1 KORINTO 9

1No kitay di aho fawa ha fagintawon domwag gis iba taw. Aho wa sadik Fandiya-Barita. Aho sadi ka nalag yadin Hisos intam Fon. Gwadi ham wa kat manga bohad kawa aho no gibolon intam Fon ibolon. 2Nyawa ka tiba taw igfabohag kitay, aho bohonwa Fandiya-Barita, dapat ham idwag fabohag. Ham wa kagfaorongan kitay aho kagfon intam it Fandiya-Barita. 3Aho no somagot has mangag solay angko, ho lomwang kiti, 4No kitay di, hami manga Fandiya-Barita no somagad fanganon, ngatay inomon gin Diyos Tifonan, fiya di. 5Fiya yadi nyawa mi tomaban hyami manga babay kito yadinda Pidro hanggan tiba Fandiya-Barita hanggan intam Fon manga fadwasay, ta nafaofod yadit manga babay. 6Hami lamang da Barnabi awkin ka nangos fag iglag hyami sadili fanganon, ham gayfan? 7Fakta fag sondalo kat sadili wa fanangdanon no gibolon, ham gayfan? Fakta fag taw kagtahom obas kadwa ha fakinabang it bohad? Fakta fag gano manga topa, manga hambing, kadwa ha fakinabang ginya, ngadig toris it afo soso, ham gayfan? 8Kangko fagfwayongon bohondi kitay gis manga ogali taw. Kitonya yadi ka Batasan Hodyo fwayong. 9In Mwisis togon iglwang yadi, Haw fag idwag bangkas ka oyong baka no dayog giling. Ka baka awkin kan Diyos fagisipon orongan, ham gayfan? 10Bohonwan. Kawa ngap tam is manga taw kan Diyos fagfwayongon. Kawa ka gadado hanggan kaggiling fag ha fagsyagon kitay hanya ha kahorayan kasta naani. 11Hami ka nananom ha hayo manga kafiyan has fangayofan bago baliwa, mahori wa dahol awkin ha hayo, hami no ha tanggapon gi hayo manga bagay malagan? 12Ka tiba taw igsagad yap madi ngap, bago man no hami, labi man nyawa mi managad yadi hayo. Nyawa kitonya, midwa nanagad hayo. Mi gagwanta wa fagayo kaarakitay ham idwa ha fabangdanan hyami ogali. Yakanga midwam bali hayo fasingyanan ham nodwa kasaya ka Fiya fag Barita kawa han Kiristo. 13Ham awkin idwa natwa kitay tagdisag di fanganon gis Fanimbaan-Dahol has manga gibolon sinya, hanggan tagdisag yadi kahorayan gista manga nasogba has mangag togbong sas fanogban? 14Kitonya yadi kagfon intam natogon kitay, ka mangag toltol ka Fiya fag Barita, fag lomag yadi it fangaboyagon ginya. 15Dapat hodwag faanod igsagad nyawa ginahin, nyawa hoglwang kitay maangay no kitonya. Hodwa yadig sorat ha hayo kitay ham disagan hayo togbong angko. Ngawa hanggan ho matay lonos, ho kasayag baya yapdi angko ogali kitay hodwa nanagad. 16Aho bohonwa kitay igfadaholon angko, aho nogtoltol ka Fiya fag Barita kati. Tonyantam Fon nafatohoyan angko bato ibolonon. Isyay wan, aho nodwa bomarita. 17Aho nogbarita nongko di sadili fangayofan, aho ha fagsyagon ta tomangdan arangko. Dapat ahog faanod odi ka ibolonon kantohoyan hangko. 18Kana arangko tanggapon, ham gayfan? Angko tanggapon kiti lamang, ahog faadal ka Fiya fag Barita, idwa ha fagtanggapon tangdanan, nyawa fiya di aho nogsagad madi ngap ka fiya hangko. 19Aho bohonwasta nasali sogowan, dapat aho natikis wagfabali angko ista sogowan has fagayo, kaarakitay aywan man angko tabanon hasamtiwala. 20Aho no gofodan has manga Hodyo, hogfaangay yadista ogali Hodyo, kaarakitay ho fatiwala hanya. Nyawa aho bohonwa sakop Batasan Hodyo kati, aho no gofod ka kitonya fag manga taw, hogfasakop yadi has Batasan Hodyo kaarakitay ho fatiwala hanya. 21Ginya madi, aho no sawas manga bohonwa Hodyo, kadwag fasakop has Batasan Hodyo, ho bilang yadi bohonwa Hodyo, idwag fasakop has Batasan Hodyo, kaarakitay ho fatiwala yadi ka bohonwa Hodyo. Bohonwa kitay hodwa katanog in Diyos togon, aho ngap igfasakop yadin Kiristo togon. 22Aho no gofod yadi has manga magomo, ahog faangay yadi. Hogfaangay di yadi has taw fagayo kaarakitay, nyawa kindawan, ngadi tiba, fag imbawi wan. 23Ho gibolon to fag manga bagay fagayo fagayo kawa has Fiya fag Barita, kaarakitay aho ha kahorayan yadi git kafiyan. 24Tam twa wa kitay ta nogsaringgonaan, sadi lamang ka ha tanggapon fasalamat, nyawa fagayo pariho igdalandan. Yakanga tam fag marigon nogdalandan kaarakitay tam ha tanggapon fasalamat. 25Fagayo kagfayayom igsaringgonaan idwag falabi it habilogan fakasayaon nyawa kana, maskin kasaya tomanggap sangbaw ka ngalay kadwat. Dapat kantam fakasayaon fag sangbaw kawadwa kadwat. 26Yabay, ahog dalandan ha sadik hadasogan matohoyanan, aho bohonwa kitay bilang odig sontok has bagyo, idwa ha iktanon. 27Hogfarigon angko habilogan fagaba a, hodwag falabi angko fakasayaon nyawa kana kaarakitay aho nomsagaya wagtoltol has tibak taw, bohonwa aho kadwa ha tanggapon.

will be added

X\