Matiu 18

1A sɔ̃ɔ 'lɔ̃nɔ̃ lɛ a poturbo wa a Yesu sɛ̃ na ba wa sʋʋr, "An lɛ ɩ kpɛ̃ɛ gar ba jaa a Nãaŋmɩn nãalʋ̃ʋ pɔ?" 2Wʋ bʋɔl bibile na wʋ vɛ̃ a wʋ ara a ba pɔ, 3tɩ wʋ 'yɛr, "Yelmɩ̃ɛ lɛ n 'yɛrɛ kʋrɔ yɩ, yɩn baa lɩɛb na yɩ kaara fɩka bibiir kaar ɛ, yɩ kʋ̃ tʋ̃ɔ kpɛ a Nãaŋmɩn nãalʋ̃ʋ pɔ ɛ. 4A lɛ jũu, nɩrɛ 'lɔ na sɩɩr wʋ mɩ̃ɛ a bibile nyãna kaar, lɛ ɩ a kpɛ̃ɛ gar ba jaa a Nãaŋmɩn nãalʋ̃ʋ pɔ. 5"Nɩrɛ 'lɔ jaa na de a bibile nyãna a n jũu, maa lɛ wʋ de. 6Tɩchɛ, ala ɩ ɩ̃sʋɔ jaa mɩ vɛ̃ naa a bʋ̃bile nyãna na sɔɔ ma ɩ yelbier, a nɩnyɩnɛ 'lɔ̃nɔ̃, bala 'mɔɔ nɩɛr lũ yɔɔl a wʋ nyĩe pɔ daa 'yɔ̃ɔ a man pɔ, ala sa. 7"Nɛbier lɛ kʋ a wɛr, a bɛɛr kaa na vɛ̃ ka ba ɩ yelbier. Bɛɛr kaa na wa naa, tɩchɛ nɛbier lɛ kʋ a nɩrɛ 'lɔ 'yɔ̃ɔ an tu wa! 8Ala ɩ a fʋ nũu bɩɩ gbɛr vɛ̃ naa ka fʋ ɩ yelbier, ŋmaa wʋ lɔb bar. Fʋn tɩ kpɛ a nyɛvʋr pɔ nɩ nũŋmaa bɩɩ gbɛŋmaa sãn fʋn tara a nuur nɩ a gbɛɛ a jaa ayi tɩ na fʋ tɩ kpɛ a wõm jie a be a bũu na ba kpĩine ɛ. 9Ala ɩ a fʋ nɩbir mɩ vɛ̃ naa ka fʋ ɩ yelbier, 'loo lɔb bar. Fʋn tɩ kpɛ a Nãaŋmɩn nãalʋ̃ʋ pɔ nɩ nɩbifɩɛ sa naa fʋn tara a nɩbie ayi tɩ na fʋ tɩ kpɛ wõm jie. 10"Yɩ bɔ̃ɔn sʋ̃ na yɩ taa kaara a bʋ̃bil banyãna ɩ̃sʋɔ pɔrɔ ɛ, yelmɩ̃ɛ jaa lɛ n 'yɛrɛ kʋrɔ yɩ a ba malakasɩ ben a saaju ma kaara a n Sãa niem. 12"Bo lɛ yɩ tɩɛr? Ala ɩ a nɩrɛ ɩ̃sʋɔ tara na piir kɔbaa, ka bʋ̃'yen wa bɔr, a ba ɩ wʋn bar a kɔbaa forbir ala a pɛchiin baa pɔ, tɩ yʋɔrɔ bʋɔrɔ a bʋ̃'yen 'lɔ tɩ tãn a sɔ̃ɔ 'lɔ jaa wʋn na tɩ nyɛ wʋ bɩɩ? 13Yelmɩ̃ɛ lɛ n 'yɛrɛ kʋrɔ yɩ, 'lɔ wa nyɛ wʋ, nʋ̃ɔ ma kpɛ wʋ naa gar a kɔbaa forbir ala na ba bɔr ɛ. 14Lɛ nɩ wʋ ju mɩ lɛ ɩka a ba ɩ a yɩ Sãa saaju bɔfʋ ɩka a bʋ̃bil banyãna ɩ̃sʋɔ wʋ bɔr ɛ. 15"Ala ɩ a fʋ yɛbɛ ɩ̃sʋɔ ɩ fʋn yelbier, chen tɩ wiil wʋ a wʋ sɔ̃ɔnaa fʋ̃ʋ nɩ a 'lɔ tɛɛ. 