1 TIMOTIYO 3

1Taglwang kitay, ka kasayam bali fangano Tifonan danwa fiya it fakasayaon. Anod wa tonya. 2Yakanga manga taw fag idwa ha fagoliton ka fangano Tifonan. It babay fag sadi di, idwag falabi it sadili fakasayaon, madahan, magalang, mafasakbawon famaklay, fiya yadi nogfaadal has taw. 3Fag idwag lango, idwa yadi maisog, dapat fag mahoway, idwag faagran has manga taw, fag idwa fagaba maowasan has kwarta baliwa. 4Hanya fag gano wa fiya fiya it sadili talanahan, hanggan it manga anak fag magalang hanggan katanog hanya. 5Kinday sadik taw no omano in Diyos tifonan, ham gayfan, nodwa syagan gano it sadili talanahan. 6Fag kawa dogay wantiwala ka kabali fangano in Diyos Tifonan. No ngalay yapdi, ngandayo imbali ha takan, ginya madi ka fadosaan kamtohoyan hanya, kito yadi kantohoyan han Fandaya. 7Kadya manga maaktoman san Diyos Tifonan, ta fag idwa ha faglwangon ka gano in Diyos Tifonan. No kitonya tadwag fadwat igdog hanggan is Fandaya idwa omiktan hanya sat siyok. 8Ka fiya, ka mangag togbong san Diyos Tifonan fag ka magalang, idwag maswag no kampang has taw, idwa kalawis has fakalangoon, idwa maingliyon has kwarta. 9Fag kawa dan intiwala orongan hantam madolaw fag fakatiwalaon, ka nafatwagdog lamang has mangan tiwala, ka mangadwa ha fakahawagon it naogali dwat hyabi. 10Tam fag bantay yapdit ogali, tam noglag fiya ngay, tam bago di domisag it bato ibolonon. 11Kat manga babay fag fiya yadit ogali, idwa mafadwaton igdog, idwag falabit sadili fakasayaon, nyawa kanat ibolon myasa wa fiya. 12Kagtogbong san Diyos Tifonan, it babay fag sadi di, gano yadi fiya fiya it sadili talanahan, syagan yadig fatanog it manga anak. 13Fagayo fag manga taw gomalang has gibolon han Diyos Tifonan hanya nogfadagos fiya it bato ibolonon. Marigon yadista fangayofan igfadog no kinday tam nogsyag in Diyos kawa tam no kasadi san Kiristo Hisos. 14Hogsorat to fag manga togon ha hyamo, hanggan ho gwayan wa kasaya kitay tam fag ngalay wa manladlagan aban. 15Dapat, halimbawa, aho nodyam dasog is nyamo madali, to fag sorat ka fatwagdog hyamo kan Diyos boyagan it talanahan ogaliyon fiya. San Diyos Tifonan, no fiya ista manga ogali ka bilang wa torok famaganit has fakaoronganan. 16Ka manga fakaoronganan kantam fakatiwalaon madolaw wa dahol dahol kitay, Hanyan lag hastay nonbali taw, It Maliyaw fag Falad nafaorongan yadi hanya, Ka manga anghil nalag hanya, Ta nabarita yadi hanya sadik baba daga. Sas fagayo fag banwanan, ha akwan tiwala hanya, Ginya madis Diyos natanggap ya hanya ham tongod.

will be added

X\