Matiu 27

1A wɛr na wa chaar bibio, a Juu nɩbɛ bɔɔrlo nɩbɛrɛ nɩ a nɩbɛrɛ ba jaa lɔ̃ɔ taa guor lɛ ban na ɩ kʋ a Yesu. 2Ba lũ wʋn tara chiin a paal Nãkpɛ̃ɛ Pilate sɛ̃. 3Judas na gar 'yɔ̃ɔ wʋ na wa nyɛ ɩka ba tɔɔr a Yesu 'yɛr guor a wʋ kʋfʋ, wʋ pʋɔ sɔ̃ɔ naa ka wʋ lɛ lɩɛb a libibie lɩjɛr nɩ pie na wʋ tɩ kʋ a Juu nɩbɛ bɔɔrlo nɩbɛrɛ nɩ a nɩbɛrɛ. 4Tɩ na wʋ 'yɛr, "N maal yelbier nɩ ɩn gar 'yɔ̃ɔ nɩrɛ na ba maal yelbier jaa ɛ." Tɩchɛ ka ba 'yɛr, "Sɩ baka ba lɛ ɛ? Fʋ 'yɛr a ɩ." 5Wʋ den a libie lɔb bar a Nãaŋmɩn puorfʋ yir pɔ, tɩ na wʋ yi tɩ yɔɔl miir. 6Ka a Juu nɩbɛ bɔɔrlo nɩbɛrɛ wob a libie na ba 'yɛr ɩka a ba sɛɛ ɩka sɩ de yaa 'yɔ̃ɔ a Nãaŋmɩn puorfʋ yir libie pɔ ɛ, bojũu a ɩn jɩ̃ɩ libie. 7Ban wa guor taa baar, ba den a libie dãn a lamɩɛr wɛr a jie ban ma ũno sãanba. 8Lɛ lɛ so ka nɩbɛ bʋɔlɔ a jie nyã, "Jɩ̃ɩ Wɛr," wa tãn dɩna. 9A ɩn yelmɩ̃ɛ nɩ a lɛ a Nãaŋmɩn 'yɛ'yɛrɛ Jeremiya na dɔ̃ɔ 'yɛr, "Ba den a libibie lɩjɛr nɩ pie a lɛ a Isɩral nɩbɛ na sɔɔ de, 10na ba dãn a lamɩɛr wɛr nɩtãa lɛ a sɩ Soro na 'yɛr." 11Yesu na wa ara a Nãkpɛ̃ɛ Pilate niem, wʋ sʋʋr wʋ naa, "Fʋ̃ʋ lɛ ɩ a Juu nɩbɛ nãa ɔ?" Ka a Yesu 'yɛr "Ɔ̃ɔ, a lɛ nɛ fʋn 'yɛr lɛ." 12A bɔɔrlo nɩbɛrɛ nɩ a nɩbɛrɛ na sɔ̃ɔnɔ̃ a wʋ yuor, waa 'yɛr 'yɛr jaa ɛ. 13Be lɛ a Pilate sʋʋr wʋ, faa 'yɛrɛ 'yɛr jaa wɛ? Nyɛ lɛ ban sɔ̃ɔnɔ̃ a fʋ yuor jɩ̃? 14Tɩchɛ a Yesu ba haa nɛɛ sɔɔ wʋ nɩ a ala a jaa ban 'yɛrɛ dɔɔlɔ wʋ ɛ, ka a 'maa a Pilate nɛɛ. 15A lɔ̃ɔ difʋ sɔ̃ɔ wa ta, ba ma 'yɛr ɩka a Nãkpɛ̃ɛ Pilate wʋ ir nɩrɛ 'lɔ a nɩbɛ na bʋɔrɔ a pɔɔ fʋ die pɔ bar. 16A sɔ̃ɔ 'lɔ̃nɔ̃, ba pɔɔn daputuo sʋɔ kɔ̃ɔ nɩrɛ jaa na bɔ̃ɔ ka wʋ di Barabasɩ. 