Matiu 20

1"Nãaŋmɩn nãalʋ̃ʋ nyɛntãan fɩka daba kɔ̃ɔ na dɔ̃ɔ ŋmaa ir bibio jaa pipi yi ɩka wʋ tɩ bɔ nɩbɛ ka ba chen tɩ kɔ wʋ puo pɔ. 2Wʋ sɔɔ naa ɩka wʋn yab ba naa a lɛ ban na de a bɩbir gbul ka wʋ tara ba chiin a wʋ puo pɔ. 3"A mɔ̃tɔ̃ɔ nɩ lɛ wa do bɩ̃lãa wʋ yɩn tɩ nyɛ a nɩbɛ bamɩne na ara a daa pɔ na baa maala bon jaa ɛ. 4Ka wʋ 'yɛr kʋ ba, 'Yɩ mɩ chen a n puo pɔ tɩ ɩn yab yɩn naa a lɛ jaa na sɛɛn.' 5Ka ba sɔɔ chen. Tɩ wʋ lɛ yɩ go a mɔ̃tɔ̃ɔ na wa vɩrʋ̃ gar ju sãlsɔɔ nɩ a mɔ̃tɔ̃ɔ na wa suro a tɩɩr pɔ na wʋ tɩ bɔ a nɩbɛ bamɩne mɩ. 6A jãanɔ'maar sɔ̃ɔ, wʋ lɛ yin tɩ nyɛ bamɩne mɩ na chɛnɛ jɛ̃ pɔrɔ jaa. Ka wʋ sʋʋr ba, 'Bo lɛ so a dɩna yɩn jɩ̃nɛ ba maala bon jaa ɛ?' 7A ba 'yɛr, 'Nɩrɛ jaa ba sʋɔr sɩ kɔb ɛ.' Ka wʋ 'yɛr kʋ ba, 'Yɩ wa a sɩ chen a n puo pɔ a yɩ tɩ kɔ.' 8"Jãanʋɔr na wa ta, a puo sʋɔ 'yɛr kʋ a nɩrɛ 'lɔ na kaara a wʋ puo, 'Bʋɔl a tʋ̃tʋ̃nbɔ kʋ ba a ba libie, de nie piel a bala na bɩɛr wa tɩ tãn a bala na dɔ̃ɔ nie wa.' 9"A bala na wa bɩɛr wa ɩ̃sʋɔ jaa den a bɩbir gbul libir. 10A dɔ̃ɔ nie dẽme na wa tɩ wa, ba tɩɛr ɩka ban nyɛn gar a lɛ, tɩchɛ a wʋ kʋ ɩ̃sʋɔ jaa mɩ bɩbir gbul libir. 11Tɩchɛ ban wa de a lɛ baar, ba vʋ̃n nɛɛr 'yɔ̃ɔ a puo sʋɔ, 12na ba gɔ̃ɔnɔ̃ a puo sʋɔ 'yɛrɛ, 'A nɩbɛ banyãna wa bɩɛr wa tɩ fʋ yab sɩ jɩ̃taa, nɩ sɩn na ŋmaa ir nɩ ɔɔr wa tʋ̃ lɛ̃ɛɛ ka mɔ̃tɔ̃ɔ ŋme sɩ tɩ mʋrʋ̃.' 13"Ka wʋ lɩɛb sʋʋr a ba ɩ̃sʋɔ, 'N badaba, n ba ɩ fʋ dɛɛr ɛ, a ba ɩ yɩn lɛ sɔɔ ɩka yɩn den a bɩbir gbul libir ɛ? 14De a fʋ libir chiine. Maa lɛ nʋ̃ naa kʋ a puor dẽme nɩtãa a lɛ ɩn kʋ yɩ. 15N ba tara sɔr na de a n libie ɩn a lɛ ɩn bʋɔrɔ bɩɩ? Bɩɩ fʋ tara nyuur nɩ a n maal vɩla?' 16"A lɛ jũu, a puor dẽme na wa ben niem ka a nie dẽme mɩ wa be a puor." 17Yesu na wa pãa duoro a Jerusalɛm, wʋ tara na a poturbo pie nɩ ayi yin chɛ̃chɛ̃ɛ na wʋ tɩ 'yɛr kʋ ba, 18"Nyɛ, sɩ ben duoro a Jerusalɛm ka ban tɩ de a