1 TISALONIKA 2

1Hyami manga fadwasay, ham fadi wadtwa kitay, hami nonbangkad has nyamo hayo hyabi, bonwa kitay idwa ha kahologan. 2Ham twa wa kitay mi nodyan dasog ha hayo sas banwa Tisalonika, ta nafahoriyan hanggan nafasidyowan odi hyami sas banwa Filipos. Nyawa aywan kaglaban hyami toltol, is Diyos nafarigon hyami fangayofan, kaarakitay midwa kadalag toltol ha hayo ka Fiya fag Barita gin Diyos. 3Hyami fagfaaronganonon ha hayo hyabi, midwag fataglowan hayo, bonwa yadi kitay mi ha fakasayaon kadwa fiya, midwa yadig falingo manga taw. 4Yatokitay ngap, no kinday in Diyos fakasayaon, kitonya mi nogtoltol has taw, kawa hami in Diyos nagfatohoyanan kitay, hami ka bahala manoltol ka Fiya fag Barita. Midwa kasaya kitay, fag manga taw kagbaya hyami. Hyami fakasayaon fag is Diyos, kaglag hyami manga basad fangayofan, fag hanya kagbaya waglag hyami ibolon. 5Ham fadi wadtwa hami nonbangkad has nyamo hayo, midwa kampang igmanwali ha hayo, idwa yadi myasa wa masayagdog maskin ha bato sagadon. Is Diyos iglag ka sa hyami basad fangayofan. 6Midwag fahasa kitay nyawa ham, nyawa faktaw mamasayagdog hyami, 7nyawa, no kitay di, kawa hami in Kiristo manga Fandiya-Barita, idwa ha dwat mi no gasolop hayo togbong. Dapat ay, mi nos nyamo hayo hyabi, mi gafalo waglag hayo, kito was ina no gano it anak dararag. 8Maskin mi galwasi hayo, bondi ka Fiya fag Barita ka hyami nahoray ha hayo, midwa yadi nahwangit hyami sadili haboyagan kaarakitay igtogbong hayo. 9Manga fadwasay, ham fadi wadag tohod kitay, hami nangibolon hanggan wa kagayamonan yabi sirang, kaarakitay ham, nyawa faktaw, idwam hori hyami fanganon, hami nogtoltol ha hayo ka Fiya fag Barita gin Diyos. 10Ham twa wagfaorongan kitay hyami ogali ha hayo, ka mangan tiwala sonson wa fiya, maangay, hanggan ham idwa ha fabangdanan hyami. Is Diyos twa yadig faorongan kitonya. 11Ham nalag kitay hami bilang wa hayo ama fagayo. 12Mi gofod hayo, migfarigon hayo manga fangayofan, migfaaronganon hayo kitay, hayo manga ogali fag maangay han Diyos kagfatawag hayo, kaarakitay ham imaktom hat sakop kafiyan. 13Hyabi hami no natoltol ha hayo in Diyos hampang, ham nanalinga hanggan natanggap kitay ka hyami toltol bonwasta fadahit, dapat giwan Diyos ka gibolon sa hayos mangam tiwala. Tonya ka sadi yak bagay ka hyami fagbayaon han Diyos. 14Manga fadwasay, ka hayo nadalanan kito yadi kan Diyos manga Tifonan sas sakop Hodiya, ka manga taw kansadi san Kiristo Hisos, ista nadalanan sinya. Hayo manga kapariho nafahoriyan hayo, kito yadi ka manga Hodyo no nafahoriyan ka mangan tiwala sas sakop Hodiya. 15Hyabi hyabi, manga Hodyo nafahatay in Diyos manga fangampang, ginya ta nafahatay yadin Hisos kagfon intam, hanggan wa kati tagfahoriyan hyami. Is Diyos kahori wa dahol tonya fag manga taw, ta gaway yadi manga taw fagayo. 16Mi nogtoltol ka Fiya fag Barita has manga Hintil kaarakitay manga Hintil imbawi yadi wan, ta kasayag balag hyami. Kawa mang kasalanan Hodyo gi yapdis hyabi iglabi wan, yakanga kati is Diyos idwa hat dayo domwag fag kaisog ka manga Hodyo. 17Manga fadwasay, kati angko bato lwangon kitay hami no nalin gi hayo hyabi, mi galwad wa dahol hayo, mi kasaya wa dahol manabang hayo. Nyawa tam nanarowayan, tam bilang digladlagan. 18Itfagonan no kitay di, ho kalahaw wa kalahaw has nyamo hayo, dapat hodwan lahaw, kawas Satanas nataktak hyami. 19Ho kasayag sabang hayo maskin ham kito ka tiba, ham yadi hyami fagasalopon, hyami fakasolongon, hyami falagon kitay, mi nafadagos hyami ibolon. Ham hyami famasayagdog san Hisos kagfon intam it faglagan, hanya nombangkad ya aban. 20Anod, ham ka hyami famalagon kitay, hyami ibolon fiya, hanggan ham ka hyami fakasolongon.

will be added

X\