1 PIDRO 1

1Ahos Pidro, in Kiristo Hisos Fandiya Barita kagsorat. Hogsorat ha hayo kan Diyos, intam Ama manga nafili, dapat naskat ha sayo manga taw, igbanwanan sas manga sakop Ponto, Galasya, Kapadosya, Asya, hanggan Bitinya. 2Hanya ka nafili intam kawa danwat kafangayofanan gi yapdis hyabi hyabi, kaarakitay it Maliyaw fag Falad fahaliyaw intam fangayofan. Ginya madi tam imbali matanogon han Kiristo Hisos, hanggan it karigonan folot indisag wa hantam. Ham nangos fag domog kitay is Diyos mahoway wa dahol ha hayo, hanggan igfalokmay fiya fiya hayo manga fangayofan. 3Tam fag fasayagdog in Kiristo Hisos, kagfon intam, it Ama hanggan it Diyos. Hanyan awa wa dahol intam, yakanga nadisag hantam ka bago fag haboyagan no nafaboyag ya in Kiristo Hisos gis kahatayan, hanggan nafatohoyan intam ka fagsyagon boyagan. 4Yakanga tam igsyag kitay tam ha tanggapon fiya, kadwa kadwat, kadwam liyam, danwa nafatalaga hantam san Diyos banwanan sam tongod. 5Maskin tam igsyag in Diyos, it karigonan ka gano intam hanggan bomawi intam gis nanya aban, sas katabowanan, is Diyos nogfalag no kinday it ibolonon nogbawi manga taw. 6Yakanga tam fag kasolong to fag manga bagay, nyawa kitay sadik ngalay tam igdog manga mahori bokod bokod kagsolay intam. 7To fag manga mahori kagsolay intam ha kahologan wan, maskin igfalag kitay tam orongan wagsyag in Diyos. Ka ginto kadwat di, nyawa tagfadalan sas afoy kaarakitay bomol ka mangan aktom kadwa fiya. Dapat nomlag kitay tam orongan wagsyag in Diyos, tonya bondi kitos gintok mahalga, maskin ta mamasayagdog intam, domisag yadi kafiyan hanggan kangayanan hantam is Kiristo Hisos nomlag ya aban. 8Nyawa ham idwa nalag in Hisos hyabi, ham galwasi hanya. Hanggan nyawa tam idwag lag hanya kati, tam igsyag yapdi hanya. Yakanga tam kasolong wa dahol dahol, tam idwa ha fatoladan intam kasolongan kati, 9maskin tam kabawi wan, kawa tam igsyag han Kiristo Hisos. 10In Diyos manga fangampang ka nagona wa nafwayong kitay, is Diyos mamalag hantam it malooy fag kahowayan. Ta mahogod wa gisip hyabi, hanggan igsayak no kinday manga taw nombawi aban. 11Hyabi hyabi in Kiristo Falad sawan Diyos manga fangampang basad fangayofan, hanggan ka manga fangampang naisip fiya fiya no faktaw, hanggan no ginahin it Falad fagwason nogfatohoyan kitay, is Kiristo aban omagwanta mahori, ginya madi manga kafiyan imlag yadi wan. 12Is Diyos nafatwagdog it manga fangampang hyabi kitay, ka fakinabang fiya fiya git ibolon hawas taw aban, hantam, idwa hat sadili fakinabang. Kati ka manga nadiya ka Fiya fag Barita gis Maliyaw fag Falad, kan Diyos nasogo hantam git banwanan sam tongod, ka nafwayong hantam no kana tonya fag fakinabang. Ka manga anghil gwayan wa kasaya lomag yadi to fag manga bagay. 13Maskin ngay, tam fag danwa matagahan, fag idwag fasigpala. Intam fagsyagon fag ka lamang ka malooy fag kahowayan kan Kiristo Hisos disagon hantam, hanya nombangkad aban. 14Tam fag katanog in Diyos. Tam fag idwa katanog intam bali fangayofan masayaon kito kantam ogali hyabi, tam nodya nadog ka Fiya fag Barita. 15Yatokitay, kawas Diyos maliyaw ka nafili intam, intam fangayofan fag maliyaw yadi, sadi wak dahonya. 16Fag tohod kitay, in Diyos sorat iglwang, Maskin aho maliyaw, ham fag maliyaw yadi. 17Tam igngayan in Diyos intam Ama, tam nogdarangin hanya. Dapat ay, is Diyos idwa ha fagihidon taw, igfaparidrihowan di nogsolay intam manga ogali. Yakanga, tam no baliday boyagan yapdistay sas baba daga, tam fag katanog hanya. 18Maskin tam twa kitay, bohonwa manga bagay ka kadwat, kitos manga pilak, manga ginto, ka nafalfas intam gintam manga ogali kadwa ha kahologan, kantam natanggap gintam manga hafofowan, 19dapat ay, is Kiristo no natay, intam fangafiyan, kitos sadik anak topa kafiyaon, idwa ha dwat, it folot ka mahalga wa dahol ka nafalfas intam. 20Is Diyos nodyapdi nahalig daga, danwa nafatalaga in Hisos hanya baliwa. Ginya madi kati, sas ginanan fag manga sirang, is Diyos nafalag hanya kaarakitay hantam. 21Kawa gin Hisos tam igsyag han Diyos ka nafaboyag hanya gis kahatayan hanggan nadisag hanya kangayanan abwat man has fagayo. Yakanga gin Hisos tam intiwala hanggan igsyag han Diyos. 22Kati intam manga fangayofan inlinay wan kawa tam katanog ka fakaoronganan, hanggan tam gadgalwasiyan orongan. Tam fag mahogod no gadgalwasiyan, bonwa yadi famalagon odi. 23Tam insagaya ya domwag. Kati intam Ama bago is Diyos kadwa katay, bonwa kantam ama taw ka katay. In Diyos hampang boyagan, kadwa kaliyam, ka nafabali intam in Diyos wa manga anak. 24Kito kansorat sas Kasoratan kitay, Fagayo fag manga taw kitos lamnon, It manga kafiyan fagayo kito odis borak lamnon. Ka lamnon kalayong, it manga borak kafangta di. 25Dapat ay, intam Fon hampang igdogayan hanggan aban aban. To fag hampang ka manga Fandiya Barita nagfwayongan hantam.

will be added

X\