1 KORINTO 7

1Kati yabay ho somagot ka hayo nasorat hangko fag manga bagay. Fiya madi ngap ka ama nodwa gakbang has ina. 2Dapat kaarakitay idwa hagfabayowan, fiya no kafod sadili babay, sadili indogan. 3Ka talsawa fag gogali ka maangay ha sadi ha sadi. 4Maskin bohondi ka ina, dapat it indogan kagbahala hat babay habilogan, hanggan bohondi ka ama, dapat it babay kagbahala hat indogan habilogan. 5Ham fag idwa kwangit hayo habilogan ha sadi ha sadi, no bohonwa hayo togonan kitay, gis nanya fag masohod ham manaramanan yapdi kaarakitay mandarangin. Nomsagaya gis nanya, ham fag gofodan ya, no kinda mandi katfagonan ham no gofodan, kaarakitay is Fandaya idwag faloksowan hayo has dwat maskin ham idwa gagwanta hayo sadili. 6Bohonwa kitay hoglwang fagayo fag ha babay, fag ha indogan, dapat fiya di no ha akwa wan. 7No aho di kaglwang, fiya nangos fagayo no kito yadingko. Dapat is Diyos kagfahafod it disag hantam igsadig sadi, idwa myasa kitonya. 8Angko fagfwayongon has mangadya ha indogan, idya ha babay, hanggan has manga ina balo kitay, fiya nangos ta no kito yadingko, ahodwam dowa, hodwa ha babay. 9Dapat ta nodwa gagwantat sadili, ta fag ha babay di, fag ha indogan di, fiya man nodwa kanbang fagaba. 10Angko togon has manga talsawa, no kitay di, bohonwa aho kagfon kampang kitonya, kagfon intam kagfwayong, ka ina fag idwa gobon it indogan. 11Dapat, ka ina no omobon it indogan, fag idwa somayak tiba ama domwag, no bonwa kitay goli ya hat sadili indogan. Ka ama fag idwa yadi gobon it babay. 12Aho noglwang ha hayo tiba, bohonwantam Fon kagfon kampang kitonya, aho odi, hoglwang kitay, sadik ama kantiwala no ha babay kadyan tiwala, dapat kawilit indogan, ka ama fag idwa gobon. 13Kitonya yadi, no ha sadik ina kantiwala, dapat it indogan idyan tiwala, it indogan no kawili yapdi hanya, ka ina fag idyadi wa gobon. 14Maskin kawat babay kantiwala intohoyan han Diyos, kalafit yadi wat indogan nyawa idyan tiwala. Hanggan kawat indogan kantiwala intohoyan han Diyos, kalafit yadi wat babay, nyawa idyan tiwala. Nodwa kitonya, ista manga anak idwa fiya san Diyos faglagan. Dapat ka orongan, ista manga anak ka maangay wan san Diyos faglagan. 15Ka indogan, ngatay babay kadyan tiwala no kasaya wa gobon, nyawa omobon wan. Kadyan tiwala no naobon wa kitonya, ka indogan ngatay babay kantiwala, idwa ha fagayfanon, maskin in Diyos wa fangayofan kitay, tam fag gogali ka mahoway. 16Dapat ay, ham manga ina kantiwala, ngandayo is Diyos bomawi hayo manga indogan kawa ham it fakabotongon. Hanggan ham manga ama kantiwala, ngandayo is Diyos bomawi yadi hayo manga babay, kawa ham it fakabotongon yadi. 17No kinda mandi hyabi intam Fon nadisag hantam, hanya no nafatawag intam, tam fag kitonya mandi. Kitonya wan angko togon has fagayo fag manga Tifonan. 18Ka sadik taw no danwa toli is Diyos no nafatawag hanya, fag idwa kasayag faoman tonya. No danwadya toli, fag idwam toli. 19Idwa ha kinday nyawa toli, nyawadwan, dapat, ka fiya, fag katanog in Diyos manga togon. 20No kinda mandi ka nogbanwan is Diyos no nafatawag intam, tam fagayo fag kitonya mandi. 21Is Diyos no nafatawag hyamo, haw awkin danwan bali ista nasali sogowan, haw fag idwa gisip tonya. Dapat hyamo fon nogfaangay digfalahaw hyamo, haw fag galin wa gi hanya. 