Matiu 19

1Yesu na wa 'yɛr a anyã baar, wʋ yin a Galilee chen Judiya paal pɔ, a Jordan man gɔ̃ɔn. 2Nɩyɔɔ turo wʋ naa, ka wʋ sãa a ba baalsɩ a be. 3Faraseemɩne bamɩne wan a wʋ sɛ̃ ɩka ba wa bɛɛr wʋ kaa, na ba sʋʋr wʋ, "Sɔr ben be ɩka daba wʋ bar a wʋ pɔɔ yele kɔ̃ɔ jũu bɩɩ?" 4Ka Yesu 'yɛr, "Yaa kar a be a nɩrɛ 'lɔ na maal ba a pielfʋ daar 'Maal daba nɩ pɔɔ' ", 5na wʋ 'yɛr, "A lɛ jũu, daba na bar a wʋ sãa nɩ a wʋ ma, tɩchɛ ka 'lɔ nɩ a wʋ pɔɔ ɩ bʋ̃'yen, ka ba jaa ayi ɩ ɩ̃gãn bʋ̃'yen? 6Baa lɛ chɛnɛ ɩ ayi ɛ, tɩchɛ ba ɩn ɩ̃gãn bʋ̃'yen. A lɛ jũu, bon 'lɔ Nãaŋmɩn na 'mataa, nɩrɛ wʋ ta oor aa ɛ." 7Ka ba sʋʋr wʋ, "Ŋmɩnɛ ka a Mosesɩ 'yɛr ɩka sɩ kʋ wʋ pɔɔ bar gãn, tɩ bar wʋ?" 8Ka wʋ 'yɛr kʋ ba, "Bojũu a yɩ nyãkpɩ̃ɛn jũu lɛ so ka a Mosesɩ bar a sɔr ɩka, yɩ bar a yɩ pɔbɔ, tɩchɛ a pielfʋ daar a ba dɔ̃ɔ be a lɛ ɛ. 9A lɛ jũu, n 'yɛrɛ na kʋrɔ yɩ, nɩrɛ 'lɔ jaa na bar a wʋ pɔɔ, ka ala ba ɩ sɛ̃fʋ jũu tɩ kul pɔɔ yuo, wʋ sɔ̃ɔn a kul taa." 10A wʋ poturbo 'yɛr kʋ wʋ, ala ɩ lɛ lɛ a be a daba nɩ a wʋ pɔɔ, a ba sɛɛ ɩka nɩrɛ wʋ kul pɔɔ ɛ. 11Tɩchɛ ka wʋ 'yɛr kʋ ba, "Nɩrɛ jaa kʋ̃ tʋ̃ɔ sɔɔ a wiilfʋ nyã ka a bala a Nãaŋmɩn na vɛ̃ a ba bɔ̃ɔ a par tɛɛ ba lɛ ɛ. 12Bamɩne ben be na ba dɔɔr ɛ, an ɩ lɛ lɛ ba dɔɔ ba ka be, ka bamɩne mɩ a ba taaba lɛ maal ba ka baa dɔɔr ɛ, ka bamɩne mɩ tɔr a kul taa a Nãaŋmɩn nãalʋ̃ʋ jũu, 'lɔ jaa nɩ na tʋ̃ɔ sɔɔ a wiilfʋ nyã, wʋ sɔɔ." 13Nɩbɛ waan na bibiir ɩka wʋ dɔɔl ba a wʋ nũu na wʋ sʋɔr Nãaŋmɩn kʋ ba. Tɩchɛ a poturbo mɩɩn 'yɔ̃ɔ a bala na waan ba. 14Ka a Yesu 'yɛr, "Yɩ bar a bibiir sɔr ka ba wa a n sɛ̃, yɩ ta pii ba sɔr ɛ, a banyã taaba lɛ so a Nãaŋmɩn nãalʋ̃ʋ." 15Wʋ dɔɔl ban a wʋ nuur sʋɔr Nãaŋmɩn kʋ ba, tɩ chen. 16Be lɛ ka nɩrɛ ɩ̃sʋɔ wa a wʋ sɛ̃ wa sʋʋr, "Wiwile, bo yelvɩla lɛ ɩn ɩ naa nyɛ nyɛvʋr na ba tara baarfʋ ɛ?" 17Ka a Yesu sʋʋr, "Ŋmɩnɛ a fʋ sʋrɔ ma bon 'lɔ na ɩ vɩla? Nɩbʋ̃'yen tɛɛ lɛ ɩ nɩbie. Ala ɩ fʋ bʋɔrɔ na ɩka fʋ nyɛ nyɛvʋr turo a nɛbinsɩ." 