1 KORINTO 6

1Nomtoon insadi sa hayo kahori ha sadik fadwasay kantiwala. Ham awkin idwa kaya domiya tonya has idwan tiwala kagtalinga hampangan? Gwadi fag ha mandis manga taw kantohoyan han Diyos nogdiya hayo hampangan. 2Ham awkin idwa natwa kitay, ka manga taw kantohoyan han Diyos kambali aban manga fangabaya kastay is baba daga fag manga taw? No tam kambali fangabaya kastay is baba daga fag manga taw aban, tam idwa awkin somyagan igfatabo hampangan kati, no ogbot di fag manga bagay? 3Ham awkin idwa twa kitay tam kambali fangabaya has manga anghil aban? Labi man tam somyagan fatabo ka mangastay is baba daga fag manga hampangan. 4Yakanga, ham no ha manga hampangan, kana mayon ham nogdiya yapdis manga taw kadyan tiwala, kadwa ha kwinta san Diyos Tifonan? 5Ham awkin idwa twa kayas taw? Sa hayo Tifonan idwa aw ha akwa ngadi sadi ka madonong igfatabo hampangan manga fadwasay pariho intiwala? 6Dapat ay, ham no pariho intiwala kahodhoriyan, fadwasay gayat has fadwasay, saya ngadista faglagan mangadwam tiwala. 7Kawa ham tiba gadgayatan ka sadik bagay kagfadwat hayo Tifonan. Gwadi fiya man tam no gagwanta di no hagfahoriyan intam, nyawa tagdaya intam. 8Dapat ay, ham mandi kagfahoriyan hayo manga iba. Ham igdaya yadi, hanggan ka hayo fagdayaon ka mandi hayo manga fadwasay. 9Ham awkin idwa twa kitay ka ha manga ogali dwat idwam ofod san Diyos sakop? Ham fag idwa gadayaan hayo sadili. Ka gogali dwat has ka taw, ka mangag syag has iba karigonan, ka mangag fabayowan, ka bilang wa talsawa kapariho ama, ngatay kapariho ina, 10ka manga fangnahaw, ka manga masayaon, ka mangag lango, ka mangag fadwat igdog, hanggan ka mangag daya, ka kitonya fag manga taw idwam ofod san Diyos sakop. 11Hyabi ongay, tiba santam kitonya yadi, dapat ay, kati, san Kiristo Hisos, kagfon intam, sat ngayan karigonan, hanggan san Diyos Falad, tam inbali malinay, intohoyan han Diyos hanggan nangafiyan wa hanya. 12Ha akwa taw kaglwang, Fiya di aho no gibolon nyawa kana. Ala, no kitay di, dapat tibak ogali idwag togbong. Aho syagan yadig fwayong, Fiya di aho no gibolon nyawa kana, dapat ho dayo igfasakop nyawa haday fag ogali karigonan. 13Ka tibag lwang, Ka fanganon ka odi kitay has basad tiyan, hanggan ka tiyan intalaga has fanganon. No kitay di orongan tonya. Dapat is Diyos pariho domwat fagayo dowa aban. Intam habilogan idwan talaga hasagfabayowan baliwa, dapat intalaga hasagfon intam, hanggan intam Fon intalaga hantam habilogan. 14Is Diyos nafaboyag ya intam Fon habilogan, hanggan it karigonan yadi ka faboyag ya intam manga habilogan aban. 15Ham awkin idwa twa kitay tam manga layonan san Kiristo habilogan? Aho awkin bomol nangos in Kiristo habilogan manga layonan, ginyag fabali tonya manga layonan sas habilogan ina famabayowan? Nyawa ginahin, bohonwa aho ka omibolon kitonya. 16Ham awkin idwa twa ka gofod kitonya fag ina kasadi sinya fag ina hat habilogan? Maskin in Diyos kasoratan iglwang, Tonya fag dowa imbali sadi di. 17Dapat ay ka kasadi hantam Fon, it fangayofan kasadi yadi hantam Fon fangayofan. 18Tam fag idwa gogali dwat has ka taw. Nyawa kana kasta ogali dwat tiba, idwa hasta sadili habilogan nogfahoriyan, dapat nogfabayowan hayadi wat sadili habilogan nogfahoriyan. 19Tam awkin idwa twa kitay, intam habilogan ka Maliyaw fag Falad fanimbaan? Hanya kantam natanggap gin Diyos hanggan hanya maoliyanan santam habilogan? Bohonwa kitay tam kagfon intam sadili habilogan. 20Is Diyos nasali intam, nabayad wan. Yakanga intam habilogan ogali fag falag in Diyos kafiyan.

will be added

X\