2 KORINTO 1

1Mi da Timotiyo, intam fadwasay, kagsorat ha hayo, in Diyos Tifonan sas banwa Korinto, kalafit yadi has fagayo kantohoyan han Diyos sas sakop Akaya. Ahos Pablo in Kiristo Hisos Fandiya-Barita kawan Diyos wa kafangayofanan fag kitonya. 2Ham nangos fag domog kitay is Diyos, intam Ama, hanggan is Kiristo Hisos, intam Fon, mahoway ha hayo fagaba, hanggan igfalokmay yadi hayo manga fangayofan. 3Tam fag fasayagdog in Diyos, in Kiristo Hisos intam Fon it Ama, kantam yadi Ama maawaon, kawas Diyos ka fagabag farigon intam manga fangayofan. 4Tam no ha lagan manga mahori, hanyag farigon intam manga fangayofan, kaarakitay tam man ka syagan igfarigon iba taw, ta no ha mahori, gi wantam nadalanan is Diyos no nafarigon intam. 5No kinday mi fagabag dog mahori, kawa minsadi san Kiristo, kitonya yadi, is Kiristo fagabag farigon hyami. 6Mi no galabawan, mi galabawan ongay kaarakitay ham imrigon gis basad mahori, hanggan imbawi yadi. Hami nomrigon ya, nalafit yadi ha hayo, ham imrigon yadi wan, is Diyos nogfarigon hayo, kaarakitay ham omagwanta hayo manga donggon fakahoriyon, kito yadi hyami. 7Maskin ngay migsyag marigon ha hayo, maskin mi twa yadi kitay, ham no ha horay sas mahori, kito yadi hyami, is Diyos mamarigon hayo, kito yadis Diyos nogfarigon hyami. 8Angko manga fadwasay, migfadog ha hayo hyami nadalanan mahori sas sakop Asya. Yabay, hyami nadalanan sinya orongan wa mahori wa dahol dahol. Mi gayfan mi fawam tolas. 9Mi gayfan wa kitay gis nanya mintohoyan has kahatayan. Inbali kitonya kaarakitay midwag syag hyami sadili karigonan, dapat migsyag han Diyos kagfaboyag ya gis kahatayan ka manga natay. 10No kadog di gis nanya, is Diyos nabawi hyami gis kahatayan, hanggan kati igfadagos yapdig bawi hyami. Hanya wa hyami fagsyagon fagaba ka bomawi yapdi hyami aban, 11kawa ham igtogbong yadi hyami, ham nogdarangin. Ginya madi aywan ka bomaya han Diyos kawat malooy fag kahowayan ha hyami. 12Miglwang kitonya kawa hyami fagbayaon sa hyami sadili fangayofan, mi twa kitay fiya hyami naogali has fagayo fag manga taw, hanggan labi wa ha hayo, idwa yadi ha fagfyalomon maskin hyami ogali giwan Diyos, gin Diyos malooy fag kahowayan, idwa gis kadonongan taw. 13To fag manga hampang ka hayo fagbasaon kati, ham twa wagdog, hanggan idwa ha kahologan matagowan. Balis kati ham natwa wagdog bangan hyami ogali, dapat angko fakasayaon kitay, 14aban, ka Sirang ka mahalga han Hisos, kagfon intam, nomdasog, ham homilala fiya fiya hyami, ginya madi tam pariho igbadbayaan ha sadi ha sadi sasta fagdogan. 15Kawa hogsyag kitonya, ho naayfan ho has nyamo yapdi hayo kaarakitay ham bomaya waglag hyami dowa ginan. 16Ho naayfan ho domalan yap has nyamo, ho bago has sakop Masidonya, ginya ho domalan ya domwag no goli, ginya ham nangos tomogbong yadingko ho no kalahaw has Hodiya. 17Kati aho nodwa nafatonglos kitonya, ham awkin lomwang ahog faoman fagaba angko fwayong? Angko fangayofan awkin goman goman, kito kastay is baba daga fag manga taw ka katig lwang, ala, dapat ay, araw araw, lomwang idwan? 18No kinday is Diyos idwag balibad, hyami hampang ha hayo idwa yadig balibad. Mi noglwang kati ala, midwa ara lomwang idwan. 19Ka hyami da Silbano da Timotiyo fagbaritaon, kan Diyos Anak, is Kiristo Hisos, bohonwa kitay ala, hanggan idwan. Is Hisos in Diyos wa ala fagaba. 20Maskin kawa hanya kagfatonglos in Diyos natogon bato disagon fagayo. Kawa gin Hisos tam syagan igsagot, Anod, fag kitonya wa ngay, nogfasayagdog han Diyos. 21Is Diyos kagfarigon hyami hanggan hayo san Kiristo. Hanya yadi ka nafili hyami hastay fag ibolon. 22Is Diyos ka nafwalid it tandaan sa hyami basad fangayofan, nadisag yadit Maliyaw fag Falad ha hyami, kwinta wagfatohoyan kitay hanya fatonglos it manga togon bato disagon tiba. 23Is Diyos ka twag lag angko fangayofan kitay ahodyapdin bangkad gis nyamo hayo hyabi, maskin hodwa kasayag fahoriyan hayo. 24Bohonwa kitay mi kasaya yapdi fag hami ka hayo fakatanogon ham no katiwala in Diyos, maskin ham marigon nogsyag in Diyos is nyamo hayo. Mi kasaya odig togbong, kaarakitay ham masolong no gogali ka maangay han Kiristo.

will be added

X\