1 KORINTO 5

1Bohonwa bohag, aho ha donggon barita kitay, insadi sa hayo dwat wa dahol it naogali, kawa hanggan dit ama babay, igtaban wan. Gwadi manga taw nyawa idyapdi katiwala in Diyos idyadi wa ha kitonyak fabayowan. 2Ham ha takan ya ngadi. Gwadi ham fag twa kaya, fag karongkot wan. Ham fag domayo gi hayo Tifonan ka gogali kitonya. 3Nyawa ahodwas nyamo hayo, angko fangayofan gofod yadi hayo, yakanga ho bilang dis nyamo hayo. Kawa kitonya, san Hisos intam Fon ngayan, ho nafatohoyan it fadosaan ka gogali kitonya. 4Ham fag matifonan, hanggan angko fangayofan gofod yadi hayo, ginya san Hisos intam Fon karigonan, 5ham faanowan yap han Satanas tonya fag taw, kaarakitay it habilogan imhori, ginya madi, it falad ngan aram bawi gis nanya fag sirang is Hisos kagfon intam nombangkad ya. 6Idwa fiya ham nogfataka. Ham awkin idwa twa kitay, nyawa ogbot di fag famadahol tinapay, igfalafit sadi wak dahonya longgong tinapay? 7Ham fag danwag bol ka daanon fag famadahol tinapay, kawa ogali dwat, kaarakitay ham imbali kitos sadik longgong tinapay bago, kadwa ha aktom famadahol. Ka orongan kitonya wa tam, maskin is Kiristo kantam fangafiyan Anak Topa indisag wan, kito kasta nasogba topa ta nogtohod ka Fanohodan Nagsagayan hyabi. 8Yakanga kati tam fag manohodan ya ngay, dapat bohonwa kitay ha tinapay ka ha aktom famadahol daanon, ka dwat fag ogali hanggan ibolon, dapat kawa ha tinapay kagfahalimbawa ka fangayofan malinay hanggan orongan, idwa ha aktom famadahol kagfalafit kadwatan. 9Hoglwang sangko sorat gona kitay, ham fag idwa gamigosan has mangag fabayowan. 10Kangko fagfwayongon bohonwa ka mangadwan tiwala fag manga taw kagfabayowan, manga masayaon, mangag nahaw, ka manga ha fagsyagon iba karigonan, maskin tam nostay yapdis baba daga, tam idwa syagan kabokod is taw kadyan tiwala ka gogali kitonya. 11Dapat kangko fagfwayongon, tam fag idwa gamigosan has manga taw kaglwang, Ala, hontiwala wan Kiristo, dapat hanya igfabayowan yapdi, masayaon, ngatay ka manga iba karigonan it fagsyagon, ngatay igfadwat igdog ka sadi, ngatay iglango, ngatay ignahaw. Ngadig sayowan, tam fag idwag sayowan kwan ka kitonya fag taw. 12Hodwa ha bahala gato kadyan tiwala han Kiristo. Is Diyos ka bahala gato has taw. Bohonwa awkin tam ka bahala gato ka san Diyos Tifonan fag manga taw, ham gayfan? Kiton Diyos sorat iglwang, Ham fag dayo gi hayo Tifonan ka hayo ofod ka gogali dwat.

will be added

X\