maa Nɩsaal Bie 'yɔ̃ɔ a Juu nɩbɛ bɔɔrlo nɩbɛrɛ nɩ a nɛɛ wiwiilbe nuur pɔ. 19Ban de man kʋ a bala na ba ɩ a Juu nɩbɛ ɛ, ka ba la ma, tʋrɔ ma, chɩrɛ nataar 'yɔ̃ɔnɔ̃ ma, na ba ge ma, tɩ kʋ ma, ka a ber ata daar ka n ir ɩ vʋr go." 20Be lɛ ka Jebedee pɔɔ tara a wʋ bibiir ayi waan a wʋ sɛ̃ wa lo gbur dumo a wʋ niem na wʋ sʋɔrɔ bon kɔ̃ɔ. 21Ka a Yesu sʋʋr wʋ, "Bo lɛ fʋ bʋɔrɔ?" Ka wʋ 'yɛr, "Vɛ̃ ka a n bibiir banyã ayi ka ɩ̃sʋɔ jɩ̃nɛ a fʋ nũsʋ̃ɔ ka ɩ̃sʋɔ mɩ jɩ̃nɛ a fʋ gʋbaa jie a fʋ nãalʋ̃ʋ pɔ." 22Ka a Yesu 'yɛr, "Faa bɔ̃ɔ a bon 'lɔ fʋn sʋɔrɔ ɛ. Ban tʋ̃ɔ nyũn a dɔɔyɛ ŋmele 'lɔ ɩn na nyũn ɔ?" Ka ba 'yɛr, "Sɩn tʋ̃ɔ naa." 23Ka a Yesu 'yɛr kʋ ba, "Yɩn tʋ̃ɔ nyũn a n ŋmele tɩchɛ maa kʋ̃ tʋ̃ɔ 'yɛr a buor sʋɔ na jɩ̃nɛ a n nũsʋ̃ɔ bɩɩ a n gʋbaa jie ɛ, ka a bala a n Sãa na chɔɔr kʋ tɛɛ ba lɛ ɛ." 24A poturbo pie bala na wa wõ a nɩtɔ̃, ba nyɛn naa a yɛɛr ayi bala suur. 25Ka a Yesu bʋɔl ba waan wa 'yɛr, "Yɩ bɔ̃ɔn na ɩka a bala na kaara a nɩbɛ bala na ba ɩ a Juu nɩbɛ lɛ kaara ba bon jaa pɔ, ka a ba nɩbɛrɛ tʋ̃ɔ ba. 26A kʋ̃ tʋ̃ɔ be a lɛ a yɩ pɔ ɛ, tɩchɛ nɩrɛ 'lɔ na bʋɔrɔ ɩka wʋ ɩ a yɩ kpɛ̃ɛ, wʋ ɩ a yɩ tʋ̃tʋ̃nɔ̃. 27Nɩrɛ 'lɔ mɩ na bʋɔrɔ ɩka wʋ ɩ a yɩ nɩdiere, wʋ ɩ a yɩ gbãgbaa. 28Nɩtãa lɛ a maa Nɩsaal Bie na ba wa ɩka ba tʋ̃nɔ̃ kʋrɔ ma ɛ, tɩchɛ ka wʋ ɩ a tʋ̃tʋ̃nɔ̃ na wʋ de a n nyɛvʋr faan nɩyɔɔ yelbier bar." 29Yesu nɩ a wʋ poturbo na wa yire a Jeriko nɩyɔɔ turo wʋ naa. 30Ka a jɔ̃n ayi jɩ̃nɛ a sɔr kõkoor. Ban wa wõ ɩka Yesu lɛ tala, ka ba gboolo, "Sɩ Soro, David Bie wooo ɩ, kaa a sɩ nɩbaal." 31Ka a nɩyɔɔ 'yɛr ɩka ba bar gɔ̃mɔ̃ tɩchɛ ka ba chɛnɛ gboolo, "Sɩ Soro, David Bie wooo ɩ, kaa a sɩ nɩbaal." 32Yesu ara na tɩ bʋɔl ba sʋrɔ, "Bo lɛ yɩ bʋɔrɔ ɩka n maal kʋ yɩ?" 33Ka ba 'yɛr kʋ wʋ, "Sɩ Soro, sɩ bʋɔrɔ na ɩka sɩ nyɛrɛ." 34Nɩbaal kpɛ̃n a Yesu, ka wʋ sɩɩr a ba nɩbie, ka ba nyɛrɛ na ba turo wʋ.

will be added

X\