Matiu 21

1Ban wa gbʋrɔ a Jerusalɛm nɩ a Betefagɩ a Olive Tɩɩr Tɔ̃ɔ ju, Yesu tʋ̃n a wʋ poturbo ayi, 2na wʋ 'yɛr kʋ ba, "Yɩ chen a tẽbile 'lɔ na be a yɩ niem, yɩn tɩ nyɛn bʋ̃ɔ ban lũ ka a bʋ̃pɔl ara kɔɔ wʋ, yɩ for yaa waan. 3Ala ɩ nɩrɛ wa sʋʋr yɩ naa, 'Ŋmɩnɛ a yɩ foro a bʋ̃ɔ?' Yɩ 'yɛr kʋ wʋ, 'A Sɩ Soro lɛ bʋɔrɔ yaa.' Wʋn bar sɔr ka yɩ foraa waan fɔɔ jaa." 4A yele anyã ɩ na ka a na ɩ yelmɩ̃ɛ a lɛ a Nãaŋmɩn 'yɛ'yɛrɛ na dɔ̃ɔ 'yɛr na wʋ 'yɛrɛ. 5"'Yɛr kʋ a Jerusalɛm nɩbɛ, 'Nyɛ, a yɩ nãa waara na a yɩ sɛ̃. Wʋ siir wʋ mɩ̃ɛ na wʋ do bʋ̃ɔ. Bʋ̃pɔl bile lɛ wʋ do waara nɩ.' " 6A poturbo chen tɩ tʋ̃ a lɛ a Yesu na 'yɛr ɩka ba ɩ. 7Ba waan na a bʋ̃ɔ nɩ a bʋ̃pɔl bile na ba de a ba fɔɔr 'yɩɛr dɔɔl, ka wʋ do jɩ̃nɛ a bʋ̃pɔl ju. 8Nɩyɔɔ 'yɩɛr a ba fɔɔr a sɔr pɔ ka bamɩne mɩ 'mɛl vaɩ 'yɩɛr a sɔr pɔ. 9A nɩyɔɔ bala na be a niem nɩ a bala na turo a puor chɩlɛ na 'yɛrɛ, "Yãan yooo, Nãa David Bie! Nãaŋmɩn wʋ sʋ̃ʋ a 'lɔ wʋn tʋ̃! Yãan yooo, dãnfʋ wʋ ta a saaju Nãaŋmɩn." 10Wʋn wa kpɛ a Jerusalɛm tẽe pɔ, a nɩbɛ ba jaa ɩrɛ na yulõbʋmm, na ba sʋrɔ, "An lɛ a nyã?" 11Ka a nɩyɔɔ bala na turo wʋ 'yɛr, "Nyã lɛ ɩ a Nãaŋmɩn 'yɛ'yɛrɛ, Yesu na yi a Najaretɩ na be Galilee." 12Yesu kpɛ naa a Nãaŋmɩn puorfʋ yir bɛchaar pɔ, na wʋ dire a bala na chiin a bonsɩ tɩ daara nɩ a bala na daara baraa, tɩ na wʋ dara a libitɛɛrbɛ tɛɛbʋlsɩ nɩ a bala na daara a papar dakɔɔr lɔɔrɔ. 13Wʋ 'yɛr kʋ ba, "A sɛb a Nãaŋmɩn gãn pɔ ɩka, 'A n yir na ɩ naa Nãaŋmɩn sʋɔrfʋ jie,' tɩchɛ 'Ka yɩn maal wʋ ka wʋ ɩ nãnyisɩ sɔɔlfʋ jie.' " 14Jɔ̃n nɩ gbɛrsɩ chen a be a Nãaŋmɩn puorfʋ yir ka wʋ sãa ba. 15Tɩchɛ a Juu nɩbɛ bɔɔrlo nɩbɛrɛ nɩ a nɛɛ wiwiilbe na nyɛ a nɛ'maa tʋ̃mɔ̃ wʋn tʋ̃ nɩ a bibiir na ɩrɛ a gɔ̃mɔ̃ a Nãaŋmɩn puorfʋ yir pɔ ɩka, "Yãan yooo! Nãa David Bie." Ka a ba pʋʋr sɔ̃ɔ. 16Ba sʋɔr a Yesu, "Fʋ wõn a lɛ a bibiir banyãna na 'yɛrɛ ɔ?" Ka wʋ 'yɛr, "Ɔ̃ɔ, yaa dɔ̃ɔ kar ɩka, 'A bibiir nɩ bipɩlɛ nɛgãma pɔ lɛ yɩ bʋɔrɔ pɛɛfʋ ɛ?' " 17Wʋ bar ba naa tɩ yi chen a Betanɩ tẽe pɔ tɩ gã a be. 18Wʋn wa lɩɛb chen a tẽkpɛ̃ɛ pɔ a bibio, kɔ̃ kpɛ wʋ naa. 19Wʋ nyɛn kɔ̃kɔ̃ɔ tɩɛ na ara a sɔr kõkoor, a wʋ chen tɩ ta ka wɔ̃mɔ̃ ba be be ɛ, tɩ wʋ ɩ va nara tɛɛ. Ka Yesu 'yɛr kʋ a tɩɛ, "Fʋ kʋ̃ lɛ wɔ̃ wɔ̃mɔ̃ go ɛ!" Ka a tɩɛ juɔl kpi ajienaa. 