1 TISALONIKA 5

1Manga fadwasay, nyawa hodwa manorat ha hayo no ginahin fag masohod to kangko manga naowas nom-anod aban, 2maskin tam fadi wadtwa kitay intam Fon kabangkadan fag Sirang no kadasog, idwa ha fatagak intam, kito yadis fangnahaw basad yabi idwag fatagak. 3Aban, manga taw noglwang, Ogali wa kati, tam idwa ha fakadalaon, yatokitay gis nanya aban, sadi odi ginan, ka kahoriyan imdasog has taw, kitos ina kadwa twa no ginahin hanya no domog masagit kawa kasagayat anak, hanggan manga taw idwa yadi twag baybay tonya fag kahoriyan. 4Dapat ay, tam, manga fadwasay, tam idwa basad marom, yakanga tonya fag Sirang nomdasog aban, tam idwam hinol kitos fangnahaw nogfahinol intam. 5Maskin tam fagayo sakop mayawa, basad sirang. Tam bonwa sakop marom basad yabi. 6Yakanga tam fag idwa matoyogan kito ka tiba, tam fag mafolawan fagaba, idwa kalango. 7Fagaba yabi taw nogtoyog, fagaba yabi ta no kalango. 8Dapat tam ka sakop sirang. Tam fag gisip fiya fagaba, fag idwa kitos kalango. Tam fag syag in Diyos hanggan galwasi hanya, ginya tam bilang wa ha fanaktak famana hantam dobdob, hanggan kawa tam ha fagfanayaon matohoyanan kitay, is Diyos bomawi intam, ka bilang intam solong sambalilo baol, fanaktak sas alfoyo. 9Is Diyos idwa nafili intam kaarakitay tam domog it kaisogan aban basad fadosaan, dapat hanya nafili intam kaarakitay is Kiristo Hisos kagfon intam bomawi intam. 10Is Hisos natay kawa hantam kaarakitay, nyawa tam boyagan yapdi, hanya nombangkad ya, nyawa tam nagona wa natay, tam maofodan yadi hanya aban, boyagan. 11Yakanga ham fag fadagos igfarigon ha sadi ha sadi hanggan igtarogbongan, kito ka hayo ogali kati. 12Manga fadwasay, migfaaronganon ha hayo kitay ham fag galang in Diyos manga fangibolon is nyamo hayo, kito ka maangay. Ham fag galang ha hayo manga fagtahinan kagfaadal hayo has manga ogali ka maangay han Kiristo fag manga taw. 13Ham fag galang hanggan gamigosan yadi ha hanya kawa ta nogfarigon hayo manga fangayofan. Ham fag gamigosan ha sadi ha sadi. 14Manga fadwasay, migfaaronganon ha hayo kitay ham fag fwayong has manga mafang kitay, ta fag idwa kafang gibolon. Fag farigon ista manga fangayofan ka manga madalaon. Togbongan ka manga magomo. Ham fag idwag sagot mahori donggon nyawa haday fag taw. 15Nyawa faktaw santam fag idwa ganti dwat, taw no nafahoriyan intam. Nyawa ginahin tam fag kasaya gogali ka mahoway has fagayo fag manga taw. 16Tam fag kasolong fagaba, 17fag fagabag darangin, 18hanggan fag baya in Diyos nyawa kana kantam nadalanan. Ka kitonya fag manga ogali kan Diyos fakasayaon santam, kawa tam insadi san Kiristo Hisos. 19Fag idwag toplan ka Maliyaw fag Falad ibolon. 20Tam fag idwag yod ista toltol ta noglwang kitay it toltol gis Falad Maliyaw. 21Solayan fagayo fag manga bagay, fag katanog ka fiya, 22fag domayo fagayo fag ogali kadwa maangay. 23Angko fagdaranginon kitay, fag is Diyos mandi kagdisag kahowayan, ka fabali intam manga fangayofan maliyaw, hanggan omano intam fangayofan, isip hanggan habilogan, kaarakitay tadwa ha fabangdanan intam, is Kiristo Hisos kagfon intam nombangkad ya hastay aban. 24Kagfatawag intam ha hanya idwa bohagon, yakanga hanyag fatonglos it togon hantam. 25Manga fadwasay, ham fag darangin yadi kawa ha hyami. 26Tam fag badbayaan ha sadi ha sadi tam nogladlagan, kawa tam tasayan wan san Kiristo. 27Hogfaaronganon ha hayo, kawa kagfon intam kagfasognod hyami, ham fag basa to fag sorat has fagayo kantiwala in Kiristo is nyamo hayo. 28Ham nangos fag domog kitay, is Kiristo Hisos kagfon intam mahoway ha hayo fagaba.

will be added

X\