1 TISALONIKA 4

1Manga fadwasay, sas katabowanan tingko sorat, mi nafwayong ha hayo hyabi no kana fag manga ogali ka maangay, kaarakitay is Diyos igbaya intam, hanggan mi nadog kitay kitonya nga ngap ka hayo ogali. Kati, kawa hami in Hisos kagfon intam, it nasogo, migfaaronganon ha hayo mahogod kitay, fag bondi kitonyak fiya hayo manga ogali. 2Kawa ham fadi wadtwa kitay ka hyami fwayong ha hayo, in Hisos intam wa Fon togon. 3In Diyos fakasayaon intam fangayofan fag maliyaw, hanggan tam fag domayo fagayo fag dwat fag kasolongan has ka taw baliwa. 4Ka manga ama fagayo fag gofod maangay it sadili manga babay. It ogali hat babay fag fiya san Diyos faglagan, hanggan sas taw faglagan, 5bohonwa kitay kasaya odi ina, kitos manga Hintil kadwa kilala in Diyos. 6Nyawa fakta fag ama fag idwa ha kasalanan hasta babay baliwa. Fag idwag dayat fadwasay kantiwala sinya, fag idwag fabalaw ista fangayofan. Mi nafwayong ha hayo hyabi yapdi, mi danwa nafatagak hayo marigon kitay, kagfon intam mamadosa ka gibolon kitonya fag dwat. 7Is Diyos nafatawag intam hanya, kaarakitay intam manga ogali fag kabali maliyaw has manga ina has manga ama baliwa, idwa has manga ogali dwat has ka taw. 8Yakanga nyawa faktaw ka kafang igfasakop tonya fag togon, bonwa taw kat fagdayoon, dapat is Diyos kat fagdayoon kagdisag it Maliyaw fag Falad hantam. 9No kitay di nyawa hodwag fatohod hayo no kadi has galwasi intam manga kapariho intiwala baliwa, kawas Diyos kagfaadal hayo no kinday ka maangay tam no gadgalwasiyan. 10Kitonya wa ngay ka hayo naogali has manga fadwasay fagayo sas sakop Masidonya sadi wak dahonya. Nyawa kitonya, manga fadwasay, migfaaronganon ha hayo kitay, ham fag kalabi man no galwasi has manga kapariho intiwala. 11No bali day hayo fagsyaganon, ham fag idwag faagran has taw, fag idwa mamawaton, fag sayak hayo sadili fangaboyagon kito ka hyami fwayong ha hayo hyabi. 12Hayo ogali no kitonya, ka mangadyan tiwala gomalang hayo, hanggan ham idwag syag has iba taw hayo fangaboyagon. 13Hyami manga fadwasay, kati bokod wan angko fagfwayongon, mi kasayag fatohoyan ha hayo no kinday orongan ka manga natay, kaarakitay ham idwam rongkot kito ka manga taw kadwa ha fagfanayaon aban. 14Tam katiwala kitay is Hisos natay, ginyan boyag ya. Kitonya yadi ka manga danwan tiwala han Hisos ta no natay, is Diyos fatahin yadi han Hisos aban. 15Kati hyami faadalon ha hayo, ka mandi kagfon intam, it nafaadal kitay, tam, ka manga boyagan yapdi gis nanya kagfon intam no kabangkad aban, idwa gomona has manga taw ka natay. 16Gis nanya aban, ha fasognod marigon, ka fagtahinan anghil homampang yadi, ha omoni in Diyos bodyong, ginya madi kagfon intam mandi ka domokson gin Diyos banwanan sam tongod. Bago bago ka manga danwan tiwala in Kiristo ta no natay, tonyam bangon ya aban, boyagan, 17ginya madi ka tam, ka boyagan yapdi gis nanya, tam im-anggong yadi koyogan has taw, ha sayo manga linyabo, kaarakitay tomagbo kagfon intam sam tongod. Ginya madi tam omofod hanya hanggan aban aban. 18Yakanga fag fatohod hantam iba tonya fag manga hampang, kaarakitay igfarigon ha sadi ha sadi.

will be added

X\