1 PIDRO 3

1Kitonya yadi ham, manga ina, fag fasakop ha hayo manga sadili indogan. Hayo indogan tiba nodyan tiwala in Diyos hampang, fag hayo fiya fag ogali ka fatiwala has taw. 2Ta fag lomag kitay hayo ogali maangay hanggan ham magalang wan. Yakanga nyawa ham idwag toltol aywan. 3Fag bonwa manga dayag malagan kagfalag hayo kafiyan, kitos madolaw fag nasorod bok, manga ono ayo ayo, ngatay manga rotay araw araw igtobos. 4Hayo kafiyan fag imlag sas magop hanggan mahoway fag ogali kamlag gi hayo fangayofan. Ka fangayofan kitonya balaw kadaanon hanggan mahalga wa dahol san Diyos faglagan. 5Hyabi hyabi, ka manga ina kantiwala hanggan nasyag in Diyos, kitonyat manga dayag. Ta nafasakop hat manga sadili indogan. 6Halimbawa, is Sara intanog in Abraham, nangayan yadi hanya it fagtahinan. Ham imaktom yadin Sara manga hasokfonan ina, hayo ibolon no fiya, hanggan ham nodwa ha fakahawagon nyawa kana. 7Tam yadi manga ama, tam fag gano yadi intam manga babay fiya fiya, maskin tam twagdog kitay ka ina idwa kitos ama ik marigon. Tam fag magalang yadi hantam manga babay, maskin tam talsawa myasa wa kitonya nogtanggap in Diyos disag hantam haboyagan. Tam no gofodan fiya kitonya, idwa hagtaktak intam darangin. 8Angko togon ka goyan goyan kitay, tam fag kasadi. Tam fag myasa wa mahoway no gofodan. Tam fag gadgalwasiyan ha sadi ha sadi, kitos tasayan. Tam fag maawaon hanggan igfasolon di istaw. 9Nyawa ta naibolon dwat hantam, tam fag idwa ganti dwat. Nyawa tagyod intam, tam fag idwag faganti hampang has taw kitonya. Yatokitay, tam ngap fag darangin kitay tonya fag taw fag lomag it fagbayaon, kawas Diyos nafili intam kaarakitay tam tomanggap yadi manga fagbayaon. 10Kito kansorat, Ka kasaya fagaba boyagan hanggan kasolong, Fag idwag salan kampang has iba taw, fag idwa yadig balibad. 11Fag dayo ka manga ogali dwat, Fag katanog ka fiya. Fag sadi wak fangayofan igfayayom hanya has kahowayan. 12Maskin kagfon intam igbantay fagaba ka gogali maslong, Igtalinga yadi ta nogdarangin, Dapat hanya magoyoyan has manga taw ka gogali dwat. 13Fakta kagfahoriyan intam, ham gayfan, nontam ogali sonson wa fiya? Idwa akwa nangos. 14Dapat ay, nyawa kitay halimbawa, tagfahoriyan intam maskin tam gibolon fiya, tam ha fagbayaon yapdi. Nyawa tagfadalagdog intam, tam fag idwa kadala. Fag idwa yadi galibitan intam fangayofan. 15Dapat tam fag magalang wa dahol han Kiristo santam basad fangayofan, kawa hanya kagfon intam. Nyawa faktaw ka omintaw intam kawa hantam fagsyagon, no kanat kahologan, tam fag matalagaan intam sagot, nyawa ginahin. 16Dapat tam nogsagot fag mahoway mahoway, magalang yadi has taw. Tam fag idwa ha fakahawagon kantam naogali dwat, kaarakitay kagyod hanggan igfadwat igdog intam maya wan, ta noglag intam ogali fiya, kawa tam insadi san Kiristo. 17Fiya man ta nogfahoriyan intam, non Diyos wa fasadan kitonya, maskin intam ogali fiya, has igfadosa intam kawa tam naibolon dwat. 18Kawas Kiristo natay sadi di ginan, kawa hantam manga ogali dwat, ya hosto wan. Ka maslong it ogali natay kaarakitay has manga taw ka ha manga ogali dwat, kaarakitay tomaban intam han Diyos. Manga taw nafahatay in Hisos habilogan taw, dapat is Diyos nafaboyag ya hanya, ha habilogan maangay sas Maliyaw fag Falad. 19No ha habilogan bago, is Hisos nadokson has manga falad maporisowan hanggan nafaadal sinya. 20Tonyasta manga falad ka dayo katiwala han Diyos hyabi, is Diyos no dogay wagfanaya, sa yapdin Nowi fag kasohodan, is Nowi no kalig yapdi baloto. Sayok fag manga taw kanbawi gis gonaw danom dagat sinyas basad baloto, walo odi. 21Ka danom igfahalimbawa no kinday kati tam nontogna. Tam nontogna basad danom, bohonwa kitay tam igbol owing habilogan, tam igfatohoyan intam sadili han Diyos, idwa ha fakahawagon kantam naogali dwat. Tam nontogna kitonya, tam inbawi wan kawas Kiristo Hisos inboyag ya. 22Ginya madi hanya nasakbaw han Diyos banwanan sam tongod. Kati sawan Diyos balis sihon. Ka manga anghil, hanggan ka manga ha kangayanan hanggan ka ha karigonan nafasakop ha hanya.

will be added

X\