1 HWAN 1

1Ka hyami fagsoraton ha hayo kawa hanya ka danwa ha akwa, gi yapdis fabagowanan, ka Hampang kagdisag haboyagan. Mi nadog hanya, hyami mata nalag yadi, mi nabantay hanya, hanggan hyami gamat nasapkid yadi hanya. 2Tonya fag haboyagan indasog hastay a, hyami wa mata lagan. Yakanga migfaorongan ha hayo. Migfwayong ha hayo kitay, tonya wa fag haboyagan kadwa ha katabowanan, gi yapdis hyabi danwa sat Ama, ginya nafalag yadi ha hyami. 3Migfwayong ha hayo hyami lagan hanggan wa hyami donggon kaarakitay ham gamigosan ha hyami. Ginya ham im-aktom kito yadi hyami kansadi sa hanya, gamigosan hantam Ama hanggan hat Anak is Kiristo Hisos. 4Migsorat ha hayo kito, kaarakitay intam kasolongan idwa ha korang. 5Ka hyami donggon barita git Anak migfadog yadi ha hayo kitay, is Diyos ka yawa, idwa yadi ha marom sa hanya ngadi ogbot. 6Tam noglwang kitay tam kasadi gamigosan han Diyos, dapat tam gogali yapdi ka manga ogali gis sakop marom, tam igbalibad odi, idwa gogali ka fakaoronganan. 7Dapat ay, tam no gogali ka sakop yawa fag ogali, no kinday is Diyos sas yawa yadi, tam kasadi gamigosan ha sadi ha sadi, hanggan in Hisos, in Diyos Anak folot, igfalinay intam manga ogali dwat fagayo gintam basad fangayofan. 8Tam noglwang kitay tam idwa ha ogali dwat, tam igdaya odi intam sadili, hanggan idwa ha akwa santam ka fakaoronganan. 9Dapat, tam nogbaya han Diyos intam manga naogali dwat, hanyag faliyam tonya gintam, hanggan igfalinay gintam fangayofan fagayo fag kadwatan, maskin is Diyos maslong hanggan igfaanod it fwayong. 10Tam noglwang tam idwa ha naogali dwat, tam bilang nafabali kitay, is Diyos bohagon, hanggan it hampang idwa santam.

will be added

X\