17A lɛ a nɩyɔɔ na wa lɔ̃ɔ taa, Pilate sʋʋr ba naa, "An lɛ yɩ bʋɔrɔ ɩka n yuo kʋ yɩ, Barabasɩ bɩɩ Yesu, a 'lɔ ban bʋɔlɔ a Nɩ-iraa?" 18Bojũu wʋ bɔ̃ɔn naa ɩka a nyuur ban tara nɩ a Yesu lɛ so ban nyɔɔ wʋ waan a wʋ sɛ̃. 19A Pilate na wa jɩ̃nɛ a 'yɛr tɔɔrfʋ dakɔɔ ju, a wʋ pɔɔ tʋ̃n 'yɛr wʋ, "Taa ɩrɛ wa ɩrɛ a daba 'lɔ̃nɔ̃ na ba maal bon jaa yele jaa ɛ, bojũu jãa, n din dɔɔyɛ jãn pɔ nɩ a wʋ yele." 20Tɩchɛ a bɔɔrlo nɩbɛrɛ nɩ a nɩbɛrɛ 'yɛr kʋ a nɩyɔɔ ɩka ba sʋɔr ka wʋ yuo Barabasɩ bar, tɩ kʋ a Yesu. 21Ka a Nãa Pilate lɛ bɔ̃ɔ sʋʋr ba go, "A nɩbɛ banyã ayi, buor lɛ yɩ bʋɔrɔ ɩka n yuo kʋ yɩ?" Ka ba 'yɛr, "Barabasɩ." 22Ka a Nãa Pilate sʋʋr ba, "Tɩ n ɩ ŋmɩnɛ nɩ a 'lɔ yɩn bʋɔlɔ a Nɩ-iraa?" Ka ba jaa 'yɛr, "Kpa wʋ a daa ju." 23Ka wʋ sʋʋr ba, "Bo yelbier lɛ wʋ ɩ? Bo dɛɛr lɛ wʋ maal?" Tɩchɛ ka ba tãna kpɛ̃ɔ jaa 'yɛrɛ, "Kpa wʋ a daa ju." 24A Pilate na wa nyɛ bɔ̃ɔn ɩka wʋ kʋ̃ tʋ̃ɔ yele jaa ɩ ɛ, tɩchɛ ka a nɩbɛ wɩlɛwɩlɛ jaa tɩ gar, ka wʋ de kʋ̃ɔ pɛɛn a wʋ nuur a nɩyɔɔ niem, tɩ na wʋ 'yɛr, "Maa ba pʋɔ a daba nyã kũu pɔ ɛ. Yɩn sɛ̃ lɛ a be." 25Be lɛ ka a nɩbɛ ba jaa 'mataa 'yɛr, "Vɛ̃ ka a wʋ jɩ̃ɩ dɔɔl a sɩn nɩ a sɩ bibiir ju." 26Be lɛ wʋ yuo a Barabasɩ kʋ ba. Wʋ vɛ̃ naa ka ba fɔb a Yesu tɩ wʋ de wʋ kʋ a sojasɩ ka ban tɩ kpa a daa ju. 27Be lɛ ka a sojasɩ tara a Yesu tɩ kpɛ̃n a nãa yir kpɛ̃ɛ 'lɔ pɔ, tɩ bʋɔl a ba taaba sojasɩ lɔ̃ɔ taa. 28Ba yaar a wʋ bonsɩ bar tɩ de fuu jɩɛ su wʋ, 29na ba lɛ de gʋʋr wob nãa jupil kaar su wʋ. Ba den dãgbal 'yɔ̃ɔ wʋ a nũsʋ̃ɔ pɔ, na ba gbur dumo a wʋ niem laara wʋ, "Yãan yooo, Juu nɩbɛ nãa!" 30Ba ma chɩr nataar 'yɔ̃ɔ wʋ tɩ de daa ŋmen wʋ a ju pɔ. 31Ban wa la wʋ a nɩtɔ̃ wa baar, ba yãan a fuu jie 'lɔ bar tɩ de a wʋ mɩ̃ɛ fuu su wʋ, na ba pãa de wʋ chiin ɩka ba tɩ kpa a daa ju. 32Ban wa yi a sɔr pɔ, ba nyɛn daba na yi Sirenɩ ka a wʋ yuor di Simon, ka ba