1 KORINTO 1

1Ahos Pablo in Diyos nafatawag kaarakitay imbali in Kiristo Hisos Fandiya-Barita. To fag sorat gi hyami da Sostinis intam fadwasay. 2Migsorat ha hayo, han Diyos Tifonan sas banwa Korinto, ha hayo kantohoyan han Kiristo Hisos, kan Diyos manga nafatawag kaarakitay kabali it sakop, kito yadis fagayo fag manga taw, nyawa siday fag banwanan, ta nogsyag han Kiristo Hisos kagfon intam, kasta Fon hanggan wantam. 3Ham nangos fag domog kitay, is Diyos intam Ama, hanggan is Kiristo Hisos intam Fon mahoway ha hayo fagaba, hanggan igfalokmay hayo manga fangayofan. 4Ho fagaba wagbaya han Diyos kawa ha hayo, maskin hanyag disag it malooy fag kahowayan ha hayo gin Kiristo Hisos. 5Yakanga, kawa ham insadi ha hanya, ham bohondi kito ka hyabi sas fagayo, ham inbali madonong hanggan twag toltol fiya fiya. 6Kawa hyami nafaorongan ha hayo, kawa han Kiristo, in-anod yadi wan sa hayo manga ogali, 7yakanga idwa ha korang in Diyos disag ha hayo manga fangayofan bago, no kandogay day tam no mafanayan yapdi kagfon intam, is Kiristo Hisos, nomlag aban. 8Is Diyos kagfarigon intam manga fangayofan hanggan wa has katabowanan, kaarakitay idwa ha fakabayaon intam ogali gis nanya fag sirang aban kagfon intam, is Kiristo Hisos nombangkad. 9Is Diyos idwa bohagon ka nafatawag intam kaarakitay tam imsadi hat Anak, is Kiristo Hisos intam Fon. 10Angko manga fadwasay, hogfaaronganon ha hayo san Kiristo Hisos, kagfon intam, it ngayan, kitay, ham fag kasadi sa hayo manga hampang, hanggan fangayofan hanggan bato ibolonon kaarakitay ham idwag daraogan. 11Maskin in Kolowi manga iba nafwayong hangko kitay ham, hono, manga fadwasay, ham gagran. 12Kangko fagfwayongon, insadi, hono, iglwang, Aho han Pablo, insadig lwang, Aho han Apolos. Intibag lwang, Aho han Pidro, tibag lwang, Aho han Kiristo. 13Is Kiristo awkin inhorayan, ham gayfan? Aho awkin kanpako sas nafatimbangan hayo kawa ha hayo? Ta nafatogna awkin hayo sangko ngayan, is Pablo? 14Hogbaya han Diyos kitay hodwa ha nafatogna is nyamo hayo, no bohonwa da Kirispo da Gayo. 15Yakanga manga taw idwa twag fwayongon kitay tantogna sangko ngayan. 16Ho bago di natohod kitay aho, mangharaw, ha akwa ya nafatogna, da Istifanas talanahan. Nonsagaya di tonya, hodwa ha natohod kitay, aho ha nafatogna yas nyamo hayo. 17Dapat ay, is Kiristo idwa nasogo angko kaarakitay fagaba mamatogna has taw. Is Kiristo nasogo angko kaarakitay manoltol ka Fiya fag Barita, bohonwa kitay sas fakyason fag hampang gis kadonongan istay is baba daga, dapat sas hampang ka malpos kadog, kaarakitay in Kiristo kahatayan karigonan idwam bohin, it kahatayan sas nafatimbangan hayo. 18Ka manga taw kagdagos has kadwatan nogdog kawa han Kiristo kahatayan sas nafatimbangan hayo, taglwang tonya habongolan odi. Dapat santam, ka manga dagos wambawi, tam nogdog kawa han Kiristo kahatayan, to wa kan Diyos kadonongan. 19Maskin insorat kitay, Ho domwat ka manga kadonongan manga taw, Hogfabali idwa ha kahologan kasta fakatwawon. 20Da ngap ka manga ha kadonongan? Da ngap kagfaadal Batasan Hodyo? Da ngap ka madonong igfabarohagan istay is baba daga, ham gayfan? Is Diyos igfabali kapaongan odi ka kadonongan istay is baba daga. 21Maskin in Diyos wa kadonongan ka nafabali kitay manga taw idwa syagan homilala hanya, no kadi kadonongan gistay is baba daga. Dapat ay, is Diyos nafaangay kitay, tam nogtoltol ka Fiya fag Barita, hanya ka bomawi manga taw kagsyag ha hanya, nyawa kastay is baba daga fag manga taw iglwang tonya fag barita habongolan odi. 22Ka manga Hodyo igsagad fag hamlag sadik falagon madolaw kaarakitay ha faorongan. Ka manga Girigo, it fagsayahon, kadonongan odistay is baba daga. 23Dapat kantam fagbaritaon kawas Kiristo kanpako sas nafatimbangan hayo, ka manga Hodyo fasingyanan, hanggan ka manga Hintil faglwangon, habongolan odi. 24Dapat, no kawan Diyos manga nafatawag fag manga taw, nyawa Hodyo, nyawa Girigo, is Kiristo wa kan Diyos karigonan hanggan it kadonongan. 25Hogfahasayan odi hayo, maskin, tam no lomwang, is Diyos nahalig it habongolan, ya tonya fag bilang habongolan, kadonongan wan, bohondi kito ka kadonongan taw. Tam no gayfan is Diyos magomo nomtoon, gis nanyas Diyos marigon man has fagayo fagayo fag manga taw. 26Angko manga fadwasay, tam fag tohod no kinday tam is Diyos no nafatawag intam. Sayok di santam ka manga madonong hanggan ka ha manga magorang kanbantog. 27Dapat is Diyos nafili ka mangadwa madonong istay is baba daga, kaarakitay igfahaya ka manga madonong, hanggan ka manga magomo sasta faglagan, kaarakitay igfahaya ka manga marigon. 28Is Diyos nafili yadi kasta manga fagyodon, kadwa bangan mahalga no kalag di, idwa ha kahologan istay is baba daga, no taw dik lomwang, kaarakitay igfabali idwa mahalga kasta faglwangon manga gorangon sas baba daga, 29kaarakitay nyawa fakta fag taw, idwag fatakagdog san Diyos faglagan it sadili fagsyaganon. 30Maskin giwa ngap in Diyos intam haboyagan kansadi san Kiristo Hisos. Hanya kan Diyos nafabali intam kadonongan, intam kahaslongan, intam fangafiyan, hanggan intam Famawi. 31Yakanga kito ka Kasoratan fwayong, Taw no kasayag fatakagdog has taw, fag kagfon intam kat fagfasayaon igdog.

will be added

X\