1 TISALONIKA 1

1Ahos Pablo kagsorat ha hayo, hanggan to fag sorat gi yadinda Silas da Timotiyo. Migsorat ha hayo fagayo ka san Diyos Tifonan sas banwa Tisalonika, ha hayo kantohoyan han Diyos intam Ama, hanggan han Kiristo Hisos kagfon intam. Ham nangos fag domog kitay is Diyos mahoway ha hayo, hanggan igfalokmay yadi hayo manga fangayofan fagaba. 2Mi fagabag baya in Diyos kawa ha hayo hanggan nyawa ginahin hami nogdarangin, 3migfasalamat hantam Diyos hanggan intam Ama kawa migtohod kitay, maskin ham igsyag in Hisos, hayo ogali inbali fiya, hanggan maskin ham galwasi hanya, ham gibolon mahogod in Kiristo Hisos ibolon, ham gagwanta yadi, kawa hayo fakasyagon is Kiristo Hisos kagfon intam. 4Hyami manga fadwasay, mi twa kitay is Diyos ka galwasi hayo, nafili yadi hayo. 5Kawa hami no natoltol ha hayo ka Fiya fag Barita, ham bondi kitay nadog hyami hampang, ham nalag yadi ka Maliyaw fag Falad manga naibolon madolaw. Hami nafalag yadi ha hayo kitay, midwa gadowan nogtoltol ha hayo, mi twa kitay in Diyos Fiya fag Barita fakaoronganan wan. Tam hyabi no gofodan is nyamo hayo, ham fadi wadnalag hyami manga ogali. Ka hayo lagan igtogbong yadi hayo. 6Ham natolad hyami ogali hanggan kagfon intam. Ham no natanggap ka Fiya fag Barita, nyawa aywan hayo donggon mahori, ka Maliyaw fag Falad nafasolong igdog hayo. 7Yakanga fagayo kantiwala sas sakop Masidonya hanggan sakop Akaya nalag sadik fagtoladon fiya gi hayo manga ogali. 8Bondi sinya sas manga sakop Masidonya hanggan Akaya, ta no nadog gi hayo ka toltol kawa hantam Fon, indog yadi sas manga banwanan fagayo, kawa ham intiwala in Diyos, kakitay, nyawa bonwa hami kagbarita kati, gi wa hayo, ta nogdog. 9Tonya fag manga taw fagayo igtoltolan kitay ham natanggap hyami kafiyaon mi no gi hayo banwanan, hanggan ham nadayo hayo manga fagsyagon gona, kaarakitay igsyag in Diyos, ka boyagan hanggan orongan fag Diyos, hanggan gibolon yadit ibolon, 10hanggan igfanaya yadit Anak kabangkadan aban gin Diyos banwanan sam tongod, kawas Hisos, kan Diyos nafaboyag ya gis kahatayan. Is Hisos ka bomawi intam aban, is Diyos nogfadosa manga taw kawa hanya omisog ka manga gogali dwat.

will be added

X\