1 Yakanga kati tam fag dayo fagayo ka manga dwat fag ogali, kitos mangag balibad, mangag falagon odi ogali fiya, manga kaid-ingliyan, mangag fadaddwatan igdog. 2 Fag kitos anak dararag no kasamok it soso, tam no kasamok in Diyos hampang, kagfarigon intam fangayofan bago, kaarakitay tam karigon nomtiwala, hanggan tam imbawi wan. 3 Maskin kito kansorat san Diyos Kasoratan, Tam fadi wadnadog kitay kagfon intam mahoway wa dahol dahol. 4 Yakanga tam fag gakbang hantam Fon ka bilang bato boyagan, kasta nadayo, dapat kan Diyos nafili, mahalga yadi sa hanya. 5 Tam fag gakbang hanya kawa tam bilang yadi manga bato boyagan. Fag is Diyos kagfatarongbawan intam sat fakaligon Fanimbaan-Dahol gis manga fangayofan bago. Sinya tam imbali sadik layonan maliyaw fag manga fagalan kagdisag han Diyos, gin Kiristo Hisos, it manga fagbayaon gis manga fangayofan bago. 6 Maskin ka Kasoratan iglwang, Fanlag ngay, hogfatobo sas Siyon, Sadik bato, angko nafili hanggan mahalga, Infwalid sas basad solok igfarigon ka tiba. Nyawa faktaw kagsyag hanya, idwam balaw, nyawa ginahin. 7 Yakanga tonya fag bato mahalga wa dahol hantam kagsyag hanya. Dapat no kadi has mangadwag syag, im-anod wa kito ka sas Kasoratan, Ka kalig balay fagdayoon fag bato, Tonya di ngap kanbali igfarigon ka tiba. 8 Hanggan Manga taw katahid odi sinya fag bato, Ta makfo yadi sas bato famarigon. Tantahid wan maskin tadwa katanog in Diyos hampang, ginya tonya kan Diyos nafatohoyan hanya fag manga taw. 9 Dapat tam kan Diyos nafili fag hasokfonan, manga fagalan hantam hari, sadik maliyaw fag layonan, in Diyos sadili fag manga taw, kagfalag has taw in Diyos manga naibolon kafiyaon, no nafatawag intam gis basad marom, hawat kafiyaon fag kayawaan. 10 Hyabi hyabi tam bohonwan Diyos layonan fag manga taw, dapat kati tam inbalit nafili fag layonan. Hyabi tam idya nadog kitay is Diyos maawaon, dapat kati tam nadog kitay tam it fakaawaon wan. 11 Angko manga fakilalaon, kawa tam bilang manga famaklay kagsabang odistay is baba daga, hogfaaronganon kitay, tam fag idwa goyon ka bali fangayofan masayaon gistay is baba daga, kawag laban has fangayofan bago. 12 Intam manga ogali fag fiya sas faglagan manga taw kadwam tiwala. Nyawa tagbangdan intam kati, ta noglag kitay intam ogali fiya, mangharaw, ta mamasayagdog han Diyos aban, gis nanya fag sirang hanya nombangkad. 13 Maskin tam galwasi kagfon intam, tam fag fasakop has fagayo ka ha kangayanan sas baba daga, hanggan has gorangon sas Roma ka nasakop fagayo fagayo fag banwanan. 14 Tam fag fasakop yadi hat manga nahalig gobirnador, kat nasogo hantam, kaarakitay igfadosa has manga gibolon dwat, hanggan igfasayagdog ka manga gibolon fiya. 15 Maskin in Diyos fakasayaon fag kantam fiya fag ogali kagfatwag lag has taw kitay, bohag odi ista fwayong kadwa ha fakatwawon nogfalamang kampang. 16 Tam fag gogali kitos mafalfasan gis Batasan, dapat kawa no mafalfasan, tam fag idwa gayfan kitay, fiya di no gibolon dwat. Yatokitay, intam manga ogali fag kito kan Diyos manga sogowan fag ogali. 17 Tam fag magalang has fagayo fag manga taw, fag galwasi yadintam manga fadwasay san Kiristo. Fag katanog in Diyos, hanggan tam fag magalang has gorangon sas Roma. 18 Ham, ista manga nasali sogowan, fag magalang, fag fasolon yadi ha hayo manga fagoliyanan, nyawa mahoway, nyawa maisog. 19 Maskin is Diyos igbaya wan tam nogtohod kitay, hanya gofod intam, yakanga tam gagwanta ta nogfadosa intam nyawa tam idwa ha kasalanan. 20 Tagfasayagdog awkin ka ha kasalanan no gagwanta di ta nogbakbak hanya, ham gayfan? Idwan. Dapat tam no gagwanta yapdi ta nogfahoriyan intam, kawa tam gibolon has fiya, is Diyos igbaya wan. 21 Maskin tam in Diyos nafili, intam tanggapon it baliw, fag gagwanta nyawa basad mahori. Is Kiristo naagwanta basad mahori kawa hantam, yakanga tam fag tolad yadi hanya. 22 Is Kiristo idwa ha ogali dwat, idwa yadi nabalibad nyawa ginahin. 23 Nyawa ta nayod hanya, is Kiristo idwa naganti ngadi sas hampang. Nyawa tagfahoriyan hanya, hanyadwa nafadalagdog is taw. Is Kiristo nasyag odi han Diyos ka maslong nogfatohoyan ista fadosaan. 24 Is Kiristo natay sas nafatimbangan hayo, nadiya wantam manga ogali dwat fagayo sat habilogan, kaarakitay intam fangayofan matay has ogali dwat baliwa, dapat imboyag has ogali fiya. In Kiristo manga baran ka nafafiya intam. 25 Maskin hyabi tam lamang lamang odi, bilang manga topa matalangan. Dapat ay kati, tam infwali ya has gano topa hanggan hasag bahala intam.
