Titusɩ 1

1Maa Pɔɔl na ɩ a Nãaŋmɩn tʋ̃tʋ̃nɔ̃ nɩ Yesu Kɩrɩsɩto nɩtʋ̃nãa, Nãaŋmɩn ir man tʋ̃ ɩka n tɩ sʋ̃ʋ a wʋ nɩchɛl irsɩ sɔɔfʋ ka ba bɔ̃ɔ a yelmɩ̃ɛ tɩ turo a lɛ a Nãaŋmɩn na bʋɔrɔ ɩka ba turo. 2Ala lɛ ɩ a nyɛvʋr na ba tara baarfʋ dɔ̃ɔ bɔ̃ɔn, a Nãaŋmɩn na ba ŋmaara jir ɛ, na tɩr a nɛɛ kʋ sɩ a nyɛvʋr nyã yele sɛrɛ tɩ bon jaa wa piel. 3A sɔ̃ɔ 'lɔ na sɛɛ na wa ta, Nãaŋmɩn vɛ̃ naa ka a wʋ 'yɛr gã chãa pɔ, ka n 'yɛrɛ a lɛ a Nãaŋmɩn nyã na ɩ a sɩ Fafaara na de kʋ ma ɩka n 'yɛr. 4N sɛɛrɛ na a gãn nyã kʋrɔ a fʋ̃ʋ Titusɩ na sɔɔ a Yesu jũu, fʋ ɩ naa a n bie. Wɩ̃ɛfʋ nɩ nyã'maar na yi a Sãa Nãaŋmɩn nɩ sɩ Fafaara Yesu Kɩrɩsɩto jie, a be a fʋ sɛ̃. 5Lɛ na so ka n bar fʋ a Kɩrete paal nɩ nyã, ɩka fʋ baar maal a ala na chɛ ka a tor, tɩ na fʋ ir nɩbɛrɛ a tẽn ala nɩ tãa lɛ ɩn dɔ̃ɔ wiil fʋ. 6A nɩdiere wʋ ta ɩ nɩrɛ 'lɔ nɩbɛ na nyɛrɛ yeldɛbɛ a wʋ 'yɔ̃ɔ ɛ, wʋ ɩ pɔɔ bʋ̃'yen sʋɔ, na wʋ ɩ nɩrɛ 'lɔ a wʋ bibiir na sɔɔ Nãaŋmɩn, na ba ta ɩ bigãlsɩ nɩ bibawõnsɩ ɛ. 7A nɩdiere an ɩ Nãaŋmɩn tʋ̃mɔ̃ lɛ wʋ kaara jũu, wʋ ta ɩ tuor kʋ a nɩbɛ ɛ, wʋ ta ɩ nɩrɛ suur na ire fɔfɔɔ ɛ, na wʋ mɩ ta ɩ dãnburo ɛ, wʋ ta ɩ nɩrɛ na jɛɛrɛ, bɩɩ bʋɔrɔ libie na ba tu sɔr ɛ. 8Wʋ ɩ nɩrɛ 'lɔ na diere sãanba, na wʋ nʋ̃ vɩla maalfʋ, na wʋ ɩ nɩrɛ 'lɔ na nyɔɔrɔ wʋ mɩ̃ɛ, na wʋ ma ɩrɛ a lɛ na tor, na wʋ ɩ nɩchɛchɛ, tɩ kpãana wʋ mɩ̃ɛ. 9Wʋ nyɔɔ a yelmɩ̃ɛ 'yɛr nyã tara kpɛ̃ɔ nɩtãa lɛ an wiil. Lɛ lɛ wʋn tʋ̃ɔ 'yɔ̃ɔ a bamɩne ɩ̃kpɩ̃ɛn nɩ a yelmɩ̃ɛ wiilfʋ tɩ dɛn a bala na kpɛrɛ. 10Bojũu a ba yɔɔ bala na ɩ a bawõnsɩ nɩ 'yɛr pɔrsɩ nɩ bɛ̃bɛlbɛ bala na yi a yɔŋmarba jie. 11A sɛɛ naa ɩka fʋ ŋmaa ba sɔr, bojũu ba tu naa a ba bɔdɛbɛ bɛl yir gbulo nɩbɛ na ba wile yelsɩ ala na ba sɛɛ ɩka ba wile ɛ. 12A ba yɛ̃ sʋɔ kɔ̃ɔ gba dɔ̃ɔ 'yɛr a ba 'yɛr, "Yɩn Kɩrete dẽme ɩn jir ŋmarba. Yɩ kaara fɩka dʋ̃dɛbɛ, koro dẽme na bʋɔrɔ bʋ̃diir tɛɛ." 13A dãasɩɛ nyã ɩn sɩrɛ, a lɛ jũu, kpãa ba nɩbijɩɛ ka a ba sɔɔfʋ kpɛ̃mɛ a yelmɩ̃ɛ wiilfʋ pɔ, 14ka ba ta chɛlɛ a Juu nɩbɛ fuolsɩ nɩ a bala na bar a yelmɩ̃ɛ ɛ. Ba tɔr a ba wiilfʋ. 15Bala jaa na tara pʋtɩvɩla, yele jaa vɩla na kʋ ba, tɩchɛ bala na tara pʋtɩdɛɛr, na baa sɔɔ de ɛ, yele jaa ɩn dɛɛr a ba sɛ̃. Sɩrɛ jaa lɛ, a ba pʋtɩɛrsɩ dɛɛ naa. 16Ba mɩ ɩka ba bɔ̃ɔn Nãaŋmɩn tɩchɛ a ba maalfʋ pɔ, ba tɔr wʋ naa. Ba ɩn nɩ'laarsɩ, bawõnsɩ na ba sɛɛn vɩla maalfʋ ɛ.

will be added

X\