1 HWAN 3

1Yabay, kafiyaon kafiyaon intam Ama no galwasi intam, kawag ngayan intam in Diyos wa manga anak. Tam it manga anak wa ngay. Ka manga taga istay is baba daga fag manga taw idwa kilala in Diyos, yakanga idwa yadi kilala intam, it manga anak. 2Angko manga fakilalaon, is Diyos nafabali intam it manga wa anak kati, dapat tam idya twa no kinday tam aban. Nyawa kitonya, tam twa wa kitay, no ginahin aban is Kiristo nomlag ya, tam imbali kito yadi hanya, maskin tam lomag hanya fiya fiya. 3Fagayo fag manga taw kagsyag kitonya, igfahaliyaw it fangayofan kito yadin Kiristo fangayofan ka maliyaw wa malayon. 4Fagayo ka gogali dwat iglaban yadi han Diyos manga togon. Kawa kaglaban han Diyos manga togon, tonya wa ka gogali dwat. 5Dapat tam twa kitay is Kiristo inbangkad hastay kaarakitay bomol manga ogali dwat fagayo. Idwa ha bali fangayofan dwat sa hanya. 6Ka fagaba wa kasadi sa hanya, idwag fadagos gogali dwat. Nyawa fakta kagfadagos gogali dwat, idya nalag in Kiristo hanggan idya kilala hanya. 7Angko manga anak, tam fag idwa gadayaan nyawa faktaw. Nyawa faktaw it manga ogali no maslong, maslong it fangayofan kito yadin Kiristo fangayofan. 8Kagfadagos gogali dwat, in Fandaya sakop, maskin gi yapdis fabagowanan, is Fandaya danwa gogali dwat. Ginya madi yabay, in Diyos Anak inbangkad wa hastay kaarakitay igfadwat in Fandaya manga ibolon. 9In Diyos manga anak idwag fadagos gogali dwat maskin in Diyos fangayofan sawa hanya. Hanyadwa syagan igfadagos has ogali dwat maskin hanya in Diyos wa anak. 10To kagfatohoyan kitay no fakta fag manga taw in Diyos manga anak hanggan no fakta fag manga taw in Fandaya manga anak. Nyawa faktaw kadwag fadagos gogali maslong, hanggan idwa galwasit fadwasay, bohonwan Diyos anak. 11To kantam donggon togon gis fabagowanan yapdi kitay, tam fag gadgalwasiyan. 12Tam fag idwa kiton Kain. Tonyan Kadwatan anak hanggan nafahatay it fadwasay. Kana mayon no nafahatay hanya, ham gayfan? Maskin in Kain manga ibolon dwat, dapat it fadwasay manga ibolon maslong. 13Maskin ngay, manga fadwasay, tam fag idwa kadolaw kastay is baba daga fag manga taw no kadwat iglag intam. 14Tam twa wa kitay tam nalin wan gis sakop kahatayan hawas sakop haboyagan, maskin tam galwasi intam manga fadwasay. Kadwa galwasi it fadwasay sa yapdis sakop kahatayan. 15Ka kadwat iglag it fadwasay, it fangayofan pariho has igfahatay taw. Tam fadi wadtwa kagfahatay taw idwa ha akwa haboyagan kadwa ha katabowanan. 16Kawas Kiristo nadisag it haboyagan kawa hantam kafiyan kagfalag hantam no kanat kahologan no galwasi orongan. Tam fag kitonya yadi, igdisag intam haboyagan kawa hantam manga fadwasay. 17Nyawa faktaw ka ha akwa ogbot, dapat natwa kitay it fadwasay ha kakorangan, ginyadwa kaawa hanya, kinday tonya fag taw, ham gayfan? Hanyadwa twag lwang kitay hanya galwasi fagaba in Diyos. 18Angko manga anak, fag bohondi intam bibig fwayong kitay tam galwasi manga taw, fag hanggan wantam ibolon kagfatohoyan kitay tam orongan wa galwasi manga taw. 19Tam no gogali kitonya, tam tomwa fiya fiya kitay tam sas sakop fakaoronganan, hanggan no san Diyos atobangan, tam idwa ha fakahawagon, 20nyawa intam sadili fangayofan nogsogat intam nomtoon, tam fag tohod kitay is Diyos madonong man intam fangayofan, kawas Diyos twa wa fagayo fag manga bagay. 21Angko manga fakilalaon, intam manga fangayofan nodwag sogat intam, tam idwa gadowan omakbang han Diyos, 22hanggan tomanggap nyawa kanantam sagadon maskin tam katanog it manga togon hanggan intam manga ogali maangay san Diyos faglagan. 23In Diyos togon hantam kitay tam fag syag hat Anak, kawas Kiristo Hisos, hanggan fag gadgalwasiyan, kito kat fwayong. 24Ka katanog fagaba in Diyos manga togon fagaba wa kasadi san Diyos, hanggan is Diyos kasadi sa hanya. In Diyos disag hantam it Falad kagfatohoyan hantam kitay is Diyos kasadi santam.

will be added

X\