1 KORINTO 15

1Angko manga fadwasay, yabay kati hogfatohod ya hayo kangko fagtoltolon ha hayo Fiya fag Barita, ka hayo natanggap kanbali hayo fag ganitan has katiwala baliwa. 2Is Diyos kagbawi hayo gi wangko nafadog hampang ha hayo, ham nodwag fasigpala ka hayo donggon, no bohonwa kitay idwa ha kahologan ham nontiwala. 3Maskin kangko donggon ka mahalga man has fagayo, kangko nafwayong ha hayo, kawas Kiristo natay kawantam manga ogali dwat, kito kansorat sas Kasoratan. 4Ginyan lobgob wan, hanggan inboyag ya sas fatolo fag sirang, kito kansorat, 5hanggan nafalag han Pidro, ginya has Safolo ha Dowak ama. 6Ginya madi hanya nafalag it sadili ha mandis manga fadwasay iglabi 500 ka matifonan sinya. Nyawa kitay tonya tiba natay wan, ka fakaaywanan boyagan yapdi hanggan wa kati. 7Ginya nafalag yadit sadili han Santyago, ginya bago di has fagayo fag manga Fandiya-Barita, ta no matifonan. 8Ginya madi, no dogay, is Hisos nafalag yadi hangko, nyawa aho bilang wa anak kansagaya bohonwa sat kasagayan, bilang odin loskos. 9Ahodwa kitos iba Fandiya-Barita ik fiya. Idwa maangay ta nogngayan angko sadik Fandiya-Barita, maskin hyabi aho nafahoriyan in Diyos Tifonan. 10Dapat kawan Diyos malooy fag kahowayan sawangko, ahonbali kito ka kati. It disag malooy fag kahowayan hangko idwa yadin bali idwa ha kahologan. Aho bohondi kito ka tibak Fandiya-Barita no kogodan igbarita. To kawan Diyos malooy fag kahowayan sawangko, bohonwangko sadili fagsyaganon. 11Yakanga nyawa aho, nyawa ka tiba kagbarita, kitonya yadi ka hyami fagfaadalon, tonya yadi ka hayo fakatiwalaon. 12Yabay, hami nogfaadal kitay is Kiristo inboyag ya, kana mayon tiba sa hayo noglwang ka manga natay idwam boyag ya aban? 13Halimbawa ka natay no orongan wadwa abam boyag ya, is Kiristo idwa yadin boyag ya. 14Is Kiristo nodwan boyag ya, hyami fagfaadalon has taw idwa ha kahologan, idwa yadi ha kahologan ham nomtiwala. 15No kitonya, hami in Diyos odi manga saksi bohagon, maskin migfaorongan kitay is Diyos nafaboyag ya in Kiristo, kadwa orongan, ka manga natay nangos nodwam boyag ya domwag. 16Ka manga natay nodwam boyag ya, is Kiristo fawan boyag ya domwag. 17Is Kiristo nodyan boyag ya, idwa ha kahologan tam no katiwala, hanggan tam idyan bawi gintam manga ogali dwat. 18Yabay, is Kiristo nodwan boyag ya, fagayo ka natay gona, kansadi han Kiristo, hawas kadwatan. 19Intam fagsyagon no ka odistay lamang fag baba daga fag haboyagan, isyay wan, tam ista fakaawaon, bohondi kito ka tiba. 20Dapat ay, ka orongan wan, is Kiristo inboyag ya, ka bilang bohad gona gis manga natay, kagfatohoyan kitay ha akwa yadi aban. 21Maskin no kinday gi sadik taw ha kahatayan, kitonya yadi gi sadik taw ha haboyagan sas dayo kahatayan. 22Maskin no kinday fagayo fag manga taw matay, kawa fagayo insadi san Adan hasokfonan, kitonya yadi, fagayo imboyag ya nonsadi san Kiristo. 23Dapat ay, fagayo imboyag ya no ginahin fag masohod is Diyos nogfatohoyan. Bago bago is Kiristo ka gona man has fagayo, ginya madi ka dan wansadi san Kiristo, imboyag ya gis nanya fag masohod is Kiristo nombangkad ya. 24Ginya madi, ka katobowanan nomdasog, is Kiristo nomtabo wagdaog fagayo fagayo kagsakop manga taw, hanggan kagbahala hanggan ka karigonan fagayo istay is baba daga, hanya fasakop fagayo fagayo han Diyos, intam Ama, kambali hari has fagayo fagayo. 25Maskin fag is Kiristo yapdi kaghari, is Diyos nodyapdi nadaog it manga kalaban hanggan nodya nafasakop fiya fiya fagayo fagayo han Kiristo. 26Ka kahatayan ka goyan goyan fag kalaban kamdaog hanggan imliyam wan, 27kito kansorat sas Kasoratan, Is Diyos igfasakop fagayo fagayo fag manga bagay ha hanya. Dapat ay, noglwang kitay fagayo fagayo fag manga bagay, kadog wa kitay is Diyos idyapdin sakop sinya kawa hanya kagfasakop fagayo fag manga bagay han Kiristo karigonan. 28Ginya madi fagayo no nafasakop wa han Kiristo, hanya, in Diyos wa Anak, ka fasakop han Diyos karigonan, ka nafasakop fagayo fag manga bagay han Kiristo, kaarakitay is Diyos wa kagfon wa fiya fiya fagayo fagayo. 29Ka manga natay nodwam boyag ya, kanat kahologan ta nogfatogna kawa has manga natay? No orongan wan ka manga natay nodwam boyag ya, kana mayon nogfatogna yapdi kawa hanya, ham gayfan? 