1 Katwa wagdog fiya fiya ka Maliyaw fag Falad fwayong kitay has ginanan sirang tiba domayot fakatiwalaon. Tamtanog manga falad madaya hanggan manga adal yadi gis manga labang. 2 Ha akwa aban mangag faadal bohagon, kat manga fangayofan ha tandaan kitay tonyan Fandaya manga nasali sogowan. Ta bomando kitay, 3 fag idwag talsawa. Ta bomando yadi tibak fanganon kan Diyos nahalig hanggan nafatalaga kitay, ka mangan tiwala, ka natwa wan ka fakaoronganan, fag baya in Diyos ta no kwan. 4 Fagayo kan Diyos nahalig fiya, yakanga tam idwa ha fagdayoon fag fanganon, dapat tam fag baya in Diyos nogtanggap ka fanganon, 5 maskin in Diyos hampang hanggan intam darangin kagfatohoyan kitay bohonwa fagliyon tonya. 6 Haw nogfaadal to fag manga togon hantam manga fadwasay, haw in Kiristo Hisos fiya fag fangibolon. No kandogay day haw nogfaadal yapdi intam fakatiwalaon, hanggan kawa adal orongan kam fakatanogon, im sadili fangayofan imrigon yadi. 7 Fag idwag falibang hyamo has manga toltol magorang kadwa ha kahologan. Yatokitay, haw fag fayayom hyamo has fiya. 8 Ha fakinabang ongay tam nogfayayom igfarigon intam habilogan. Dapat ay, bohondi kitonyak fiya ka fakinabang nogfayayom intam fangayofan has fiya, maskin is Diyos ha togon it bato disagon, bohondi ti fag haboyagan, hanggan ka haboyagan has aban. 9 Fiya fagayo fag manga taw nogfaanod hanggan katiwala tonya. 10 Kawa kitonya tam idwag fagomon gibolon mahogod maskin tam igsyag in Diyos ka boyagan, intam Famawi fagayo, labi man ka mangan tiwala hanya. 11 Haw fag faadal to fag manga togon hantam manga fadwasay. 12 Kawa haw anahan yapdi, ta fag idwa ha fagoliton hyamo kitay, ha anahan ya ngadi. Yatokitay, haw fag kabali ka mangan tiwala fagtoladon, no kinda no galwasi manga taw, nogsyag in Diyos, hanggan no kabali maliyaw, sas hampang hanggan sas ogali. 13 No baliday ho nodyam dasog is nyamo, haw fag fagabag basa has fakaaywanan in Diyos sorat. Fag toltol yadi, hanggan igfaadal tonya. 14 Haw fag idwag fabayaan in Diyos disag fagsyaganon ha hyamo, fag faanod kasta nagona nafwayong kawa hyamo hyabi, ka manga fagtahinan sas Tifonan no natawid im baba alfoyo. 15 Ha fag fayayom wam sadili tonya fag manga ibolon, fatonglosan wan, kaarakitay fagayo lomag no kinday haw kabagat has fiya. 16 Im ogali fag maangay hanggan fag fiya haw nogfaadal has taw. Fag idwag fagomon, ginya madi haw, hanggan ka mangag talinga hyamo imbawi yadi.
