Yelwiilsɩ 4

1A anyã puor, n lɛ kãan nyɛ a saaju pãn na yuo ara. Ka a kɔkɔr 'lɔ ɩn dɔ̃ɔ wõ a ɩɩl ban pɛɛl kaar 'yɛr kʋ ma, "Do wa, ka n wiil fʋ a ala na ɩ a anyã puor." 2Ajienaa kaa ɩ Nãaŋmɩn Sɩɛ de ma naa ka n nyɛ a nãa dakɔɔ a be a saaju nɩrɛ kɔ̃ɔ na jɩ̃nɛ. 3Ka a nɩrɛ 'lɔ na jɩ̃nɛ a nãa dakɔɔ ju nyɩlɛ jaa pala pala fɩka gar kʋsɩr, nɩ kʋsɩr wolo wolo, ka a sagõgoraa na nyɩlɛ ŋmaa jilʋ̃ a nãa dakɔɔ. 4Dakɔɔr lɩjɛr nɩ anaar mɩ ben be jilʋ̃ a nãa dakɔɔ, ka a nɩbɛrɛ lɩjɛr nɩ anaar mɩ jɩ̃nɛ a ju, na ba su bʋ̃pɩɛl na ba sun sɛlma jupile. 5Saa nyɩɩrfʋ nɩ gɔ̃mɔ̃ na tãna yire naa a nãa dakɔɔ par. Ka a fɩ̃tɩnɛ ayopõi mɩ 'lɩrɛ a nãa dakɔɔ par, anyãna lɛ ɩ a Nãaŋmɩn Sɩɩr ayopõi. 6A nãa dakɔɔ niem bon ben be kaara man kʋ̃ɔ kaar jaa wel wel wel, na wʋ nyɩlɛ chãana kaar. A bʋ̃nɩbie anaar jil naa a nãa dakɔɔ tara nɩbie a jiir a jaa a puor nɩ a niem. 7A bʋ̃nɩbir 'lɔ na de nie nyɛtãan jukpɛ̃ɛ, ka a ayi sʋɔ mɩ nyɛtãan narbile, ka a ata sʋɔ mɩ nyɛtãan nɩsaal, ka a anaar sʋɔ mɩ nyɛtãan tuu. 8A bʋ̃nɩbie anyãna ɩ̃sʋɔ jaa tara naa pɩbɛ ayʋɔb, ka a nɩbie pɔɔ a ɩ̃gãn wʋ jaa naa pɩbɛ pɔ. Ba ma yiele nɩ yiel mɔ̃tɔ̃ɔ nɩ tɩ̃sɔɔ ɩka, "Chɛchɛ, chɛchɛ, chɛchɛ 'lɔ lɛ ɩ a sɩ Soro Nãaŋmɩn nɩ a kpɛ̃ɔ jaa sʋɔ. 'Lɔ lɛ be be, 'lɔ lɛ ɩ, 'lɔ lɛ na wa." 9Sɔ̃ɔ 'lɔ jaa a bʋ̃nɩbie ala na ma wa puoro pɛɛrɛ dãna nɩ a 'lɔ na jɩ̃nɛ a nãa dakɔɔ ju, 'lɔ lɛ be be jaa kpo kpo, 10a nɩbɛrɛ lɩjɛr nɩ anaar bala gãn kpa tẽe tɩ puor a 'lɔ na jɩ̃nɛ a nãa dakɔɔ ju, 'lɔ lɛ na be be jaa kpo kpo. Ba yãan a ba nãjupile bin a nãa dakɔɔ par tɩ 'yɛrɛ, 11"A sɩ Soro nɩ a sɩ Nãaŋmɩn, fʋ̃ʋ lɛ a sɛɛn ɩka fʋ de a tɩɩr, 'yɔ̃ɔfʋ nɩ a kpɛ̃ɔ. Bojũu fʋ̃ʋ lɛ maal a bomo a jaa, a fʋ bɔfʋ pɔ lɛ a jaa maal naa be be."

will be added

X\