30Hanggan aho yadi, kana aho noglaban yapdi ka madala sirang sirang? 31Angko manga fadwasay, sirang sirang hodwa twa ngatay ho matay wa araw. Hoglwang kitonya kawa hogfasayagdog hayo, kawa tam insadi san Kiristo Hisos, kagfon intam. 32Kanat fakinabang hangko, ham gayfan, aho no taw lamang kadwam boyag ya, aho nonsayango has manga maisog fag kalaban istay sas banwa Ifiso? Ka manga natay nodwam boyag ya, fiya man aho nogfaangay ista fwayong kitay, Tam fag kasolong yap kwan, manga ginom odi, No marom tam ngan wa matay. 33Tam fag idwa gadayaan, Intam manga ofod no dwat, intam manga ogali imbali yadi dwat. 34Tam fag ha fangayofan wan. Fag domayo ka ogali dwat. Tiba sa hayo igfalamang yapdi, idya kilala no kinday is Diyos orongan. Hoglwang kitonya kaarakitay igfahaya hayo tiba. 35Ngatay ha gintaw kitay, Kinday ka manga natay nomboyag ya domwag? Kindat habilogan gis nanya? 36Paong paong ka gintaw kitonya. Kantam natanom binhi nodyan boyok, idwa ha tomobo bago. 37Binhi yapdi kantam natanom, ngatay bolhog tirigo, ngatay tiba fag binhi, bohonya kitay dahol it fon. 38Is Diyos kagdisag habilogan hanya fag binhi no kinday kat nafatalaga, has manga binhi it habilogan bokod bokod no kinday nomlangba. 39Kanhalig hayopan boyagan idwa myasa kitonyat anit. Ka taw bokod it anit, bokod yadi ka anit hayopan. Bokod ka manok, ha olad, bokod ka oyang it anit. 40Ha akwa yadi manga habilogan ka sas banwa sam tongod, ha akwa yadi manga habilogan istay sas baba daga. Ka habilogan sas baba daga bokod it kafiyan has kafiyan manga habilogan sam tongod. 41Ka yawa myanit bokod, bokod yadi ka yawa magdanon. Ka yawa fanggasan bokod, kawa sadik fanggasan idwa kito ka sadik fanggasan it kafiyan. 42Kitonya yadi ka manga taw nomboyag ya domwag. Ka habilogan kanlobgob kaboyok wan, dapat ka habilogan kamboyag ya ginya, idwam boyok nyawa ginahin. 43Nonlobgob wan, idwa fiya kalag, fawa homimot, dapat nomboyag ya, fiya kabantay a, marigon mandi. 44Ka habilogan kanlobgob ka sas baba daga fag habilogan, kamboyag ya ka man has banwa sam tongod fag habilogan. No kinday ha akwa habilogan istay sas baba daga, kitonya yadi ha habilogan mandi sam tongod. 45Kito kansorat sas Kasoratan, Is Adan ka gona fag taw inhalig boyagan istay is baba daga, dapat ay, ka goyan fag Adan inbali Falad kagfaboyag manga taw. 46Dapat bohonwa ka sam tongod ka nagona, ka yapdi ka sas baba daga bago bago, bago di aban ka sam tongod. 47Ka Adan gona gistay is baba daga maskin nahalig gis lotok daga. Kat fadowa fag Adan kawa gim tongod. 48Ka sas baba daga fag manga taw igtolad kanhalig gis lotok daga. Ka manga taga man di gim tongod fag manga taw igtolad ka taw gim tongod. 49No kinday tam nogtolad kanhalig gis lotok daga istay, kitonya yadi aban, tam tomolad yadi aban ka gim tongod. 50Manga fadwasay, angko bato lwangon kito, intam manga habilogan, ka ha folot hanggan faknol, idwa tomahin han Diyos sakop banwanan. Bohonwa ka habilogan kamboyok ka omafo ka habilogan kadwam boyok. 51Fandog ngay, ho fomwayong hayo sadik bagay madolaw, ka ham idya nadog. Tam idwa fagayo matay, dapat tam fagayo imbago wan, 52somohod wa ka hasnog bodyong goyan goyan. Madali wa dahol dahol, idwam foga mata, ka bodyong homasnog, ka natay gona imbangon ya, fawa matay domwag yabay. Intam habilogan fagayo imbago wan. 53Maskin to fag habilogan ka kaboyok di, fag tomobos wa kadwa kaboyok hanggan ka katay fag tomobos yadi kadwa katay. 54Ka kaboyok nonbalyo wan kadwa kaboyok, hanggan ka katay inbalyo wan kadwa katay, gis nanyam anod kansorat sas Kasoratan kitay, Inlag wa kitay ka kahatayan indaog wa fiya fiya. 55Haw, kahatayan, siday haw nogdaog kati? Siday, kahatayan, im dalit kati? 56Ka dalit kahatayan kawa manga ogali dwat, hanggan ka karigonan ogali dwat gis Batasan Hodyo. 57Dapat ay, tam igbaya han Diyos kagdisag intam it haboyagan, gin Kiristo Hisos, kagfon intam, kaarakitay tam domaog ka kahatayan. 58Yakanga angko manga fadwasay, kawa kitonya, tam fag marigon, fag idwa gadowan, fag mahogod yadi no gibolon intam Fon ibolon, kawa tam twa kitay tam idwag faanogon intam nakayayan.

will be added

X\