1 TIMOTIYO 5

1Haw fag idwa kampang dwat donggon has manga ama ka magorang man hyamo haw no kabaya, haw fag kampang odi mayan mayan hanya, fag bilang wam ama. Ka manga anahan fag bilang wam fadwasay. 2Ka manga ina ka magorang man hyamo, fag bilang wam ina. Fag fiya yadim ogali has manga dayaga, fag bilang wam manga fadwasay ina. 3Fag idwa gaway ka manga ina balo kadwa ha fagsyagon iba taw. Yatokitay, fag togbong wan. 4Ka maangay hantam kamtiwala, ka ina balo no ha anak, ngatay ha manga fofo, fag tonya ka omanot magorang, bilang wat nafasalamatan hat ina, maskin naanot manga anak hyabi. Is Diyos igbaya wan no kitonya. 5Ka orongan wa ina balo fiya fiya, sadi odi sat balay, idwa ha ofod ofod, hanggan is Diyos lamang it fagsyagon. Yakanga hanya fagabag darangin, igsagad togbong gin Diyos, yabi sirang. 6Dapat ay, ka ina balo no lamang lamang it ogali, bilang wa natay it fangayofan, nyawa boyagan yapdit habilogan. 7Ha fag fadog has manga ina balo to fag manga togon, kaarakitay iba taw idwa ha fabangdanan ha hanya. 8Nyawa faktaw nodwa ganot manga kaiban, labi man it manga sadili talanahan, nadayo wat fakatiwalaon, bohondi kito ka mangadwan tiwala fag dwat it ogali. 9Ka kito fag manga ina balo lamang ka fagfaaktomon hantam bato togbongon. Fag ka mandi manga ina balo kaglabi onom ik safolok fangaraw it kadogayan, kantam fagtogbongon. Fag kawat indogan sadi odi hyabi. 10Fagayo iglwang fiyat ogali. Nafadahol wa fiya fiyat manga anak. No marigon yapdi hyabi, mafasakbawon manga famaklay, matogbongon hyabi has manga taw kantohoyan han Diyos, hanggan has manga ha fakahoriyon, intohoyan has fiya fag ibolon. 11Haw fag idwag faaktom santam bato togbongon ka manga ina balo kadya magorang. Ngandayo idwa omagwanta idwa omindogan, ginya madi ngandayo fabayaan in Kiristo ibolon. 12Ginyadwa faanod it togonan in Kiristo ibolon. 13Imyayom wa kafang, kalibang odi gombalay gombalay. Ginya madi bondi tonya ka dwat, imbali mafadahiton, mamawaton is taw, idwa fiya it manga hampang. 14Yakanga, no sa dingko, tam faindogan ya domwag, ngandayo omanak yapdi, yakanga omano yadit talanahan manga botang kaarakitay intam manga kalaban idwa ha faglwangon kitay idwa fiya intam ogali. 15Maskin hoglwang kitonya, tiba balo indiya han Satanas fag ogali. 16Ka fiya ka manga ina kamtiwala fag ganot manga kaiban ina ka balo, fag bohon yap ka Tifonan kagtogbong, kaarakitay ka manga Tifonan tomogbong kawadwa ha manga kaiban, idwa ha fagsyagon iba taw. 17Ham fag dogang ya domwag hayo disagon has manga fagtahinan ka gano fiya ka Tifonan, labi wa ka manga mahogod igtoltol hanggan igfaadal in Diyos hampang. 18In Diyos sorat iglwang, Ha fag idwag fasolong bangkas ka oyong baka no balidag lid yapdi tirigo. Insorat yadi, Maangay ka gibolon no ha tangdan yadi. 19Haw fag idwag talinga ta nogsombong ka sadik fagtahinan naibolon, nodya manga dowak taw, ngatay tolo ka nalag. 20Fag sawasta fagdogan fagayo, haw no kabaya ka dayo kaoman it ogali dwat, kaarakitay tiba imdala yadi wagdog. 21San Diyos, hanggan san Kiristo Hisos, hanggan sat manga anghil fagdogan, hogfwayong hyamo kitay, ha fag katanog to fag manga togon. Ha fag idwag fatoga ista naibolon dwat, fag idwa yadi ha fagihidon taw. 22Fag idyag sadi ginan nogtawid hasta baba alfoyo kaarakitay igfalobos hanya ka kangayanan fagtahinan. Haw fag idwa kaaktom hasta ogali dwat. Hyamo fangayofan fag fagaba maliyaw. 23Fag bohondi danom im faginomon. Ha fag ginom yadi ogbot fag alak. To tomogbong yadi hyamo haw nogdog masoha, mamarigon yadi hyamo, kawa haw no fagaba kasagit tiyan. 24Ha akwa manga taw malagan wa fiya fiya it manga ogali dwat, nyawa idyapdin dasog has fangabaya. Dapat ay tiba taw it ogali dwat aban ya bagom lag. 25Kitonya yadi, ha manga ibolon fiya ka madalim lag, dapat ay nodyan lag madali, idwa yadi aban imfyalom, imlag di.

will be added

X\