18Ka daba sʋʋr wʋ, "A boo?" Ka Yesu 'yɛr, "Ta kʋ nɩrɛ ɛ, ta sɛ̃ ɛ, ta ju ɛ, ta di jir dãasɩɛ ɛ, 19'yɔ̃ɔnɔ̃ a fʋ sãa nɩ a fʋ ma, na fʋ mɩ lɛ nʋ̃ a fʋ tɔ sʋɔ a fʋ mɩ̃ɛ kaar." 20Ka a daba 'yɛr kʋ wʋ, "N tu naa anyãna a jaa, bo lɛ chɛ ma?" 21Ka a Yesu 'yɛr kʋ wʋ, "Ala ɩ fʋ bʋɔrɔ na ɩka fʋ ɩ chɛchɛ, tɩ de a fʋ bʋ̃tarsɩ a jaa da, na fʋ de a libie kʋ a nɔ̃n dẽme, fʋn nyɛn a Nãaŋmɩn nãalʋ̃ʋ tɩ na fʋ wa turo ma." 22A daba na wa wõ a nɩtɔ̃, wʋ chiin naa pʋsɔ̃ɔ bojũu wʋ tara na bʋ̃tarsɩ. 23Ka Yesu 'yɛr kʋ a wʋ poturbo, "Yelmɩ̃ɛ lɛ n 'yɛrɛ yɩ, an ɩn kpɛ̃ɔ tara sʋɔ na kpɛ a Nãaŋmɩn nãalʋ̃ʋ pɔ. 24Sɩrɛ jaa lɛ n 'yɛrɛ kʋrɔ yɩ go, an ɩn kɔ̃mɔ̃kɔ̃mɔ̃ ka nyɔɔma na kpɛ kparpĩi bɔɔ pɔ gar tara sʋɔ na kpɛ a Nãaŋmɩn nãalʋ̃ʋ pɔ." 25A poturbo na wa wõ a nɩtɔ̃, nɛɛ 'maa ba naa ka ba sʋrɔ, "An lɛ na pãa nyɛ faafʋ?" 26Ka Yesu kaa ba tɩ 'yɛr, "Ala na ɩ tuo nɩrɛ sɛ̃, Nãaŋmɩn sɛ̃ yele jaa ba ɩ tuo ɛ." 27A Pita 'yɛr kʋ wʋ, "Nyɛ sɩn bar bonsɩ a jaa tɩ wa turo fʋ? Bo sãyar lɛ sɩn nyɛ?" 28Yesu 'yɛr kʋ ba, "Yelmɩ̃ɛ lɛ n 'yɛrɛ kʋrɔ yɩ, a bonsɩ a jaa bʋ̃paalaa lɩɛbfʋ daar, a maa Nɩsaal Bie na jɩ̃nɛ naa a tɩɩr nãalʋ̃ʋ dakɔɔ ju. Ka a yɩn bala mɩ na turo ma mɩ jɩ̃nɛ a nãa dakɔɔ pie nɩ ayi ju, tɔɔrɔ a Isɩral bala pie nɩ ayi 'yɛr. 29Nɩrɛ nyã jaa na bar a wʋ yir bɩɩ yɛɛr bɩɩ yɛpɔbɔ, bɩɩ sãa, bɩɩ ma, bɩɩ bibiir, bɩɩ puo a maa jũu na nyɛn dɔɔltaa gbɛɛ kɔbaa tɩ tara nyɛvʋr na ba tara baar fʋ ɛ. 30Tɩchɛ a nɩyɔɔ na de a nie na wa ben puor, tɩchɛ ka a puor dẽme nɩ wa de a nie.

will be added

X\