1 KORINTO 12

1Manga fadwasay, kati kangko fagfwayongon ha hayo kawa has Maliyaw fag Falad manga disagon, kaarakitay ham tomwa wagdog. 2Hyabi hyabi ham nodyapdin tiwala in Diyos, ham fadi wadtwa kitay, nyawa kana fag karigonan, manga boyon odi, ka hayo manga fagsyagon. 3Yakanga hogfatohoyan hayo kitay nyawa faktaw non Diyos Falad kagfadonong hanya, idwa somyagan igsabayon in Hisos, nyawa ginahin. Hanggan idwa yadi ha somyagan iglwang, nyawa faktaw kitay, Is Hisos kagfon angko, no bohonwa ka Maliyaw fag Falad it fagtahinan sat fangayofan. 4Bokod bokod it manga disag, dapat sadi di ka Maliyaw fag Falad kagdisag tonya. 5Bokod bokod ista halimbawan ta no gibolon intam Fon ibolon, dapat ay, kagfon intam sadi di kagfasognod fagayo. 6Bokod bokod kasta bato ibolonon, dapat sadi di is Diyos, sayadis fagayo fag manga taw ka gibolon it ibolon. 7In Diyos disag ha sadi ha sadi kagfatohoyan kitay ka Maliyaw fag Falad sawas taw, kaarakitay farigon has fagayo. 8Ka Maliyaw fag Falad disag ha sadi ha fagsyaganon igtoltol in Diyos manga togon, ginya yadi fag Falad ka sadi ha fagsyaganon igfatwagdog fiya fiya in Diyos manga togon. 9Tonya yadi fag sadi dik Falad kagdisag has iba kitay, marigon man has fagayo nogsyag han Diyos. Ka tiba taw ha kadonongan igfafiya ka manga ha sagit. 10Ha sadi yak fagsyaganon, igfatimawa, bohonwag falipatan. Ha yadis tibat disag kitay, kabali in Diyos fangampang. Kandisag has tiba taw, ta homilala ka manga falad, ngatay gin Diyos, ngatay idwan. Tiba natwa wa kampang manga fangampangan madolaw. Ginya tiba twag fatwagdog tonya fag sanglitan kaarakitay manga taw tomwa wagdog. 11Dapat sadi dik Falad ka gibolon tonya fagayo no kinday kat fakasayaon, igfahafod has taw bokod bokod it manga disag. 12No kinday ka habilogan no sadi di, dapat aywan fag manga layonan, hanggan nyawa aywan fag layonan, ka habilogan sadi di, kitonya yadis Kiristo. 13Tam fagayo, nyawa Hodyo, nyawa Girigo, nyawasta nasali sogowan, nyawa bohonwan, tam fagayo intogna sa sadi dik Falad, kaarakitay imbali tonya fag sadi dik habilogan. Sadi dik Falad kan Diyos bilang wa nafainom hantam fagayo. 14Aywan fag manga layonan, bohondi sadi, ka sadi wak dahonya habilogan taw. 15Halimbawa ka bitis nogfayodon odi hanya, iglwang, Aho bohonwa gamat, yakanga ahodwan sakop sas habilogan sadi wak dahonya, kaglwang kitonya, bohonwa awkin sadik layonan sas habilogan sadi wak dahonya, ham gayfan? 16Halimbawa yadi, ka talinga bohonwa awkin sadik layonan sas habilogan, kawag lwang, Aho bohonwa mata, yakanga aho bohonwa sadik layonan sas habilogan sadi wak dahonya? 17Ka habilogan no fagayo wa mata, kinday ara no tomwa domog, ham gayfan? Ka habilogan no fagayo wa talinga, kinday araw no tomwa omayok? 18Dapat is Diyos ka nafwalid ka manga layonan santam manga habilogan sadi wak dahonya, no siday hanya naayfan fiya. 19No sadi yapdik layonan, idya kalwang kitay habilogan wa tonya. 20Dapat ka orongan, aywan fag layonan, dapat ka habilogan sadi wak dahonya, sadi di. 21Yakanga ka mata idwa tomwag lwang has gamat, Hodwa kasaya hyamo, nyawa alfoyo has bitis, idwa yadi tomwag lwang, Hodwa kasaya hyamo. 22Yatokitay, ka manga layonan santam manga habilogan ka bonwa bangan intam fagtagondaon, tonya wa ngap ka mahalga man. 23Ka manga layonan santam habilogan sadi wak dahonya, tam kayag falag, ya mangharaw, labi man tam no gano a, ka manga layonan santam habilogan sadi wak dahonya, kadwa fiya kabantay, dapat labi wa ngap tam igfabali fiya. 24No kawa danwa fiya kabantay, nyawa tam idwag fafiya domwag. Is Diyos no nahalig intam habilogan, dan wa fiya, hanggan tikis wa nadisag dahol man fag kangayanan has manga layonan habilogan tiba, ka sas taw idwa bangan fagtagondaon, 25kaarakitay idwa ha akwa fakaingliyon. Yatokitay, fagayo igtarogbongan odi. 26Ka sadik layonan habilogan no ha masagit, fagayo fag layonan karongkot yadi. Kitonya yadi ka sadik layonan no nadog fiya, fagayo kasolong wan. 27Tam fagayo in Kiristo wa habilogan sadi wak dahonya, hanggan igsadig sadi in Kiristo wa manga layonan sat habilogan. 28Kan Diyos nafwalid gona sat Tifonan ka manga Fandiya-Barita. It fadowa kat manga Fangampang. Kat fatolo kawa mangag faadal. Ginyas Diyos nafwalid yadi sat Tifonan, ka manga twa gibolon ka manga madolaw, ka manga madonong igfafiya ka manga ha sagit, ka mahogod wagtogbong, ka manga madonong igbahala has Tifonan, ka madonong yadi kampang sas manga sanglitan madolaw. 29Fagayo awkin manga Fandiya-Barita, manga Fangampang, mangag faadal? Fagayo awkin twag falag manga madolaw? 30Fagayo awkin madonong igfafiya ka manga ha sagit? Fagayo awkin twa kampang manga sanglitan madolaw, ngatay igfatwagdog tonya fag manga sanglitan, ham gayfan? 31Dapat tam fag gwayan wa kasaya ka manga disag has fangayofan ka fiya man ka tiba. Kati ho fomwayong ha hayo ka halimbawan ka maangay man has fagayo fagayo.

will be added

X\