1 Be lɛ a Pɛraabile 'lɔɔ a jɩ̃nsɩ ayopõi sʋɔ ka a saaju wʋ jaa ŋmaa vʋʋr jaa chɩr chɩr chɩr kor bɩ̃lãa. 2 Ka n nyɛ a malakasɩ ayopõi bala na ara a Nãaŋmɩn niem ka ba kʋ ba ɩɩl pɛɛlsɩ ayopõi. 3 A malaka ɩ̃sʋɔ na tara a sɛlma lapʋr, wa ara naa a bɔɔrlo bomo chʋmfʋ jie. Ba den a tɩ̃ɩ nyũu vɩla ala kʋ wʋ ɩka wʋ de pʋɔ a Nãaŋmɩn nɩbɛ ba jaa sʋɔrfʋsɩ a sɛlma bɔɔrlo bomo chʋmfʋ jie kʋ a 'lɔ na jɩ̃nɛ a nãa dakɔɔ ju. 4 A tɩ̃ɩ nyũu vɩla jʋʋr yire naa a sɛlma lapʋr 'matãan a Nãaŋmɩn nɩbɛ sʋɔrfʋ yi a malaka nũu pɔ, duoro a Nãaŋmɩn sɛ̃. 5 Be lɛ a malaka lɛ mʋ̃ɔ bũu bie a sɛlma bɔɔrlo bomo chʋmfʋ jie sɛɛ a lapʋr na wʋ lɔb bar ka a wɛr pɔ ka tãnfʋ, nɩ gɔ̃mɔ̃, nɩ saa nyɩɩrfʋ ka a tẽe wʋ jaa dam. 6 Ka a malakasɩ ayopõi bala na tara a ɩlɛ, go a pɛɛlfʋ. 7 A malaka 'lɔ na de nie pɛɛl naa a wʋ ɩɩl, ka a sakpʋlõbie nɩ bũu na 'matãan jɩ̃ɩ loro a wɛr pɔ. Ka a tẽe jiir ata jibʋ̃'yen di wʋ jaa, ka a tɩɩr mɩ jiir ata jibʋ̃'yen mɩ di lɔ̃ɔn a mɔ'yɔlɔ a jaa. 8 Ka a malakasɩ ayi sʋɔ mɩ pɛɛl a wʋ ɩɩl, ka ba 'lɔb bon na nyɛtãan tɔ̃kpɛ̃ɛ na nyɔɔ bũu 'yɔ̃ɔ a man pɔ. A man jiir ata jibʋ̃'yen lɩɛb jɩ̃ɩ, 9 ka a bʋ̃nɩbie mɩ jiir ata jibʋ̃'yen kpi, ka a gborbɛrɛ ala mɩ jiir ata jibʋ̃'yen mɩ wɛ. 10 Ka a malakasɩ ata sʋɔ mɩ pɛɛl a wʋ ɩɩl, ka a ŋmɛrbir kpɛ̃ɛ na 'lɩrɛ fɩka bũu yi a saaju lo a põnsɩ nɩ a bulsɩ jiir ata a jibʋ̃'yen pɔ. 11 A ŋmɛrbir yuor din, Bʋ̃tuo. Ka a kɔ̃n jiir ata jibʋ̃'yen be tuo, ka a nɩbɛ bala na nyũ a kɔ̃tuo ala, ka yɔɔ jie kpi. 12 A malakasɩ anaar sʋɔ pɛɛl naa a wʋ ɩɩl, ka ba ŋme a mɔ̃tɔ̃ɔ jiir ata jibʋ̃'yen nɩ a ŋmɛraa jiir ata jibʋ̃'yen naa ŋmɛrbie ka ba jiir ata jibʋ̃'yen ɩ libe. A bɩbir jiir ata jibʋ̃'yen ba tara chãa ɛ, ka a ŋmɛraa naa ŋmɛrbie mɩ ba chaar a tɩ̃sɔɔ jiir ata jibʋ̃'yen ɛ. 13 Be lɛ n kaa naa wõ tuu na ɔɔrɔ be a saaju 'yɛrɛ nɩ nɛkpɛ̃ɛ, "Nɛbier! Nɛbier! Nɛbier! Yele na wa naa nɩsaal jaa na be a wɛr pɔ, ala ɩ a malakasɩ ata bala na chɛ wa pɛɛl naa a ba ɩlɛ."
