1 TISALONIKA 3

1Ginya madi midwa gagwanta hami nodwag sabang hayo, yakanga mi gayfan hami da Silas fag imgoyan sas banwa Atinas, 2dapat mi nasogo ha hayo in Timotiyo, intam fadwasay, ka gofod yadi hyami gibolon in Diyos ibolon, hami nogtoltol ka Fiya fag Barita kawa han Kiristo. Mi nasogo hanya kaarakitay mamarigon hayo manga fangayofan ham nogsyag hasagfon intam, 3kaarakitay ngadi sadi sa hayo fag idwam bway kawa tagfahoriyan hayo. Ham fadi wadtwa kitay in Diyos kafangayofanan hantam idwag fabaybay fagayo ginan ta nogfahoriyan intam. 4Kawa hami no gofod yapdi hayo hyabi, mi danwa nafatagak hayo kitay, tam domog mahori, hanggan ham fadi wadnalag kitay tonyan anod wan, ta nafahoriyan intam. 5Maskin ngay, ahos Pablo, hodwa gagwanta ho nodwag sogo in Timotiyo has nyamo hayo. Yakanga ho nasogo hanya kaarakitay mi tomwa ngatay ham marigon yapdi nogsyag hantam Fon. Ho kadala kitay is Fanlaban ngatay nafaadowan hayo. No kitonya mi gwayan wagfaanogon hyami nakayayan is nyamo hayo hyabi. 6Dapat ay, kati is Timotiyo nwali wan a, nafadahit ha hyami kafiyaon fag barita kitay, ham igsyag yapdin Diyos hanggan ham gadgalwasiyan yadi. Nafwayong yadi ha hyami kitay, ham fagaba wa maowasan, igbaya hyami, hanggan ham galwad hyami kito yadi hyami, mi no galwad hayo. 7Yakanga, manga fadwasay, nyawa mi sawas basad fakahoriyan kati, hyami fangayofan inrigon ya kawa ha hayo, kawa ham marigon nogsyag in Kiristo, 8hanggan minsaya yagdog kawa hayo manga haboyagan kansadi hasagfon intam, karigon sinya. 9Kati idwa hat dayo domwag mi nogbaya intam Diyos kawa ha hayo. 10Yabi sirang migdarangin mahogod kitay, hami nangos fag lomag ya hayo hanggan tomogbong hayo, kaarakitay idwa ha korang ham nogsyag in Kiristo. 11Hyami fagdaranginon kitay, intam Diyos hanggan Ama, hanggan is Hisos kagfon intam ka falag hyami halimbawan kaarakitay hami manabang has nyamo hayo. 12Kagfon intam fag fabali yadi hayo kalabi man no gadgalwasiyan ha sadi ha sadi, hanggan has fagayo fag manga taw, kito yadi hyami mi no galwasi hayo. 13Farigon nangos hayo manga fangayofan, kaarakitay, is Hisos kagfon intam nombangkad ya aban, koyogan yadi hanya ka manga taw kantohoyan ha hanya, imlag kitay, ham maliyaw hanggan hosto santam Diyos hanggan Ama atobangan gis nanya.

will be added

X\