22Maskin intam Fon nogfatimbang ka danwasta nasali sogowan fag manga taw, hanya kabali bilang wad bohonwasta nasali sogowan sat faglagan kagfon intam. Kitonya yadis Kiristo nogfatimbang ka bohonwasta nasali sogowan, tambali yadin Kiristo wa sogowan kawas Diyos nasali. 23Is Diyos nabayad wan, nasali yadintam. Tam fag idwa kabali ista nasali sogowan odi manga taw. 24Yakanga manga fadwasay, nyawa kinday tam nogbanwanan, is Diyos no nafatawag intam, tam fag kitonya mandi no gofodan in Diyos. 25No kadi has manga idwa ha indogan, idwa ha babay, hodwa ha fagtogonon ha hayo gintam Fon. Dapat, kawa kagfon intam in-awa angko, honbali yadi sadik matanogon hanya. Yakanga ho fadog yadi ha hayo angko sadili fangayofan. 26No kito wa kati fag mahori fag kasohodan, no aho di kagdog, no kinday hayo lagan kati, fag idwag faoman. 27Haw awkin ha babay? Fag idwa kasaya gobon. Hadwa aw ha babay? Fag idwa garonganon igligaw. 28Bohonwa kitay haw no bomabay, haw naibolon dwat, hanggan sadik dayaga no omindogan, fiya di. Dapat ham no ha babay, ngatay indogan, ham lomag manga mahori kati istay is baba daga. Kangko fakasayaon ham bomaybay tonya fag manga mahori. 29Angko manga fadwasay, to kangko bato lwangon, sayok di intam sawad fangaraw kantohoyan hantam. Yakanga gis kati ginan ka ha babay, it babay fag idyapdig falibang it indogan, hanya no gibolon intam Fon ibolon. 30Ka manga karongkot, fag idwa kalibang goraw, ka manga kasolong fag idwa kalibang kasolong. Ka mangag sali fag idwa kalibang igsali. 31Hanggan ka mangag fasadsaliyan yapdi istay is baba daga, fag idwa kalibang hanya baliwa. Maskin to fag daga hanggan fagayo fag manga ogali istay imliyam wa aban. 32Nangos angko fakasayaon, ham fag idwa ha fagayfanon istay. Ka ama kadwa ha babay, nontam Fon ibolon it fagalibiton, intam Fon bomaya wa hanya. 33Dapat ay, ka ama ka ha babay, ka manga bagay istay is baba daga it fagalibiton kaarakitay it babay bomaya hanya. 34Kawa kitonya igfabokngan dit fagayfanon. Kitonya yadi ka ina kadwa ha indogan, ka manga bagay hantam Fon kat fagalibiton maskin kasayag fatohoyan it habilogan hanggan fangayofan hantam Fon ibolon. Dapat ka ina ka ha indogan, ka manga bagay istay is baba daga it fagalibiton maskin kasaya kitay, it indogan fag bomaya hanya. 35Maskin hoglwang kitonya, ho kasayag togbong hayo, bohonwa kitay igfahoriyan hayo. Ho kasaya nangos igtaban hayo has maangay fag ogali, kaarakitay ham somyagan omibolon mahogod intam Fon ibolon, maskin idwa hagfalibang hayo. 36No kadi ha manga togonan kadwan tonglos, ka anahan no gayfan bomohag hat fagalwasiyon, hanggan nodwa kaagwanta sat sadili, maskin gwayan wa kasaya hanya fag ina, ka fiya, tam fag fadagos wa tonya fag dowa, maskin danwat togonan, idwa ha dwat no kitonya. 37Dapat fagayo dowa, not fangayofan idwa bomabay, idwa omindogan, kafiyaon no kitonya, no matohoyanan wat sadili fangayofan, bohon wasta napilit, no gagwanta di nga ngap it sadili. 38Kadwag faaywanon hampang, fiya madi ngap kagbabay hat togonan, dapat fiya man inya, ta no pariho gagwantat sadili, idwag babay, idwa yadi gindogan. 39Ka ina ka ha indogan fag bilang wa salawid loka hat indogan, it indogan no boyagan yapdi. No kawa kitay it indogan natay wan, fiya di nyawa lomigaw iba ama, nyawa faktat fakasayaon, dapat ay, fag hamandis mangam tiwala. 40Dapat nongko di fangayofan, nodwa lomigaw yap it indogan, hanya labi wa bomaya, hanggan no aho di kagdog, in Diyos Falad sa yadi wangko.

will be added

X\