2 KORINTO 2

1Yakanga angko fangayofan hodya lomahaw has nyamo hayo hyabi, kaarakitay hodwag farongkot domwag hayo. 2Maskin aho nogfarongkot hayo, fakta ara ka falibang angko, ham gayfan? Idwa akwa, aho no sadi ya ginan igfarongkot hayo. 3Yakanga ho nasorat tonya fag sorat ha hayo, kaarakitay aho nombangkad ya aban has nyamo hayo, ham idwag farongkot angko, maskin ham ka fiya nangos angko fagbayaon. Aho twa kitay aho nogbaya, ham igbaya yadi wan. 4Aho nogsorat ha hayo itfagonan, angko fangayofan inhori wa dahol dahol, angko lowa igtariktihan wan, baliday aho nogsorat yapdi ha hayo. Bohonwa kitay ho kasayag farongkot hayo, dapat ho kasayag fatwagdog hayo kitay, ho galwasi wa dahol dahol hayo. 5Hanya no ha nafahoriyan manga iba taw, bohonwa aho kat nafahoriyan. Ham ganong wa fagayo fagayo kanhori, dapat idwa fiya aho nogfalabiyon angko hampang. 6Dapat aywan sa hayo nangabaya hanya, hayo habaya hosto wa a, fiya wan. 7Kati ham faliyaman wan it naogali dwat. Ham fag fasaya yagdog hanya, kaarakitay idwa dagos imlombay. 8Kati ahog faaronganon ha hayo kitay ham fag falag hanya fiya, ham ogali mandi mahoway ha hanya. 9Maskin ngay ho nasorat ha hayo, ho kasaya tomwa ngatay ham katanog fiya fiya angko manga togon fagayo ha hayo. 10Nyawa faktaw ham nogfaliyam it naogali dwat, ahog faangay yadi. Aho nangos nogfaliyam ista naogali dwat, kawa ha hayo fakinabang aho nogfaliyam tonya, bilang san Kiristo faglagan. 11Fiya no kitonya kaarakitay is Satanas idwag daog intam. Tam fadi wad twa it fakasayaon. 12Aho no hawas banwa Toroas kaarakitay manoltol ka Fiya fag Barita kawa han Kiristo, kagfon intam, ista manga fangayofan danwa nafatalaga. Aywan kagtalinga fagaba. 13Dapat angko fangayofan idwa kahoway kawa ahodwa nalag intam fadwasay is Tito. Idwa ha natagbo angko. Yakanga aho natogon di ngay, ho nadagos wa has sakop Masidonya. 14Dapat ay, tam igbaya in Diyos. Is Kiristo fagabag daog it manga kalaban, bilang waglahaw sasta fagonan ayo ayo, ta nogbaya hanya. Is Diyos fagabag faofod intam han Kiristo, tam kansadi ha hanya, ta nogbaya hanya kitonya. 15Giwantam is Diyos nogfahaskat ka Fiya fag Barita kawa han Kiristo, ka bilang wa banglo wa dahol dahol, ka mangan bawi gayok banglo, hanggan ka mangadwan bawi gayok yadi. 16No kadi has manga taw ka hawas fadosaan, bilang baw kagfatohod has kahatayan baliwa, dapat no has mangan bawi, to sadik banglo igfatohod has haboyagan. Fakta ka syagan igfaanod kitonya fag ibolonon, ham gayfan? 17Hamidwa kito ka tiba ka bilang odi famalidya in Diyos hampang. Yatokitay, sonson wa maanod hyami hampang maskin gin Diyos hyami fwayong, hanggan hami nogtoltol has taw, san Diyos yadi faglagan, kawa hami insadi san Kiristo.

will be added

X\