1 KORINTO 10

1Angko manga fadwasay, ho kasaya nangos ham fag twagdog ka hyabi intam manga hafofowan nadalanan. Ta noglahaw yapdi, ka linyabo nalanbong sasta tongod fagayo, hanggan ta fagayo nadifay ka Dagat Dararag. 2Kawa kitonya, ta fagayo bilang wantogna sas linyabo hanggan dagat san Mwisis arofodan. 3Ta fagayo wa nahwan ka sadik fanganon madolaw. 4Fagayo nainom yadi sadik inomon madolaw ka nabolos gis madolaw fag bato, ka fagaba naofod is taw. Tonya fag bato madolaw kawas Kiristo. 5Nyawa kitonya aywan sas taw bohonwan Diyos fagbayaon, yakanga aywan natay ta no basad yapdi fakahyabogan. 6Kasta manga nadalanan fagayo igfatohod intam kitay, tam fag idwa kasaya ka manga ogali dwat, kito kasta fakasayaon hyabi. 7Tam fag idwa ha fagsyagon iba karigonan, kito kan Mwisis manga kahoyog tiba hyabi. Kito kansorat, Ka manga taw natokaw kaarakitay homwan, manga ominom, ginya ta nalindog a, natayok yadi. 8Tam fag idwa gogali dwat has ka taw, kito kasta naibolon tiba hyabi, yakanga sadi dik sirang 23,000 ka natay. 9Tam fag idwag solay intam Fon kito kasta naibolon tiba hyabi, yakanga manga abyanon nadaog ka manga taw. 10Tam fag idwag sogat in Diyos kito kan Mwisis nataban manga taw tiba hyabi, yakanga kan Diyos anghil, kawas Fadosa, nafadosa was taw. 11Tonyan anod hyabi has taw. To kawa famatagak has tiba. Insorat yadi kaarakitay igfatohod intam, ka manga taw ka natahod ka katabowanan fag manga sirang kati. 12Yakanga, nyawa faktaw ka gayfan hanya marigon hantam Fon, fag matagahan kitay fag idwam lombay yat fangayofan. 13Tam idya ha donggon mahori igsolay intam, kaglabi man ista donggon mahori tiba taw. Is Diyos idwag fabayaan intam. Hanyadwag faangay kitay ka mahori kagsolay intam iglabi intam fagsyaganon. Yatokitay, kagsolay intam nomdasog, is Diyos domisag ya halimbawan kaarakitay tam omagwanta wan. 14Yakanga angko manga fakilalaon, fag idwag syag has iba karigonan. 15Hogfwayong ha hayo kitonya, kawa ham ha fangayofan wan. Ham wa kagfatohoyan ngatay fiya, ngatay idwa fiya angko fwayong. 16Idwa awkin tam no ginom gintam Fon ongot fanginoman kantam fagbayaon, tam ha kahorayan yadi in Kiristo folot? Idwa awkin tam no kwan tinapay kantam nafaarogbotan, tam ha kahorayan yadi gin Kiristo habilogan? 17Yakanga maskin ka tinapay sadi di, tam bilang di sadik habilogan nyawa kitay tam aywan, maskin gi sadi dik bilog tinapay tam ha kahorayan ginya. 18Fandog ngay, tam fag tohod ka manga taga Israil ogali hyabi. Idwa awkin ka kwan ista nadisag sinogba han Diyos kasadi han Diyos, ham gayfan? 19Kana arat kahologan kangko nafwayong? Ka manga iba karigonan ha kahologan awkin, ngatay kasta disag fanganon hanya baliwa? 20Idwa ha kahologan. Kangko fagfwayongon ka mangadyan tiwala igdisag it famiya has manga labang taw, idwa han Diyos. Hodwa kasaya kitay tam kasadi has manga labang taw. 21Tam no ginom wan gintam Fon ongot fanginoman, tam idwa syagan ominom gis fanginoman labang taw. Tam no manayowan hantam Fon, tam idwa syagan manayowan yadi has manga labang taw. 22Tam awkin kasayag fadwat iglag intam Fon, ham gayfan? Tam awkin gayfan tam marigon man hanya? 23Ha akwa taw kaglwang, Fiya di aho no gibolon nyawa kana. Ala, no kitay di, dapat idwa fagayo igtogbong. Ginya sadi ya ka omolit, Fiya di aho no gibolon nyawa kana. Anod, dapat bohonwa fagayo kagfarigon intam iba. 24Fag ka fiya has iba taw kantam fagisipon, fag bohonwa kantam sadili fakinabang. 25Nyawa kana kantam nasali gis fanaliyan tagoban, tam fag danwa kwan. Hawa gintaw gintaw maskin intam fangayofan ha fagtagahon. 26Kawa ka Kasoratan iglwang, Kagfon intam ka gafo intam daga hanggan fagayo ka sinya. 27Intam fakilalaon sadi, kadwam tiwala no nataban intam, tam nonsaya wagdog, nyawa kanat nadisag hantam, tam fag kwan wan, tam hawa gintaw gintaw maskin tam ha fagtagahon. 28Dapat no ha nafwayong intam, To ista famiya labang taw, maskin tonya fag taw kantam fagayfanon, tam hawa kwan. 29Kangko faglwangon, bohonwa kitay tam ka ha fagtagahon, tam fag idwa kwan kaarakitay ka nafwayong idwa ha fagtagahon. Ka tiba nogtadlongan kiti, Kana mayon no iba taw angko fagisipon fagaba? Gwadi ho kasamok wan. 30Kana mayon ta nogsogat angko, aho no nafasalamat yadi han Diyos kangko nahwan? 31Angko sagot kiti, Nyawantam nahwan, nyawa hanggan intam nainom, nyawa kana kantam ibolon, fag sonson wa fiya, kaarakitay in Diyos kafiyan imlag. 32Fag bohonwa tam kasta faglagon igtaban manga taw has dwat, nyawa manga Hodyo, nyawa manga Girigo, nyawa hanggan has mangan aktom san Diyos tifonan. 33No kadi aho, no bali day angko fagsyaganon, hodwag fagomon omogali fagayo has fiya sasta faglagan fagayo. Fag bonwangko sadili fakinabang kangko fagsayahon, dapat fag hanggan ka tiba taw fag ha fakinabang gingko ogali, kaarakitay tambawi yadi.

will be added

X\