2 KORINTO 13

1Kati aban it fatolo wa ginan aho no manabang has nyamo hayo. Ka Kasoratan iglwang, Nyawa kana fag sombong, ngatay fag dowa, ngatay tolo ka nalag. 2Kati aho nostay yapdis ayayo, ho golit kangko nafwayong it fadowa fag swali, aho no gis nyamo hayo. Kangko nafwayong has manga gogali dwat, hanggan has fagayo, ho mangabaya hayo fiya fiya, ho fawag fahowayon aban. 3Ho mangabaya hayo kitonya kaarakitay ham tomwa kitay, is Kiristo ka kabaya hayo, nyawa angko odi bibig kagfwayong. Is Kiristo idwa magomo ha hayo baliwa. Yatokitay hanyag falag wa ngap it karigonan ha hayo. 4Hanya nyawa magomo hyabi, ta no nafapako hanya sas nafatimbangan hayo, kati boyagan wan gin Diyos karigonan. Kawa ahonsadi han Kiristo kahoriyan, aho magomo yadi, dapat kati, aho boyagan yadi gin Diyos karigonan kiton Kiristo, kaarakitay mamaadal hayo. 5Ham fag gisip fiya fiya hayo sadili, ngatay hayo manga ogali maangay has mangam tiwala, ngatay idwan. Ham awkin idyag dog sa hayo sadili kitay, is Kiristo Hisos sawa hayo, no bohonwa kitay ham kat nadayo. 6Hogsyag kitay ham tomwa wa kitay, aho bonwat-nadayo. 7Hogdarangin han Diyos kitay, ham nangos fag idwa gogali has dwat. Bohonwa kitay maskin aho kasaya fag imlag kitay hodwa nadaogan, dapat kaarakitay ham omogali has fiya, nyawa halimbawa, no kadog di, ho bilang wa nadaogan. 8Maskin idwa fiya aho noglaban ka fakaoronganan no bohonwa kitay hogfaanod odi. 9Ham nangos fag karigon, ginya madi, nyawa angko habilogan kagomo, ho kasolong yapdi. Yakanga hogdarangin yadi kitay hayo manga ogali fag nangos imhosto wa fiya fiya. 10No baliday aho nodyapdis nyamo, hogsorat ha hayo to fag manga bagay, kaarakitay aho nomdasog is nyamo hayo, aho fawa ha fakampangon mahori ha hayo gintam Fon nadisag hangko karigonan. Is Diyos nadisag hangko to fag karigonan kaarakitay manogbong hayo, bohonwa hasagfadwat baliwa. 11Angko manga fadwasay, hogtogon ha hayo. Balistay lamang angko sorat kati. No baliday hayo fagsyaganon, ham fag mahogod, kaarakitay hayo manga ogali imbali hosto. Ham fag katanog angko manga togon ha hayo. Ham fag kasadi, fag mahoway yadi ha sadi ha sadi. No kitonya, is Diyos, ka mahoway hanggan galwasi hayo, sawa hayo. 12Tam fag badbayaan ha sadi ha sadi tam nogladlagan. Intam manga fadwasay fagayo sas manga Tifonan gwas yadi hayo. 13Ham nangos fag domog kitay, is Kiristo Hisos, kagfon intam, mahoway ha hayo, is Diyos galwasi hayo, hanggan ka Maliyaw fag Falad kasadi ha hayo fagayo fagayo.

will be added

X\