1 HWAN 2

1Angko manga anak, hogsorat ha hayo kaarakitay ham idwa omogali dwat. Dapat ay, nyawa faktaw, no gibolon dwat, tam ha fagalan hantam Ama, kawas Kiristo Hisos ka maslong. 2Is Kiristo intam fangafiyan han Diyos kaarakitay igfaliyam intam manga naogali dwat, hanggan bohondi kitay hantam naogali dwat, hayadi was fagayo fag manga taw sadik baba daga. 3Ginya madi tam twa matohoyanan kitay tam kilala hanya tam no katanog it manga togon hantam. 4Bohagon odi kaglwang kitay hanya kilala yadin Diyos, dapat idwa katanog it manga togon. Ka fakaoronganan idwa sa hanya. 5Tam nomtanog ngat manga togon, tam orongan wa hosto no galwasi han Diyos hanggan tam twa kitay tam insadi hanya. 6Nyawa faktaw kaglwang kitay hanya kasadi fagaba san Diyos, it ogali fag kito yadi kan Kiristo Hisos ogali. 7Angko manga fakilalaon, bohonwa sadik togon bago kangko fagsoraton ha hayo. Ho golit ka mandi dan hayo donggon fag togon ham no bagon tiwala. Ka mandi hayo fag donggon hyabi fag barita. 8Nonman bilang sadik togon yadi bago kangko fagsoraton ha hayo, kawa tonya fag togon inorongan san Kiristo ogali, hanggan inlag yadi sa hayo manga ogali, kawa ka yawa orongan igyawa, hanggan ka marom iglagyo yadi wan. 9Kaglwang kitay hanya sas basad mayawa, dapat kadwat iglag it fadwasay, tonya sa yapdis basad marom. 10Ka galwasit fadwasay, sawas basad mayawa, idwa hagfatahid hanya has ogali dwat. 11Dapat ay, ka kadwat iglag it fadwasay, sa yapdis basad marom a, bilang waglahaw basad marom, idwa natwa it hadasogan maskin ka marom igfabota wa hanya. 12Hogsorat ha hayo, manga anak, Kawa hayo manga naogali dwat inliyam wan maskin ham galwasi in Hisos. 13Hogsorat ha hayo manga bokngan ama, Maskin ham kilala wa hanya ka danwa ha akwa gi yapdis fabagowanan. Hogsorat ha hayo manga ama bago, Maskin ham nadaog in Fandaya. 14Ho nasorat ha hayo, manga anak, Maskin ham kilala intam Ama. Ho nasorat ha hayo, manga bokngan ama, Maskin ham kilala wa hanya ka danwa ha akwa gis fabagowanan. Ho nasorat ha hayo, manga bago ama, Maskin hayo manga fangayofan marigon, In Diyos hampang fagaba sa hayo basad fangayofan Hanggan ham nadaog in Fandaya. 15Tam fag idwa galwasi ka manga ogali hanggan ka manga bagay ka gi odistay is baba daga. Ka galwasi ka manga bagay gi odistay is baba daga, idwa galwasi intam Ama. 16Maskin fagayo fag manga ogali istay is baba daga kitos mangag fasakop has bali fangayofan masayaon, ka maingliyon, hanggan ka ha takan kawa maakwa, tonya fag manga ogali idwa gintam Ama, nodwa kitay gi odistay is baba daga. 17Kastay is baba daga fag manga ogali hanggan wat manga fakasayaon fagayo, mamin di aban, dapat ka katanog in Diyos fasadan idwam liyam hanggan aban aban. 18Angko manga anak, kati wa fag masohod kaakbang wan ka katabowanan. Ham nadog kitay ha madaya fag Kiristo imbangkad aban. Ka orongan, aywan fag manga madaya fag Kiristo inbangkad wan. Yakanga tam twa wa kitay kaakbang wa ngay ka katabowanan fag kasohodan. 19Nyawa to fag manga madaya fag Kiristo danwantam manga ofod hyabi, tadwa orongan insadi santam. No orongan insadi santam, ya nangos fagaba gofod yapdintam. Ta naobon wantam tifonan kaarakitay imlag matohoyanan kitay, ta fagayo idwa orongan insadi santam. 20Dapat ay, ham ka natanggap ka Maliyaw fag Falad, yakanga ham fagayo twagdog. 21Yakanga hogsorat ha hayo, bohonwa kitay ka ham idwa natwa ka fakaoronganan, dapat kawa ham natwa wan hanggan ham twa kitay ka fakaoronganan idwag bohag. 22Fakta ka bohagon, ham gayfan? Ka bohagon ka mangag tangkod kitay is Hisos bohonwa ka Kiristo. To wan ka madaya fag Kiristo, ka kafang homilala in Diyos intam Ama hanggan it Anak. 23Ka kafang homilala it Anak, it Ama idwa yadi sa hanya. Dapat ay, nyawa faktaw kagbaya in Diyos Anak, it Ama sa yadi wa hanya. 24Ham fag fagaba matohodan sa hayo manga fangayofan ka hayo donggon gis bago katiwala ginan. Tam no matohodan ngay santam manga fangayofan kantam donggon gi yapdis bago bago, tam fagaba kasadi han Diyos Anak hanggan hat Ama. 25Hanggan in Kiristo natogon bato disagon hantam, kawa ka haboyagan idwa ha katabowanan. 26Maskin hogsorat ha hayo kati, ha akwa kasayag fatalang hayo. 27Dapat ay, sawa hayo in Kiristo disag, ka Maliyaw fag Falad, nyawadwa ha iba taw igfaadal hayo, ka Maliyaw fag Falad kagfwayong ha hayo fagayo fag bagay, hanggan it fwayong orongan wan, idwag bohag. Yakanga tam fag fagaba kasadi has Falad Maliyaw kito kat fwayong hantam. 28Maskin ngay, angko manga anak, tam fag fagaba kasadi san Kiristo, kaarakitay hanya nombangkad ya, tam idwa ha fagadowanon, yakanga tam idwa kaya homablang hanya. 29Tam twa wa kitay is Kiristo maslong, yakanga tam homilala ka mangan bali it manga anak, tam noglag ista ogali sonson yadi wa maslong.

will be added

X\