20A poturbo na wa nyɛ a tɩɛ na kpi, nɛɛr 'maa ba naa ka ba 'yɛrɛ, "Ŋmɩnɛ lɛ a tɩɛ ɩ juɔl ajienaa a lɛ?" 21Ka Yesu 'yɛr kʋ ba, "Yelmɩ̃ɛ lɛ n 'yɛrɛ kʋrɔ yɩ, yɩn tara sɔɔfʋ na yaa baal ɛ, a ba ɩ a lɛ na tʋ̃ kʋ a tɩɛ nyã tɛɛ lɛ yɩn tʋ̃ ɛ, tɩchɛ yɩn gba 'yɛr kʋ a tɔ̃ɔ nyãna, 'Ir suu a man pɔ,' tɩ wʋ̃n ir naa. 22Yɩn wa sʋɔr bon jaa tɩ tara sɔɔfʋ, yɩn nyɛ naa." 23Yesu na wa tɩ kpɛ a Nãaŋmɩn puorfʋ yir bɛchaar pɔ na wʋ wile, ka a Juu nɩbɛ bɔɔrlo nɩbɛrɛ nɩ a Juu nɩbɛrɛ wa a wʋ sɛ̃ a sɔ̃ɔ 'lɔ wʋn wile wa sʋʋr wʋ, "Bo kpɛ̃ɔ lɛ fʋ de tʋ̃nɔ̃ nɩ a anyã nɩ an lɛ kʋ fʋ a sɔr ɩka fʋ tʋ̃nɔ̃ nɩ a anyã?" 24Ka a Yesu 'yɛr kʋ ba, "N mɩ na sʋʋr yɩn sʋʋrfʋ bʋ̃'yen. Yɩn wa tʋ̃ɔ wiil ma a par, n mɩ na wiil yɩ naa a nɩrɛ 'lɔ na kʋ ma a kpɛ̃ɔ ka tʋ̃nɔ̃ nɩ a anyãna. 25A Jɔɔn na dɔ̃ɔ suoro a nɩbɛ a Nãaŋmɩn kʋ̃ɔ, Nãaŋmɩn lɛ kʋ wʋ a sɔr bɩɩ nɩbɛ lɛ kʋ wʋ a sɔr? Yɩ 'yɛr n kaa?" Ka ba piel chɩrɛ taa, "Sɩn be 'yɛr ɩka Nãaŋmɩn lɛ tʋ̃ wʋ wʋn sʋʋr sɩ naa ka bo lɛ so ka saa sɔɔ de wʋ ɛ? 26Tɩchɛ sɩn mɩ 'yɛr ɩka nɩrɛ lɛ tʋ̃ wʋ a ba ɩ ɛ, sɩ joro naa a nɩbɛ dãbɩ̃ɛ bojũu nɩrɛ jaa sɔɔ naa ɩka a Jɔɔn ɩn Nãaŋmɩn 'yɛ'yɛrɛ." 27Be lɛ a ba 'yɛr kʋ a Yesu, "Saa bɔ̃ɔ ɛ." Ka a Yesu mɩ 'yɛr kʋ ba, "N mɩ kʋ̃ 'yɛr kʋ yɩ a nɩrɛ 'lɔ na kʋ ma a kpɛ̃ɔ ka n tʋ̃nɔ̃ nɩ a anyãna ɛ." 28Ka a Yesu 'yɛr kʋ ba, "Ŋmɩnɛ lɛ yɩ tɩɛr? Daba lɛ tara bibiir ayi, na wʋ chen tɩ 'yɛr kʋ a dɔ̃ɔ sʋɔ, 'N Bie chen tɩ tʋ̃ a n puo tʋ̃mɔ̃ a dɩna.' 29Ka wʋ 'yɛr, 'N kʋ̃ chen ɛ,' tɩchɛ na wʋ ta sɔ̃ɔ lɩɛb a wʋ tɩɛr na wʋ chen. 30A sãa lɛ chen tɩ 'yɛr kʋ a ayi sʋɔ a lɛ nɩ wʋ ju mɩ, ka wʋ 'yɛr, 'N chen naa,' tɩ na wʋ tɔr. 31"A bibiir banyãna ayi, buor sʋɔ lɛ tʋ̃ a wʋ sãa bɔfʋ?" Ka ba 