nyɔɔ wʋ fɩr wʋ ka wʋ tuo a Yesu daa. 33Ba tɩ tãn jie ban bʋɔlɔ Gɔlgɔta, a par lɛ ɩka, Julaa Jie. 34Ba den tɩ̃ɩtuo 'yɔ̃ɔ dãa pɔ ɩka a Yesu wʋ nyũ, tɩ wʋn wa lɛm kaa, wʋ tɔr bar. 35Ban wa kpa wʋ a daa ju baar, ba põ naa a wʋ fɔɔr ŋmen gbãm bɔ̃ɔn ala ɩ̃sʋɔ jaa nɩ na di, 36tɩ na ba jɩ̃nɛ a jie pire wʋ. 37Ba sɛb a yele 'lɔ jũu ban kʋn wʋ mar a daa ju ɩka, NYƐ A YESU, A JUU NƖBƐ NÃA. 38Ba mɩ kpan nɩfarba ayi a dabãbɩ̃nsɩ mɩ ju, ka ɩ̃sʋɔ be a Yesu nũsʋ̃ɔ jie ka ɩ̃sʋɔ mɩ be a wʋ gubaa jie. 39A bala na tala a be tʋrɔ wʋ, na ba vavire jur 40'yɛrɛ, "A fʋ̃ʋ na 'yɛr ɩka fʋn ŋmɛr a Nãaŋmɩn puorfʋ yir tɩ de ber ata mɛn, faa a fʋ mɩ̃ɛ. Ala ɩ fʋ ɩ naa a Nãaŋmɩn Bie, wa suu a daa ju." 41Lɛ nɩ wʋ ju mɩ lɛ a Juu nɩbɛ bɔɔrlo nɩbɛrɛ nɩ a nɛɛ wiwiilbe nɩ a nɩbɛrɛ mɩ laara wʋ, 42na ba 'yɛrɛ, "Wʋ faan nɩbɛ bamɩne, tɩ wʋ kʋ̃ tʋ̃ɔ faa a wʋ mɩ̃ɛ ɛ. 'Lɔ lɛ ɩ a Isɩral Nãa, wʋ wa suu a daa ju a pʋ̃pãanyãna, ka sɩ sɔɔ de wʋ. 43Wʋ sɔɔn Nãaŋmɩn. Vɛ̃ ka Nãaŋmɩn faa wʋ a pʋ̃pãanyãna, bojũu wʋ 'yɛr naa ɩka wʋ ɩn Nãaŋmɩn Bie." 44Lɛ nɩ wʋ ju mɩ lɛ a nɩfarba ayi bala mɩ ban kpa gbʋr wʋ, mɩ tʋ wʋ. 45A mɔ̃tɔ̃ɔ na wa ara gar ju sãlsɔɔ, a wɛr wʋ jaa sɔb naa tɩ tãn a mɔ̃tɔ̃ɔ balfʋ sɔ̃ɔ. 46A sɔ̃ɔ 'lɔ̃nɔ̃ a Yesu chɩɩr kpɛ̃ɔ jaa na wʋ 'yɛr, "Ɛloɩ, Ɛloɩ, lama sabakatanɩ." A par lɛ ɩka "N Nãaŋmɩn, n Nãaŋmɩn, bo lɛ so fʋn lɩɛb puor 'yɔ̃ɔ ma?" 47A nɩbɛ bala na ara gbʋr wʋ, na wa wõ a lɛ wʋn 'yɛr, ka ba 'yɛr ɩka, "Elaija lɛ wʋ bʋɔlɔ." 48Ajienaa ka a daba ɩ̃sʋɔ jo chen tɩ 'mɔɔ sapɔ 'lɔr a dãmiir amɩne pɔ, na wʋ char daa pɔ, de kʋ a Yesu ɩka wʋ mʋʋr. 49Tɩchɛ ka bamɩne 'yɛr, "Yɩ bar a sɩ kaara, Elaija na wa yɔɔ wʋ naa bɩɩ." 50Be lɛ a Yesu chɩɩr kpɛ̃ɔ jaa tɩ ŋmaa a vʋʋr. 51Ka a Nãaŋmɩn puorfʋ yir pɔ, ban lũ fɔbaa chɩɛr a saaju tɩ gbem a par. Ka a tẽe dãm, ka a kʋsɩbɛ mɩ ŋmɛr ŋmɛr. 52A yar mɩ yuo yuor, ka a Nãaŋmɩn nɩbɛ bamɩne na dɔ̃ɔ kpi, jɛɔ. 53Ban wa yi a ba yar pɔ a lɛ, ka a Yesu na wa ir a kũu pɔ baar, ka ba pãa kpɛ a tẽchɛchɛ pɔ, ka nɩyɔɔ jaa tɩ nyɛ ba. 54A sojasɩ nɩkpɛ̃ɛ nɩ a bala wʋn ara nɩ na ba pire a Yesu, nyɛn a wɛr na dãm nɩ a lɛ jaa na ɩ, ka dãbɩ̃ɛ kpɛ ba, ka ba 'yɛr, "Yelmɩ̃ɛ jaa lɛ, a daba nyã ɩn a Nãaŋmɩn Bie." 55Pɔɔ yɔɔ mɩ dɔ̃ɔ be a be ara tɛɛr jaa kaara, bala lɛ dɔ̃ɔ tu wʋ yin a Galilee na ba sʋ̃nɔ̃ wʋ. 56A pɔbɔ banyãna pɔ lɛ Mɛɛr na yi Magdala, nɩ Mɛɛr na ɩ Jemesɩ nɩ Josefʋ ma, nɩ a Jebedee bibiir ma. 57A jãanʋɔr na wa ta, a taraa sʋɔ kɔ̃ɔ na yɩ Arimatɩya ban bʋɔlɔ Josefʋ, wʋ mɩ dɔ̃ɔ ɩ a Yesu poturo. 58Wʋ chen a Pilate sɛ̃ tɩ sʋɔr a Yesu ɩ̃gãn. Ka a Pilate bar sɔr ka ba yɔɔ a Yesu kʋ wʋ. 59A Josefʋ yɔɔn a ɩ̃gãn pil fɔpɩla, 60kul tɩ ũu a wʋ mɩ̃ɛ yaa paalaa pɔ wʋn chɩ a kʋsɩr pɔ. Wʋ bil kʋsɩr wa pɔɔ a yaa nɛɛ tɩ na wʋ kul. 61Mɛɛr na yi Magdala nɩ a Mɛɛr ɩ̃sʋɔ ben be jɩ̃nɛ a yaa puor. 62A Chɔɔrfʋ Bɩbir ka a wɛr na chaar ka a ɩ a Pɛ̃nfʋ Bɩbir lɛ, a Juu nɩbɛ bɔɔrlo nɩbɛrɛ nɩ a Faraseemɩne chen tɩ 'yɛr a Nãkpɛ̃ɛ Pilate, 63"Nɩkpɛ̃ɛ, sɩ lɛ tɩɛr a lɛ a jir ŋmara 'lɔ̃nɔ̃ na dɔ̃ɔ 'yɛr wʋn dɔ̃ɔ chɛnɛ, 'Ɩka ber ata daar ɩn lɛ lɩɛb ir ɩ vʋr.' 64A lɛ jũu vɛ̃ ka ba gu a yaa tɩ tãn a ber ata daar, ka ala ba ɩ lɛ ɛ, a wʋ poturbo na chen tɩ ju a ɩ̃gãn a yaa pɔ, tɩ 'yɛr kʋ a nɩbɛ ɩka, 'lɔ lɛ ir a kũu pɔ, ka a bɛlfʋ taa ɩ dɛɛr gar a lɛ wʋn dɔ̃ɔ 'yɛr ɛ." 65Ka a Pilate 'yɛr, "Yɩ de gugurbo ka ba tɩ gu a yaa a lɛ yɩn bɔ̃ɔ." 66Be lɛ ba tara a gugurbo chiin ka ba tɩ bɛ a yaa bɔɔ pɔɔ, tɩ na ba 'yɔ̃ɔ a kʋsɩr jɩ̃nɛ, tɩ 'yɔ̃ɔ ka a gugurbo ara gu.

will be added

X\