no ha hoyog masinay, 8idwa awkin labi man inya in Diyos kasinayan it Falad nondisag hantam, ham gayfan? 9Ka taranggapan kagfatohoyan has fadosaan, no ha hoyog masinay, labi man inyak masinay ka togonan kagfatohoyan kitay, tam nangafiyan han Diyos. 10Kawa kitonya, tam iglwang wa ongay, ka gona fag kasinayan insagaya wan, kawa labi man inyak masinay ka natobos ka gona. 11Ka taranggapan kansagaya no ha kasinayan hyabi, labi man inyak fiya ka kasinayan sas taranggapan kadwa ha katabowanan. 12Kawa tam ha fagsyagon kitonya, tam idwa ha fakadalaon. 13Tam idwa kiton Mwisis ka nataklob it mata kaarakitay manga taga Israil idwa lomag kitay tonya fag kasinayan kasagaya di. 14Dapat ka manga taga Israil in-ganit it manga fangayofan hanggan wa kati, maskin tonya fag taklob mata idyan bol gista manga fangayofan ta nogbasa ka Batasan Hodyo. San Kiristo lamang tonya fag taklob fangayofan nombol. 15Anod, hanggan wa kati, nyawa ginahin ta nogbasa yapdin Mwisis manga togon, ha taklob yapdi sat basad fangayofan. 16Dapat ay, kito yadi kansorat kawa han Mwisis, hanya nogsayango han Diyos, imbol wa ka taklob. 17Intam faggwason istay kagfon intam, kawan Diyos Falad. Hanggan no siday in Diyos Falad nogbanwanan, sinya ka manga taw mafalfasan. 18Kati ka taklob santam manga walong inbol wan. Tam fagayo kabali silaw gin Diyos kasinayan, kagfabago intam fangayofan kaarakitay labi man inyak masinay hanggan wa tam imbali kito yadi hanyak fiya. Intam Fon, ka Maliyaw fag Falad, kagfadagos tonya fag ibolon santam.

will be added

X\