'yɛr, "A dɔ̃ɔ sʋɔ lɛ." Ka Yesu 'yɛr kʋ ba, "Yelmɩ̃ɛ jaa lɛ n 'yɛrɛ kʋrɔ yɩ a lõpodierbe nɩ a pɔɔ baar na dɔ̃ɔ yɩn nie kpɛ a Nãaŋmɩn nãalʋ̃ʋ pɔ. 32Jɔɔn Kɔ̃suoro wan wa wile yɩ a yelmɩ̃ɛ sɔr ka yaa sɔɔ de wʋ ɛ, tɩchɛ a lõpodierbe nɩ a pɔɔ baar sɔɔn de wʋ, yɩn sɔɔ wa nyɛ gba yaa lɩɛb a yɩ tɩɛr sɔɔ de wʋ ɛ. 33"Yɩ lɛ chɛlɛ a sʋkpa ɩ̃sʋɔ. Daba lɛ kɔ wʋ puo na wʋ. Wʋ wɔɔn a puo wʋ jaa jilʋ̃, na wʋ tuu bɔɔ ka ban ma pɔr a wɔ̃mɔ̃ 'yɔ̃ɔnɔ̃ na ba nɛŋmɛr ir a kʋ̃ɔ. Wʋ mɛn jie ɩ̃sʋɔ na do ka nɩrɛ na ma do jɩ̃nɛ a be kaara a puo. Wʋ den a puo kʋ nɩbɛ ɩka ba kaara tɩ na wʋ yɔ chen paal yuo pɔ. 34A pɔrfʋ sɔ̃ɔ na wa ta, wʋ tʋ̃n a wʋ gbãgbaar ɩka ba chen a nɩbɛ bala sɛ̃ tɩ pɔr a tɩɛ wɔ̃mɔ̃. 35"Tɩchɛ ka a nɩbɛ bala nyɔɔ a wʋ gbãgbaar ŋme a ɩ̃sʋɔ, na ba kʋ a ɩ̃sʋɔ tɩ na ba lɔb a ɩ̃sʋɔ nɩ kʋsɩbɛ kʋ. 36Be lɛ wʋ lɛ tʋ̃ a gbãgbaar bamɩne ka ba ge ba a lɛ nɛ nɩ wʋ ju. 37A baaraa lɛ wʋ tʋ̃ a wʋ mɩ̃ɛ bie a ba sɛ̃ na wʋ 'yɛr, 'Ban 'yɔ̃ɔ naa a n bie.' 38"Tɩchɛ a pokaarba na wa nyɛ a bie, ba 'yɛr kʋ taa, 'Nyã lɛ ɩ a bʋ̃dire, yɩ ɩ a sɩ kʋ wʋ tɩ de a bonsɩ.' 39Be lɛ ba nyɔɔ wʋ kʋ lɔb bar a puo kõkoor. 40"Pʋ̃pãanyã a puo sʋɔ wa wa, ŋmɩnɛ lɛ wʋn ɩ a pokaarba banyãna?" 41Ka ba 'yɛr kʋ wʋ, "Wʋn wan wa kʋ a pokaarba banyã ba jaa tɩ de a puo kʋ nɩyor, a bala na ma sɔɔ ka ba põ a puo bonsɩ a ŋmafʋ sɔ̃ɔ." 42Yesu 'yɛr kʋ ba, "Yaa kar a jie nyã a Nãaŋmɩn gãn na 'yɛr ɩka a, 'A kʋsɩr 'lɔ a mɩmɩɛrbɛ na tɔr bar lɛ ɩ a kʋsɩr ju. A sɩ Soro lɛ tʋ̃ a nɩtɔ̃ ka a sɔb sɩ a nɩbie.' 43"A lɛ jũu n 'yɛrɛ na kʋrɔ yɩ, Nãaŋmɩn na faan a wʋ nãalʋ̃ʋ yin a yɩ sɛ̃ kʋ a nɩyor bala na sɔɔ wʋ. 44Nɩrɛ nyã na lo a kʋsɩr nyã ju na pʋrpʋr a, tɩchɛ a wʋ mɩ na kʋ nɩrɛ nyã ju wʋn lo dɔɔl." 45A Juu nɩbɛ bɔɔrlo nɩbɛrɛ nɩ a Faraseemɩne na wa wõ a wʋ sʋkpar anyãna, ba bɔ̃ɔn naa ɩka bala lɛ wʋ lɔɔrɔ a sʋkpar gbɛɛrɛ nɩ. 46Ka ba bʋɔrɔ na sɔr ɩka ba nyɔɔ wʋ, tɩ na ba joro a nɩyɔɔ dãbɩ̃ɛ bojũu ba nyɛn ka wʋ ɩ Nãaŋmɩn 'yɛ'yɛrɛ.

will be added

X\