1 HWAN 5

1Fagayo ka katiwala kitay is Hisos ka Kiristo, in Diyos wa manga anak. Nyawa faktaw no galwasi manga taw, galwasi yadi ista manga anak. 2Yakanga tam twa kitay tam no galwasi han Diyos hanggan katanog it manga togon, tam galwasi yadit manga anak. 3Maskin tam no galwasi han Diyos, it kahologan tam katanog it manga togon. It manga togon idwa yadi mahori katanog, 4maskin in Diyos manga anak fagayo syagan digdaog ka manga ogali dwat istay sas baba daga. Kawa tam igsyag in Diyos kagfarigon intam, yakanga tam igdaog ka manga ogali dwat. 5Faktaw ka syagan igdaog ka manga ogali dwat istay is baba daga, ham gayfan? Ka lamang katiwala kitay is Hisos in Diyos wa Anak ka syagan igdaog. 6To fag is Kiristo Hisos kandasog istay is baba daga, intogna sas danom a, in-olan yadit folot. Ka Maliyaw fag Falad kagfaorongan tonya kawa tonya fag Falad ka fakaoronganan. 7Tolo kagfaorongan. 8Ka Maliyaw fag Falad, ka danom, hanggan ka folot kagfaorongan. Nyawa tolo, pariho it faglwangon. 9Tam igfaanod intam kapariho taw it faorongan, dapat ay bohondi kitos taw is Diyos nogfaorongan. Is Diyos nafaorongan kawa hat Anak. 10Nyawa faktaw kagsyag han Diyos Anak twa sat basad fangayofan kitay, in Diyos faorongan maanod wan. Kadwag faanod han Diyos faorongan, bilang iglwang is Diyos bohagon, maskin ka taw idwa katiwala in Diyos faorongan kawa hat Anak. 11Kiti is Diyos no nafaorongan kitay, hanya nadisag hantam ka haboyagan idwa ha katabowanan, hanggan tonya fag haboyagan sawat Anak. 12In Diyos Anak nonsadi santam, tam ha akwa ka haboyagan idwa ha katabowanan. Dapat ay, it Anak nodwan sadi santam, tam idwa ha akwa tonya fag haboyagan. 13Hogsorat ha hayo kagsyag in Diyos Anak kaarakitay ham tomwa matohoyanan kitay, ham ha akwa wan haboyagan kadwa ha katabowanan. 14Tam idwa ha fagadowanon tam nogsagad, nyawa kana fag bagay ka maangay han Diyos, kawa tam twa kitay hanyag talinga intam. 15Hanggan tam no twa kitay hanya fagabag talinga hantam, tam twa yadi kitay tam tomanggap intam fagsagadon. 16Nyawa fakta kaglag it fadwasay gogali dwat, bohonwa ka dwat kagdagos has kahatayan, daranginan han Diyos tonya fag fadwasay. Ginya madi is Diyos domisag haboyagan has naogali dwat haraw. To kawa has taw kat naogali dwat idyapdig dagos has kahatayan. Dapat ha akwa ogali dwat kagdagos has kahatayan. Ahodwag lwang kitay, fag darangin kawa has taw ka ha naogali dwat kitonya. 17Fagayo fag ogali dwat kasalanan wan. Kakitay ha akwa manga ogali dwat kadyag dagos has kahatayan. 18Tam twa kitay kanbalin Diyos manga anak idwag fadagos fagaba has ogali dwat, kawan Diyos Anak gano tonya fag manga taw, yakangas Fandaya idwa syagan manmawat hanya. 19Tam talastas kitay, tam in Diyos wa sakop hanggan is Fandaya kagfasognod ka manga taga istay is baba daga. 20Tam twa wan kitay, in Diyos Anak inbangkad wan hastay a, nadisag yadi hantam kadonongan kaarakitay tam homilala ka orongan fag Diyos. Hanggan tam insadi han Diyos orongan kawa tam insadi hat Anak is Kiristo Hisos. Hanya ka orongan fag Diyos hanggan to ka haboyagan idwa ha katabowanan. 21Angko manga anak, fag idwa kadiya has iba fag fagsyagon.

will be added

X\