Matiu 28

1A Pɛ̃nfʋ Bɩbir na wa baar, ka a na ɩ a Pɛ̃nfʋ divɩɛ bio daar a wɛr na wa chaara wa la la la, Mɛɛr na yi a Magdala nɩ a Mɛɛr ɩ̃sʋɔ yin chen ɩka ba tɩ kaa a yaa. 2Be lɛ ka a tẽe dãm kpɛ̃ɔ jaa, ka a ɩ Nãaŋmɩn malaka lɛ yi a saaju suu wa bil a kʋsɩr bar a yaa nɛɛ tɩ do jɩ̃nɛ. 3A wʋ nie nyɩlɛ saa nyɩɩrfʋ kaar, ka a wʋ bʋ̃sursɩ pɛl jaa pɩlpɩl. 4Dãbɩ̃ɛ kpɛ̃n a bala na ara kaara, ka ba gĩem ara kũn kaar. 5A malaka 'yɛr kʋ a pɔbɔ, "Yɩ ta joro dãbɩ̃ɛ ɛ, n bɔ̃ɔn naa ɩka a Yesu 'lɔ ban kpa a daa ju lɛ yɩ bʋɔrɔ. 6Waa be ka ɛ. Wʋ ir naa ɩ vʋr nɩtãa a lɛ wʋn dɔ̃ɔ 'yɛr. Yɩ wa muul kaa a jie wʋn gã. 7Yɩ chen fɔɔ jaa na yɩ tɩ 'yɛr kʋ a wʋ poturbo, 'Wʋ lɩɛb ir a kũu pɔ, na wʋ de yɩ nie chiine a Galilee. Be lɛ yɩn tɩ nyɛ wʋ.' N pãa 'yɛr kʋ yɩ." 8A pɔbɔ banyãna yin a yaa par nɩ dãbɩ̃ɛ jo fɔɔ jaa nɩ pʋpɛl chen ɩka ba tɩ 'yɛr kʋ a wʋ poturbo. 9Be lɛ ka ajienaa, ka a ɩ Yesu lɛ tuor puor ba, ka ba lo kpa a wʋ niem nyɔɔ a wʋ gbɛɛ puor wʋ. 10Be lɛ a Yesu 'yɛr kʋ ba, yɩ ta joro dãbɩ̃ɛ ɛ, "Yɩ tɩ 'yɛr kʋ a n yɛɛr ɩka ba chen a Galilee, be lɛ ban tɩ nyɛ ma." 11A pɔbɔ na wa chiine, a sojasɩ bamɩne na dɔ̃ɔ guro a yaa kpɛ̃n a tẽkpɛ̃ɛ pɔ, tɩ 'yɛr kʋ a Juu nɩbɛ bɔɔrlo nɩbɛrɛ a lɛ jaa na ɩ. 12A bɔɔrlo nãa nɩ a wʋ nɩbɛrɛ na wa lɔ̃ɔ taa, ba guor taa de libiyɔɔ kʋ a sojasɩ 13tɩ na ba 'yɛr kʋ ba, "Yɩ 'yɛr ɩka, 'A wʋ poturbo lɛ wa ju a wʋ ɩ̃gãn a sɔ̃ɔ 'lɔ sɩn chɛnɛ gã guro.' 14Ala ɩ a 'yɛr nyã wa lon a Nãa Pilate toor pɔ, sɩn maal wʋ naa ka a wʋ pʋɔ pɛl a sɩ ir yɩ yin wõm pɔ." 15A sojasɩ den a libie tɩ na ba ɩ a lɛ ban 'yɛr ɩka ba ɩ. A Juu nɩbɛ ma chɛnɛ na 'yɛr a yele nyãna a dɩna. 16A poturbo pie nɩ bʋ̃'yen chen a Galilee a tɔ̃ɔ 'lɔ ju a Yesu na wiil ba ɩka ba do. 17Ban wa nyɛ wʋ, ba gbur dumo na ba puor wʋ tɩchɛ ka bamɩne chɛnɛ baala. 18Ka a Yesu wa 'yɛr kʋ ba, "A n Sãa den a kpɩ̃ɛn ala a jaa na be a saaju, nɩ a kpɩ̃ɛn ala a jaa na be a wɛr pɔ kʋ ma. 19A lɛ jũu, yɩ yɔ a wɛr wʋ jaa na yɩ tɩ 'yɔ̃ɔ paalsɩ ka ba wa turo ma, na yɩ suoro ba a Nãaŋmɩn kʋ̃ɔ, a Sãa yuor, nɩ a Bie yuor, nɩ a Nãaŋmɩn Sɩɛ yuor 'yɔ̃ɔ, 20tɩ na yɩ wile ba ka ba sɔɔ de, tɩ turo bon jaa ɩn 'yɛr kʋ yɩ. Yɩ bɔ̃ɔn ɩka ɩn ma ben a yɩ sɛ̃ sɔ̃ɔ jaa, tɩ tãn a wɛr baarfʋ daar."

will be added

X\