1 PIDRO 4

1Kawa tam iglag kitay is Kiristo naagwanta mahori sat habilogan, tam fag handa wa omagwanta yadi, maskin ka naagwanta mahori sat habilogan, idwa kasaya ogali dwat. 2No kitonya, tam nostay yapdis baba daga, tam omogali in Diyos fakasayaon, bohonwa kantam bali fangayofan masayaon fag ogali. 3Maskin dogay wa hyabi tam no naogali kantam kaidagdogan kitos manga idya kilala in Diyos. Fiya wa kati. Intam manga ogali hyabi idagdog odi, kitos manga igfahayan, goyon ka bali fangayofan masayaon, mangag lango, iglabi wa kasolongan, mahabanan ginom, goyonan has dwat, hanggan kagsagaya wa ogali noglohod has manga bohonwa orongan diyos. 4Kati ta kadolaw wantam, no kana mayon tam nodwa kaaktom has taw ta no gogali yapdi kitonya, idwag dahan, yakanga tagfadwat igdog intam. 5Dapat ta bahala wagsagot han Diyos aban, ka talaga wa fatohoyan it fadosaan has manga boyagan yapdi, hanggan has manga natay. 6Maskin kitonya, ka Fiya fag Barita inbarita yadi wan has manga natay, kaarakitay tamboyag yadi san Diyos akbang aban, nyawa ka kahatayan natahod it manga habilogan, kito kantohoyan has fagayo fag manga taw. 7Ka katabowanan fagayo fag manga bagay kaakbang wan. Yakanga tam fag matagahan, fag idwag falabi intam sadili fakasayaon, kaarakitay tam syagan igdarangin fiya fiya. 8Ka labi man has fagayo, tam fag gadgalwasiyan fiya fiya, maskin tam no gadgalwasiyan, idwa mahori igfaliyam fagaba manga ogali dwat ha sadi ha sadi. 9Tam fag idwa kafang igfasakbaw intam manga fadwasay hantam manga balay. 10Tam fagayo ha natanggap fagsyaganon bokod bokod gin Diyos. Tam faanodan wa tonya, kaarakitay fagayo ha fakinabang maskin tam igfatonglos fiya fiya kan Diyos nafaano hantam fagsyaganon ha sadi ha sadi. 11Tam awkin ka manga fanoltol? Fag in Diyos hampang kantam fagtoltolon has taw. Tam awkin ka mangag togbong is taw? Tam fag syag in Diyos disag karigonan. Nyawa kana fag bagay fag in Diyos kafiyan kamlag gin Kiristo Hisos. Sawa hanya ka kafiyan hanggan karigonan hanggan aban aban. Fag kitonya wa ngay. 12Angko manga fakilalaon, tam fag idwa kadolaw ka manga mahori kagsolay intam. Tam fag idwa gayfan kantam bohondi kito ka tiba ista kahoriyan. 13Yatokitay, tam fag masolong maskin tam igdog yadin Kiristo kahoriyan it baliw, ginya tam kasolong wa dahol dahol is Kiristo nombangkad ya, it kafiyan malagan sa hanya. 14Ta nogfasidyowan intam maskin tam galwasi in Kiristo, tam fag kasolong wan. It kahologan in Diyos Falad kafiyaon kasadi santam. 15Nyawa tam igdog mahori, fag bohonwa kitay tam ha nafahatay taw, ngatay tam ignahaw, ngatay ha kasalanan, ngatay tam mamawaton is taw. 16Dapat ay, tam fag idwa kaya tam nogdog mahori kawa tam in-ngayan in Kiristo sakop fag manga taw. Yatokitay, tam fag fasalamat han Diyos maskin tam in-ngayan in Kiristo wa sakop. 17Kati wa fag masohod is Diyos fabago nogfatohoyan is taw it hadasogan, hanggan bago bago kayapdin Diyos manga nafili, ginya has iba taw. No giwantam nogfabago, kinda ara to it katabowanan no has manga idwa katanog in Diyos Fiya fag Barita, ham gayfan? 18Kito kansorat sas Kasoratan, Ka manga maslong no ganong wansakop basad fadosaan, Kinda araw ka mangadwan tiwala han Diyos, ka manga ha ogali dwat, ham gayfan? 19Yakanga ka manga gagwanta basad mahori kawan Diyos fasadan kitonya, fag gogali yapdi fiya, hanggan fag faano intam sadili ha hanya ka nahalig intam, hanya ka fiya fag fagsyagon.

will be added

X\