1 TIMOTIYO 6

1Kasta manga nasali sogowan, kagfasakop hat manga fagoliyanan, fag magalang yadi hanya, kaarakitay tadwa ha lwangon hanya, idwa yadig fadwat igdog in Diyos hanggan intam fagfaadalon. 2Kasta fagoliyanan nomtiwala, it manga nasali sogowan fag idwa gayfan kitay, Mi pariho wa fadwasay santam Fon, nyawa hodwa bangan gibolon. Fag idwa yadig sway it fagoliyanan. Yatokitay, fag kabagat wa kabali fiya no gibolon, maskin ista fagtogbongon intam fagalwasiyon kagsyag yadin Kiristo. 3nyawa faktaw nogfaadal, nodwa kito kangko fwayong istay, nodwa yadi kiton Kiristo Hisos, kagfon intam togon orongan, hanggan nodwa has manga adal has kabali fiya intam ogali, 4hanyag fataka odig dog, idwa ngap ha fakatwawon. It fangayofan bilang wa ha sagit. Igfabarohagan yaglabanan ya has hampang, igbangkad odi kaid-ingliyan, gidgisogan, igfadwat igdog is taw, igfatodtogaan wan. 5Ka kasayag daraogan has manga taw kitonya, idwa maslong it isip, tadwa twa ka fakaoronganan. Kasta fangayofan, ta fag kabali maakwa maskin igsimba. 6Ka orongan, dahol ka fakinabang tam nogsimba, nogfasakop orongan in Diyos, hanggan igbaya no daho da kantam lagan. 7Kawa hyabi, tam no bago sagaya, tam idwa ha diya diya, nyawa kana istay is baba daga, hanggan tam aba no malin gistay, tam fawa ha diya diya mandi. 8Yakanga tam fag baya wan tam no ha hanon hanggan rotay. 9Ka kasaya kabali maakwa wa dahol dahol lomag tokso, kawa aywan fag fakasayaon dwat kadwa ha kahologan giktan hanya, hanggan goyod hanya has kadwatan. 10Maskin ka gwas fagaba has kwarta ha bilang wa dalid sat basad fangayofan, kagfatobo fagayo fag dwat fag ogali. Tiba taw kawa gwas wa gwas wan kitay, it kwarta fag aywan nangos, in-ayayo git fakatiwalaon. Ginya madi, no dogay, bago di nadog it kahoriyan, it fangayofan bilang wa hagtobok hanya. 11Dapat haw, haw in Diyos fangibolon, fag baybay tonya fag manga bagay fagayo. Im fangayofan fag matoonan has fiya fag ogali, ka maslong. Fag imtohoyan han Diyos, matanogon, galwasi has tiba taw, idwag fagomon, hanggan mahoway. 12No baliday im fagsyaganon, fag mahogod kitosag dalandan maskin ha tanggapon, ka haboyagan kadwa ha katabowanan, kawa nogsyag in Diyos.Is Diyos nafatawag hyamo hastay fag ibolon hyabi, haw no nafaorongan hanya sas basad fakaaywanan fag manga taw ka nadog hyamo. 13San Diyos faglagan, kagfaboyag fagayo fag manga bagay, hanggan san Kiristo Hisos faglagan, ka nafaorongan it fagsyagon no san Ponsiyo Pilato fagdogan, hogtogon hyamo kitay, 14is Kiristo Hisos kagfon intam nodyan dasog, haw fag fadagos angko manga togon to ha hyamo. Fag fatonglos fiya fiya hanggan fag idwag fasigpala. 15Nomdasog gis nanya fag masohod, is Diyos mamalag ya in Kiristo Hisos. Is Diyos ka kafiyaon, sadi di kaghari, it kangayanan abwat man has fagayo fag manga gorangon. Hanya sadi di kagfon has fagayo fag manga fon. 16Hanya lamang kadwa katay, igbanwanan sas basad yawa, idwa ha taw somompong hanya. Idwa ha nalag hanya hyabi, idwa yadi ha syagan lomag hanya kati. Tam fag fadaholon hanya, fag faanod yadi kitay it karigonan idwa ha katabowanan. Fag kitonya wa ngay. 17Fag fatagak has manga maakwa istay is baba daga kitay, ta fag idwag faabwaton it sadili. Ta fag idwa yadig syag has kaakwaan ka ha kahaminan di, dapat ta fag syag han Diyos ka madisagon, kagdisag hantam fagayo fag manga bagay kaarakitay tam bomaya wan. 18Fag fwayong has manga maakwa kitay, ta fag gibolon has fiya fag kabali yadi maakwa sas fiya fag ogali. Ta fag idwa mahwangiton, fag matogbongon hat kapariho. 19No kitonya, ta tomifon yadi kaakwaan has aban kagfatohoyan kitay ta tomanggap yadi ka orongan fag haboyagan. 20Timotiyo, haw fagano fiya fiya ka nafaano ha hyamo. Fag idwa gwas ka manga toltol kadwa fiya kadog han Diyos, hanggan ka manga katadlongan ka tiba taw noglwang gin Diyos kadonongan, dapat ay, idwa ngap gi hanya. 21Ka mangag lwang kitay ta ha kadonongan kitonya, natalang di ngap gintam fakatiwalaon. Haw nangos fag domog kitay is Diyos mahoway ha hyamo.

will be added

X\