1 Yabay, kawa has manga togbong hantam manga fadwasay sas sakop Hodiya. Ham fag kitonya yadi ngap kangko nafwayong has manga Tifonan sas sakop Galasya. 2 Sas sirang gona sa sadik simba, ham fagayo, igsadig sadi, fag fabokod fagaba hayo bato disagon, no dahoday hayo bolay kwarta gis nanya fag masohod. Fag matifonan wa tonya, kaarakitay aho nomdasog is nyamo hayo, tam fawa ha fagtoltolon hanya baliwa. 3 Aho nomdasog is nyamo hayo, ho domisag sorat ha hayo manga nafili fag manga taw ka domiya has Hirosalim hayo disag. 4 No fiya kitay, aho fag hanya yadi has Hirosalim, ho tomaban hayo manga nafili fag manga taw. 5 Ho domagos has nyamo hayo, aho no giwas sakop Masidonya, kawa ho kasaya yapdi domalan sinya. 6 Ho domogay yapdi ogbot is nyamo hayo, balis faginan ka fangaraw, kaarakitay ham farigon angko fangayofan, aho nomlahaw ya domwag, no hada angko bato hadasogan. 7 Angko fangayofan, aho fag domogay yapdi ogbot is nyamo hayo aban. Hodwa kasayag dalan lamang is nyamo, kagfon intam nogfaangay. 8 Dapat angko fangayofan ho domogay yapdistay sas banwa Ifiso balis sirang Pintikostis, 9 kawa aywan kagtalinga fagabastay, nyawa aywan yadi kagfadwat igdog. 10 Is Timotiyo nombangkad is nyamo hayo, ham fag maofod hanya fiya fiya, kaarakitay it fangayofan idwa kabalaw. Is Timotiyo intam Fon fangibolon yadi kitongko. 11 Ham fag idwag yod hanya. Ham ngap togbongan hanya kaarakitay masolong wat fangayofan no mwali hastay, maskin hami, aho hanggan intam manga fadwasay, mafanayan yadi hanya. 12 Nontam man fadwasay, is Apolos, ho nafaaronganon kitay hanya fag gofodan yadi intam manga fadwasay kati manabang has nyamo hayo, dapat, is Apolos idyam bangkad is nyamo kati. Hanya aban manabang, nodwa ha fakalibangon. 13 Tam fag matagahan, tam fag idwa gadowan nogsyag in Diyos. Fag maisog intam fangayofan, fag maganit han Diyos. 14 Nyawa kana kantam ibolonon, fag gibolon fagayo maskin tam galwasi in Diyos hanggan has manga taw. 15 Angko manga fadwasay, ham twa kitay in Istifanas talanahan ka bago bago intiwala sas sakop Ikaya. Talanahan nafatohoyan it sadili kitay hanya ka tomogbong fagaba ka manga taw kantohoyan han Diyos. 16 Hogfaaronganon ha hayo, manga fadwasay, ham fag fasakop yapdi ka kito yadinda Istifanas, hanggan it manga ofod kadwag fagomon gogali fiya. 17 Hogbaya waglag inda Istifanas, da Fortonato da Akaiko nondasog hastay, nyawa ham idwa nasyagan igsabang angko. 18 Tonya fag tolok ama ka nafarigon yangko fangayofan no kinday ta nogfarigon yadi hayo. Ham fag baya wan ka kitonya fag manga taw. 19 In Diyos manga Tifonan sas sakop Asya gwas hayo. Da Akila da Pirisila hanggan intam manga fadwasay, kagtifonan sat balay, gwas yadi hayo santam Fon ngayan. 20 Intam manga fadwasay fagayo fagayo istay gwas yadi hayo. Tam nogladlagan, tam fag badbayaan yadi, kawa tam manga dowasay san Kiristo. 21 Ahos Pablo, angko sadili gamat kagsorat ha hayo, kinday ham sinya? 22 Kadwa galwasi intam Fon, fag is Diyos ka mamatohoyan has kadwatan. Marana Ta. It kahologan santam sanglitan, bilang igdarangin, Haw kagfon hyami, fag kabangkad wa ngay. 23 Ham nangos fag domog kitay is Hisos, kagfon intam, mahoway ha hayo fagaba. 24 Ho galwasi hayo fagayo fagayo san Kiristo Hisos ngayan.
