1 KORINTO 4

1Ka fiya fag kito ka hayo fagisipon kawa ha hyami kitay, hami in Kiristo manga fangibolon kat nafaano in Diyos manga madolaw fag bagay kadya nafadog has taw hyabi. 2Kasta fon no ha nafaano hat fangibolon, it fangibolon fag gano fiya fiya tonya. 3Idwa ha kana sangko nyawa ham somolay angko ibolon, nyawa fakta fag fanalinga hampangan ka somolay. Nyawa aho, ahodwa yadi somolay angko sadili ibolon. 4Hodwa ha fagtagahon sangko basad fangayofan. Dapat ay, nyawa hoglwang kitonya, bohonwa kitay ahodwa ha ogali dwat. Intam Fon ka somolay angko ogali. 5Tam fag idya ha faglwangon ngatay fiya, ngatay dwat, ista ogali, intam Fon nodyam bangkad. Aban, intam Fon bago falag ka bilang yapdi matagowan basad marom, hanggan falag yadi wa aban, igsadig sadi, ka manga fakasayaon taw kadyan dog yapdi. Gis nanya fag masohod aban, is Diyos mamasayagdog no kinda ka fiya hantam igsadig sadi. 6Angko manga fadwasay, hami da Apolos kangko nafabali halimbawa kawa ha hayo manga fakinabang, kaarakitay ham tomohod kasta togon it kahologan noglwang, Fag idwag sagaya kansorat sas Kasoratan. Fag idwag fadaholon ka sadik taw, ginyag yod ka tiba. 7Kinda ham no fiya man ka tiba, ham gayfan? Gwadi bohonwa awkin in Diyos wa disag ha hayo fagayo fag kadonongan ka sa hayo? No kitonya, kana mayon ham nogfataka yapdig dog, bilang wadwan disag ha hayo? 8Ham mangharaw hosto wan kati, ham gayfan. Ham maakwa wan. Ham mangharaw inbali manga gorangon, ham fawa nafaofod hyami. Kafiyaon nangos ham nonbali manga gorangon orongan, kaarakitay hami yadi fag imbali gorangon, hayo yadi manga ofod. 9Maskin no aho di kaglag, is Diyos igfalag hyami has taw, hami manga Fandiya-Barita, sas ginanan ginanan odi, idwa kitos taw ik fiya, kitos manga taw kantohoyan has kahatayan, ista odi fagdoroon istay is baba daga, manga anghil hanggan manga taw fagdoroon. 10Kawa hami galwasi in Kiristo, manga taw gayfan hami paong paong odi, dapat anod, ham madonong wan, kawa han Kiristo baliwa. Hami magomo, ham ka manga marigon. Ham kasta fagfasayaon igdog, hami kasta fagyodon. 11Hanggan wa kati fag masohod, mi kalonos ya, kainom ya, ka odi kitay idwa malobasan. Ta hanggan wagbakbak hyami, midwa yadi ha oliyanan. 12Hami gibolon hanggan wa kagayamonan kaarakitay hami ha fangaboyagon yadi. Migdarangin kawa has mangag yod hyami. Mi gagwanta odi ta nogfahoriyan hyami. 13Ta nogyod hyami, migsagot is taw mayan mayan odi. Hanggan wa kati, ta noglag hyami, hami bilang odi manga boga okason, kawa hami idwa kitos taw ik fiya sadi wak dahonya baba daga. 14Bohonwa kitay ahog tikis wagfahaya hayo, aho nogsorat kito, dapat kaarakitay igfaadal hayo, kawa ham bilang wangko manga fagalwasiyon fag manga anak. 15Nyawa kayodak libo ka gano hayo, idwa ayo ka hayo pinagkaama. Ahon bali kwinta wa hayo ama ham nogsyag in Kiristo Hisos, kawa aho ka natoltol ha hayo ka Fiya fag Barita. 16Yakanga hogfaaronganon ha hayo kitay, fag aho ka hayo fagtoladon. 17Kawa kitonya, hogsogo has nyamo hayo in Timotiyo, angko fagalwasiyon hanggan matanogon fag anak santam Fon. Hanya kagfaayfan hayo kangko manga ogali sangko haboyagan kansadi san Kiristo Hisos, manga ogali kangko fagfaadalon sas manga Tifonan fagayo, nyawa siday. 18Ha akwa sa hayo tibag fatakag dog maskin ta gayfan hodwam bangkad has nyamo hayo. 19Dapat ay, nontam Fon wa kafangayofanan, hombangkad ya ngalay has nyamo aban. Ho bomantay ngatay syagan gibolon ngay ta no kampang kitonya ayo ayo. 20Maskin in Diyos sakop kafiyan bohondi baba odi bibig, fag hanggan wat kadonongan kamlag sat ogali. 21Kana nangos ka hayo fakasayaon aho nombangkad has nyamo hayo, ngatay aho fag ha famakbak, ngatay fag imlag kitay ho galwasi hayo hanggan mahoway di angko fangayofan?

will be added

X\