Yelwiilsɩ 6

1Ka n kaa naa nyɛ a Pɛraabile na 'lɔɔ a jɩ̃nsɩ ayopõi ala ban mar a gãn 'lɔ na de nie, be lɛ n wõ a bʋ̃nɩbie anaar bala ɩ̃sʋɔ kɔkɔr fɩka saa na tãn, ka wʋ bʋɔl, "Wa!" 2Be lɛ n kaa nyɛ ka a ɩ wii pɩla lɛ, ka a 'lɔ na do, jã tam a ba de nãa jupil kʋ wʋ ka wʋ yin darfʋ an ɩ tʋ̃ɔfʋ sʋɔ lɛ wʋ ɩ. 3A Pɛraabile na lɛ 'lɔɔ a jɩ̃nsɩ ayi sʋ̃ɔ, n wõn a bʋ̃nɩbie ala ayi sʋɔ na 'yɛr, "Wa!" 4Ka a wii jɩɛ wa yi, a 'lɔ na do ba kʋ wʋn kpɛ̃ɔ ɩka wʋ faa a nyã'maar tɩ vɛ̃ ka jɛɛr ir a wɛr wʋ jaa, ka a nɩbɛ kʋrɔ taa. Ka ba kʋ wʋ a jɛɛr sɔkpɛ̃ɛ. 5A Pɛraabile na lɛ 'lɔɔ a jɩ̃nsɩ ata sʋɔ, n wõn a bʋ̃nɩbie ata sʋɔ na 'yɛr, "Wa!" Ka n kaa ka a ɩ wii sɔɔlaa lɛ, ka a 'lɔ na do tara bʋ̃mansɩ a nũu pɔ. 6Be lɛ n wõ a bʋ̃nɩbie anaar bala chara pɔ fɩka kɔkɔr na 'yɛrɛ, "Kɔ̃ lo naa, chi bʋ̃manãa nɛbʋ̃'yen na da naa nɩbʋ̃'yen bɩbir gbul sãyar. Ka a kamaana mɩ nɛɛr ata mɩ da nɩbʋ̃'yen bɩbir gbul sãyar, tɩ taa ɩrɛ wa sɔ̃ɔnɔ̃ a kãa nɩ a dãa bara ɛ." 7A Pɛraabile na lɛ 'lɔɔ a jɩ̃nsɩ anaar sʋɔ, n wõ naa a bʋ̃nɩbie anaar sʋɔ na 'yɛr, "Wa!" 8Ka n kaa nyɛ wii ul a nɩdaa. Ka a 'lɔ na do yuor di kũu, ka a kpĩisɩ tẽe mɩ turo a wʋ puor. Ba kʋ ban kpɛ̃ɔ ɩka ba de sɔkpɛ̃ɛ, nɩ kɔ̃, nɩ baal, nɩ mɔdʋ̃n kʋn a wɛr nɩbɛ ala ɩ ba põn a tẽe a wʋ jiir anaar. 9Wʋn lɛ 'lɔɔ a jɩ̃nsɩ anũu sʋɔ, n nyɛn a nɩsɩɩr bala ban dɔ̃ɔ kʋ a Nãaŋmɩn 'yɛr nɩ a wʋ dãasɩɛ jũu ka ba be a Nãaŋmɩn bɔɔr lofʋ jie pĩlem. 10Ba tãna naa nɩ nɛkpɛ̃ɛ 'yɛrɛ, "A Tʋ̃ɔfʋ sʋɔ, nɩ chɛchɛ sʋɔ, nɩ yelmɩ̃ɛ sʋɔ, a wa ta dabor ka fʋ tɔɔr a wɛr nɩbɛ 'yɛr na fʋ yab a sɩ jɩ̃ɩ sãma?" 11Be lɛ ba kʋ ba jaa bʋ̃pɩɛl tɩ 'yɛr ɩka ba di kãnyir bɩ̃lãa ka ba baar kʋ a ba tʋ̃tʋ̃taaba nɩ a yɛɛr a ba kaar ka a ta. 12N kaara naa ka wʋ lɛ 'lɔɔ a jɩ̃nsɩ ayʋɔb sʋɔ. Ka a tẽe mĩi wʋ jaa, ka a mɔ̃tɔ̃ɔ sɔb fɔsɔɔlaa kaar, ka a ŋmɛraa mɩ lɩɛb jɩ̃ɩ kaar jaa kpɩ̃n kpɩ̃n, 13ka a ŋmɛrbie mɩ yi a saaju pɔrɔ loro a tẽe pɔ fɩka tɔ̃ɔ kara sɛsɛkpɛ̃ɛ na fu lɔb. 14Be lɛ a saaju pilʋ̃ fɩka sɔ̃gãnãa ban pil, ka a tɔ̃n a jaa nɩ a dõdolsɩ a jaa mɩ ir a ba jiir. 15Ka a tẽe nyã nãmɩne, a tẽe nyã nɩbɛrɛ, a fɔ̃ɔ dẽme, taraa dẽme, a gãdaar, nɩ a gbãgbaar ba jaa, nɩ a sumɩne ba jaa pãa sɔɔlɔ a tɔ̃n bɔɔr pɔ nɩ a tɔ̃n kʋsɩbɛ pɔ. 16Ba pãa bʋɔlɔ na a tɔ̃n naa kʋsɩpãnsɩ, "Yɩ lo pii sɩ ka sɩ taa lɛ nyɛ a 'lɔ na jɩ̃nɛ a nãa dakɔɔ ju ɛ, na sɩ ta mɩ lɛ nyɛ a Pɛraabile suur ɛ! 17A ba sukpɛ̃ɛ bɩbir vɩɛ naa, an lɛ na tʋ̃ɔ ara a ba niem?"

will be added

X\