Matiu 5

1Yesu na wa nyɛ a nɩyɔɔ, wʋ don tɔ̃ɔ ju, wʋn wa tɩ jɛ̃ baar ka a wʋ poturbo wa a wʋ sɛ̃. 2A wʋ piel wile ba 'yɛrɛ, 3"Pʋpɛl lɛ kʋ a yɩn banyãna na ba tara bon jaa ɛ, tɩ bʋɔrɔ lɛ a Nãaŋmɩn na bʋɔrɔ. Yɩn lɛ so a saaju nãalʋ̃ʋ. 4Pʋpɛl lɛ kʋ a yɩn na kõnõ, Nãaŋmɩn na 'maan a yɩ nyãa. 5Pʋpɛl lɛ kʋ a yɩn na siir a yɩ mɩ̃ɛ. Nãaŋmɩn na kʋ ban bon jaa na be a wɛr pɔ. 6Pʋpɛl lɛ kʋ banyã kɔ̃ nɩ kɔ̃nyũur na kpɛ yeltorsɩ jũu, ban tɩɩ naa. 7Pʋpɛl lɛ kʋ yɩn banyã na kaara nɩrɛ nɩbaal, Nãaŋmɩn mɩ na kãan a yɩ nɩbaal. 8Pʋpɛl lɛ kʋ banyã na nʋ̃ Nãaŋmɩn sɩrɛ, nɩ a ba nyãa wʋ jaa, bala lɛ na nyɛ Nãaŋmɩn. 9Pʋpɛl lɛ kʋ banyã na bʋɔrɔ nyã'maar, ban bʋɔlɔ ban Nãaŋmɩn bibiir. 10Pʋpɛl lɛ kʋ yɩn bala nɩbɛ na ge yeltorsɩ jũu, yɩn lɛ so a saaju nãalʋ̃ʋ. 11"Pʋpɛl lɛ kʋ yɩn a sɔ̃ɔ 'lɔ nɩbɛ na tʋrɔ yɩ, na ba gere yɩ, tɩ ŋmara jirsɩ 'yɛrɛ 'yɛr dɛbɛ 'yɔ̃ɔnɔ̃ yɩ, a maa jũu. 12Yɩ tara pʋpɛl, a yɩ sãyar bɛrma naa a saaju, lɛ nɩ wʋ ju lɛ ba dɔ̃ɔ ge a Nãaŋmɩn 'yɛ'yɛrbɛ na dɔ̃ɔ be be. 13"Yɩ kaara fɩka nyaar a wɛr pɔ, tɩchɛ a nyaar nʋ̃ɔ wa baar, ŋmɩnɛ ban lɛ ɩ wʋ ka wʋ lɛ nʋ̃mɔ̃ go? A maa lɛ tara tɔ̃nɔ̃ kʋ bon jaa ɛ, ba ma kpaar bar ka nɩbɛ nɛɛrɛ nɩ gbɛɛ. 14"Yɩ kaara fɩka chãa a wɛr pɔ. Yir ban mɛ tɔ̃ɔ ju kʋ̃ tʋ̃ɔ sɔɔl ɛ. 15Nɩrɛ maa chʋm fɩ̃tɩn de pɩɛ pɔɔ ɛ tɩchɛ wʋ ma bin a kuorgbe ju kʋ chaar yɔ̃ɔ nɩrɛ jaa a yir pɔ. 16Lɛ nɩ wʋ ju mɩ lɛ, yɩn lɛ ɩ chãa a yɩ taaba sɛ̃, ka ba na nyɛ a yɩ tʋ̃vɩɛlsɩ na ba pɛɛ a yɩ Sãa Nãaŋmɩn na be a saaju. 17"Yɩ ta tɩɛr ɩka n wan ɩka n wa sɔ̃ɔ a nɛbinãa bɩɩ, a Nãaŋmɩn 'yɛ'yɛrbɛ wiilfʋ bar ɛ, n ba wa ɩka n wa sɔ̃ɔ yaa bar ɛ, n wan ɩka n vɛ̃ ka a ɩ yelmɩ̃ɛ. 18Yelmɩ̃ɛ lɛ n 'yɛrɛ kʋrɔ yɩ, ɩka a saaju nɩ a wɛr ba wa baar ɛ, a sɛbir bile bʋ̃'yen gba kʋ̃ ir a nɛbinãa pɔ ɛ, tɩ ta a lɛ yele jaa na ɩ yelmɩ̃ɛ. 19A lɛ jũu, nɩrɛ jaa wa sɔ̃ɔ a nɛbinsɩ anyãna ɩ̃sʋɔ jaa tɩ wiil a wʋ taaba ka ba mɩ maala a lɛ, na ɩn a bile a saaju nãalʋ̃ʋ pɔ, tɩchɛ nyã jaa na maala tɩ wile bamɩne ka ba mɩ maala a lɛ, na ɩn kpɛ̃ɛ a saaju nãalʋ̃ʋ pɔ. 20N 'yɛrɛ na kʋrɔ yɩ, a yɩ yeltorsɩ ba wa tɩ gar a nɛɛ wiwiilbe nɩ a Faraseemɩne ɛ, yɩn ba be na wa kpɛ a saaju nãalʋ̃ʋ pɔ ɛ. 21"Yɩ wõn ban dɔ̃ɔ 'yɛr kʋ a sɩ sãakpãmɩne, 'Ta kʋ nɩrɛ ɛ,' nɩrɛ nyã na kʋ nɩrɛ na nyɛn 'yɛr tɔɔrfʋ. 22Tɩchɛ n 'yɛrɛ na kʋrɔ yɩ, ala ɩ fʋ nyɛn na yɛbɛ suur, wʋn nyɛn 'yɛr tɔɔrfʋ, ala ɩ fʋ tʋ̃n yɛbɛ na nyɛn 'yɛr tɔɔrfʋ a nɩbɛrɛ niem, fʋ̃ʋ wa 'yɛr nɩrɛ ɩka, jɔl nyã, na kpɛ̃n a bũu dagel 'lɔ pɔ. 23"Ala wa ɩ fʋ waara nɩ naa a fʋ kʋfʋ, a Nãaŋmɩn bɔɔr lofʋ jie na fʋ wa tɩɛr tɔ ɩka fʋ̃ʋ nɩ a yɛbɛ tara na 'yɛr, 24bar a fʋ bon a Nãaŋmɩn bɔɔr lofʋ jie tɩ lɩɛb chen tɩ 'maal a fʋ yɛbɛ tɩ pãa wa de a fʋ bon kʋ a Nãaŋmɩn. 25"An ɩ yɩn nɩ a yɩ sãn sʋɔ lɛ chiine a 'yɛr tɔɔrfʋ jie, yɩ mʋlɔ wʋ a sɔr pɔ, ka lɛ ba lɛ ɛ, wʋn de yɩn 'yɔ̃ɔ a 'yɛr tɔɔrɔ nũu pɔ, ka wʋ de yɩ kʋ a nɩpɔɔraa ka wʋ mɩ pɔɔ yɩ bar. 26Ala be a lɛ, faa be na wa yi ka fʋ̃ʋ ba wa yab a sãn baar ɛ. 27"Yɩ dɔ̃ɔ wõ ban 'yɛr ɩka ta gãn nɩrɛ pɔɔ bɩɩ sɩrɛ ɛ. 28Tɩchɛ n 'yɛrɛ na kʋrɔ yɩ, nɩrɛ nyã jaa na wa kaa pɔɔ jaa tɩ̃ɩɩ tɩ bʋɔrɔ na gãn wʋ, a nɩrɛ 'lɔ gãn wʋ naa a wʋ tɩɛr pɔ. 29Ala ɩ a fʋ nũsʋ̃ɔ nɩbir vɛ̃ naa ka fʋ ɩ yelbier, 'loo wʋ bar, a fʋ ɩ̃gãn lõboor ɩ̃sʋɔ na ba be be ɛ, sa naa a fʋ ɩ̃gãn wʋ jaa na kpɛ bũu pɔ. 30Ala ɩ a fʋ nũsʋ̃ɔ nũu mɩ lɛ vɛ̃ ka fʋ ɩ yelbier ɛ, ŋmaa wʋ 'lɔ bar, a fʋ ɩ̃gãn lõboor ɩ̃sʋɔ na ba be be ɛ, sa naa a fʋ ɩ̃gãn wʋ jaa na kpɛ bũu pɔ. 31"A mɩ dɔ̃ɔ 'yɛr ɩka, nɩrɛ nyã jaa na tɔr a wʋ pɔɔ bar, wʋ kʋ wʋ a pɔɔ bar gãn. 32Tɩchɛ n 'yɛrɛ na kʋrɔ yɩ ɩka, nɩrɛ nyã jaa na tɔr a wʋ pɔɔ bar, ala baa ɩ wʋ sɛ̃nɛ naa ɛ, vɛ̃n kʋ ɩ sɛ̃sɛ̃nɛ, nɩrɛ nyã jaa na kul a pɔɔ 'lɔ mɩ ɩn sɛ̃sɛ̃nɛ. 33"Yɩ mɩ lɛ wõn ban dɔ̃ɔ 'yɛr kʋ a sɩ sãakpãmɩne, 'Yɩ taa sɔ̃ɔnɔ̃ a nɛɛ 'lɔ yɩn põl 'yɔ̃ɔ a yɩ mɩ̃ɛ ɛ, tɩchɛ yɩ tara a lɛ yɩn põl 'yɔ̃ɔ a sɩ Soro.' 34Tɩchɛ n 'yɛrɛ na kʋrɔ yɩ, yɩ ta pɔ jaa ɛ, yɩ ta pɔn a saaju gba ɛ, bojũu Nãaŋmɩn jaa jie lɛ, 35bɩɩ a wɛr ju, a wʋ gbɛr dɔɔlfʋ jie lɛ bɩɩ Jerusalɛm ɛ, bojũu be lɛ a Nãkpɛ̃ɛ kpɩɛrɛ. 36Ta pɔn a fʋ ju ɛ, fʋ kʋ̃ tʋ̃ɔ vɛ̃ ka a fʋ jukɔɔl ɩ̃sʋɔ pɛl bɩɩ sɔb ɛ. 37Yɩ vɛ̃ ka a yɩ ɔ̃ɔ ɩ ɔ̃ɔ ka a yɩ kai ɩ kai, bon 'lɔ na gar a nɩtɔ̃ yin a dɛɛr sʋɔ sɛ̃. 38"Yɩ dɔ̃ɔ wõ ban 'yɛr ɩka nɩbir na yãan nɩbir sãn, ka nyɩm mɩ yaa nyɩm sãn. 39Tɩchɛ maa 'yɛrɛ na kʋrɔ yɩ, ta pii a nɩrɛ 'lɔ na sɔ̃ɔ fʋ sɔr ɛ. Tɩchɛ nɩrɛ wa 'ma fʋ a tʋkpal nyã pɔ, lɩɛb a nyã lɛ 'yɔ̃ɔ wʋ. 40Ka nɩrɛ wa bʋɔrɔ ɩka wʋ sɛb fʋ nãa yir tɩ de a fʋ fuu, kʋ wʋ a 'lɔ fʋn su, na fʋ yaa a pʋɔm bon pʋɔ wʋ. 41Nɩkpɛ̃ɛ wa fɩr fʋ ɩka fʋ de a wʋ tuor tuo chiin niem bɩ̃lãa, tuo chiin tɛɛr jaa. 42Kʋ nɩrɛ jaa na sʋɔr fʋ, ta mɔ̃ɔ nɩrɛ nyã mɩ na bʋɔrɔ ɩka wʋ pɛ̃ɛ a fʋ bon ɛ. 43"Yɩ wõn ban dɔ̃ɔ 'yɛr ɩka, yɩ nʋ̃ a yɩ tɔ sʋɔ tɩ 'laar a yɩ dɔ̃sʋɔ. 44Tɩchɛ maa 'lɔ 'yɛrɛ na kʋrɔ yɩ, nʋ̃ a yɩ dɔ̃dẽme tɩ sʋɔrɔ Nãaŋmɩn kʋrɔ a bala na gere yɩ, 45ka yɩ na ɩ Nãaŋmɩn bibiir bojũu 'lɔ lɛ ma vɛ̃ ka a mɔ̃tɔ̃ɔ pur 'yɔ̃ɔ a nɩdɛbɛ nɩ a nɩsʋ̃n tɩ na wʋ ma vɛ̃ ka saa wa 'yɔ̃ɔ a bala na tor nɩ a bala na ba tor ɛ. 46Yɩn nʋ̃ a bala na nʋ̃ yɩ tɛɛ, bo sãyar lɛ yɩn nyɛ? A lõpodierbe maa mɩ ɩ a lɛ bɩɩ? 47Yɩn ma puoro a bala tɛɛ na ɩ a yɩ nɩbɛ, bo tɔ̃nɔ̃ lɛ be be? A bala na ba ɩ a Juu nɩbɛ ɛ, maa mɩ ɩ a lɛ bɩɩ? 48Yɩ ɩ nɩmɩn a lɛ a yɩ sãa Nãaŋmɩn na be a saaju kaar.

will be added

X\