Yelwiilsɩ 9

1A malakasɩ anũu sʋɔ na wa pɛɛl a wʋ ɩɩl, ka n nyɛ a ŋmɛrbir 'lɔ na dɔ̃ɔ yi a saaju lo a tẽe. A ŋmɛrbir nyã lɛ ba de a bɔɔ fulom pãn bir kʋ. 2Wʋn wa yuo a bɔɔ fulom nyã nɛɛ, ka jʋʋr yire fɩka bũu kpɛ̃ɛ jʋʋr. A jʋʋr anyãna na yire a bɔɔ fulom nyãna pɔ liin pɔɔ a mɔ̃tɔ̃ɔ naa tẽe wʋ jaa. 3A jʋʋr anyãna pɔ lɛ soor yi yaar a tẽe wʋ jaa ka ba kʋ ba lɔɔ fɩka lɔ̃n lɔɔ. 4Ba 'yɛr kʋ ba ɩka ba taa ɩrɛ wa ɔɔrɔ mɔɩ bɩɩ bʋ̃bul nɩ a tɩɛ vaar ɛ, tɩchɛ a dʋ̃nɔ̃ a nɩbɛ bala tɛɛ na ba tara a Nãaŋmɩn jɩ̃nɛ a ba gbersɩ pɔ ɛ. 5Baa kʋ ba sɔr ɩka ba kʋrɔ ɛ, tɩchɛ ba ge a nɩbɛ ŋmɛrsɩ anũu. Ka a ba dʋ̃fʋ ɔɔr kaara fɩka lɔ̃ɔ na dʋ̃ nɩrɛ ɔɔrɔ. 6A ber anyãna pɔ nɩbɛ na bʋɔrɔ na kũu tɩchɛ ba kʋ̃ nyɛ wʋ ɛ. Ban bʋɔrɔ naa ɩka ba kpi tɩchɛ a kũu kʋ̃ lɛ kʋ ba gba ɛ. 7A soor nyɛtãan wiisɩ ban pɩ̃ɛ jɛɛr 'yɔ̃ɔ, ka a jur kaara fɩka sɛlma jupile ban su, ka a ba nin nyɛtãan nɩsaal nie. 8A ba kɔɔl kaara fɩka pɔbɔ jukɔɔl, ka a nyɩmɛ mɩ kaara fɩka jukpɛ̃ɛ nyɩmɛ. 9Ba tara na nyãa pɔɔrsɩ ka a kaara fɩka kue, ka a pɩbɛ dɔ̃ɔnɔ̃ fɩka torkosɩ a wiisɩ na tɔɔrɔ joro chiine jɛɛr jie. 10Ba tara na jʋɛ dʋ̃nɔ̃ nɩ lɔ̃n kaar, a jʋɛ ala tara na fɔ̃ɔ na dʋ̃n nɩbɛ ge ba ŋmɛrsɩ anũu. 11Ba tara na nãa na kaara ba, 'lɔ lɛ a malaka 'lɔ na kaara a bɔɔ fulom 'lɔ. Heburu nɩbɛ bʋɔlɔ wʋ naa, Abadɔn, ka a Greek nɩbɛ mɩ bʋɔlɔ, Apolyɔn. A par lɛ, sɔ̃sɔ̃ɔnɔ̃. 12A nɛbier 'lɔ na de nie lɛ a nyã na tal, tɩchɛ ka a ayi sʋɔ chɛnɛ be puor waara. 13Ka a malakasɩ ayʋɔb sʋɔ pɛɛl a wʋ ɩɩl, n wõn kɔkɔr na yire a sɛlma tɩ̃ɩ nyũu vɩla chʋmfʋ jie kpʋ̃kpʋɛ, be lɛ ba ma chʋm a kãnyũu na be a Nãaŋmɩn niem. 14A kɔkɔr 'yɛr kʋ a malaka ayʋɔb sʋɔ 'lɔ na tara a ɩɩl, "For a malakasɩ anaar bala ban lũ a be a Yufɩrɩtɩ põn kpɛ̃ɛ pɔ." 15A wʋ for a malakasɩ anaar ba nyãna ban dɔ̃ɔ lũ gun a sɔ̃ɔ 'lɔ̃nɔ̃, a bɩbir 'lɔ̃nɔ̃ nɩ a chuu 'lɔ̃nɔ̃ naa yuon 'lɔ̃nɔ̃ ɩka ba kʋ a nɩsaal jiir ata jibʋ̃'yen bar. 16Ka a bala na do a wiisɩ ba bʋɔl naa a ba nɛɛ fʋn kʋ̃ tʋ̃ɔ ba sɔr ɛ. 17A wiisɩ nɩ a bala na do ɩn nyɛ a jãna pɔ, a nyãa pɔɔrsɩ mʋ̃ɔ naa fɩka bũu, ka amɩne mɩ ɩ bufulo, ka amɩne mɩ ɩ bʋ̃dʋɔr. Ka a wiisɩ jur nyɛtãan jubɛrɛ jur, ka a bũu jʋʋr nɩ jerbɩ mɩ yire a ba nɛɛ pɔ. 18A gefʋ ata ala na yi a wiisɩ nɛɛ pɔ lɛ, bũu, nɩ jʋʋr, nɩ jerbɩ, ala lɛ ba kʋn nɩbɛ jiir ata jibʋ̃'yen. 19A wiisɩ anyã fɔ̃ɔ be naa a ba nɛɛ pɔ naa jʋɛ pɔ, a ba jʋɛ kaara fɩka waba naa tara jur, ala lɛ ba de gere nɩ a nɩsaal. 20A nɩsaalba bala na chɛ, na baa kpin a gefʋ nyã ɛ, ba sɔɔ bar a tɩbɛ ala ban maal nɩ a ba nuur ɛ. Ba chɛnɛ na puoro a sɩdɛbɛ, nɩ a bʋtɩbɛ ban maal a sɛlma, nɩ a kur pɩɛl, nɩ a kur jɩɛ, nɩ a kusɩbɛ, nɩ a daar na ba wõnõ 'yɛr ɛ, ba kʋ̃ tʋ̃ɔ chen ɛ. 21Baa mɩ lɩɛb a ba tɩɛr bar a nɩkʋyelsɩ, nɩ sɔyelsɩ, nɩ sɛ̃sɛ̃yelsɩ, nɩ nãnyiyelsɩ ɛ.

will be added

X\