'Lɔ wa sɔɔ a wʋ bɔrfʋ, yɩ lɛ ɩn yɛɛr go. 16Tɩchɛ 'lɔ ba wa sɔɔ a fʋ 'yɛr ɛ, tara nɩbʋ̃'yen bɩɩ nɩbɛ ayi chiin, ka a nɩbɛ ayi bɩɩ nɩbɛ ata di a 'yɛr dãasɩɛ. 17'Lɔ wa tɔr a nɩbɛ bala niem, 'yɛr kʋ a pupuorbiir, ka 'lɔ wa chɛnɛ tɔr na waa tu a ba nɛɛ ɛ, fʋ maal wʋ fɩka a lɛ fʋn na maal a nɩyuo, bɩɩ a lõpodier kaar. 18"Yelmɩ̃ɛ lɛ n 'yɛrɛ kʋrɔ yɩ, bon 'lɔ jaa yɩn lũ ka a wɛr pɔ, mɩ lũn a saaju bon 'lɔ yɩn lor bar a wɛr pɔ a mɩ lor bar a saaju. 19"Yelmɩ̃ɛ lɛ n 'yɛrɛ kʋrɔ yɩ, a yɩ nɩbɛ ayi tara sɔɔfʋ sʋɔr bon jaa, a n Sãa na be a saaju na kʋ yɩ naa. 20Jie 'lɔ nɩbɛ ayi bɩɩ ata na ara nɩ a maa yuor, n ben a ba pɔ." 21Pita wan wa sʋʋr wʋ, "N Soro, ala ɩ a n tɔ sʋɔ ɩ man yelbier gbɛɛ aŋmɩnɛ lɛ ɩn vɛ̃ bar wʋ? Gbɛɛ ayopõi (7) bɩɩ?" 22Ka a Yesu 'yɛr kʋ wʋ, "N 'yɛrɛ na kʋrɔ fʋ a ba ɩ gbɛɛ ayopõi ɛ, tɩchɛ gbɛɛ lɩjaata nɩ pie nɩ ayopõi gbɛɛ ayopõi (77)." 23"A lɛ jũu a Nãaŋmɩn nãalʋ̃ʋ na nyɛntaa fɩka nãa na bʋɔr ɩka 'lɔ nɩ a wʋ tʋ̃tʋ̃nbɔ ba guor a ba libie kaa. 24Wʋn wa tɩ piel guoro a libie yele ba nyɔɔn ɩ̃sʋɔ na di wʋ turo pie sãn waan a wʋ sɛ̃, 25wʋn kʋ̃ tʋ̃ɔ yab a sãn ɛ, a wʋ nɩkpɛ̃ɛ 'yɛr ɩka ba da 'lɔ nɩ a wʋ pɔɔ nɩ a bibiir nɩ a wʋ bonsɩ a jaa yab a sãn. 26"Ka a tʋ̃tʋ̃nɔ̃ lo gbur dumo a wʋ niem lɔɔrɔ nuur 'yɛrɛ, 'Tara nɩ ma kãnyir, ɩn yab a fʋ sãma a jaa.' 27A nɩkpɛ̃ɛ kãan a wʋ nɩbaal tɩ vɛ̃ a wʋ sãma kʋ wʋ, tɩ bar wʋ. 28"Tɩchɛ, a daba nyã nɩ wʋ ju na wa yɩ a yõo nyɛ a wʋ tʋ̃tʋ̃tɔ sʋɔ na di wʋ toofar kɔbaa sãn, wʋ chɩm a daba kɔkɔr pɔ tɩ 'yɛr, 'Yab ma a sãn fʋn di.' 29"Ka a tʋ̃tʋ̃nɔ̃ nyã mɩ lo gbur dumo tɩ sʋɔrɔ, 'Tara nɩ ma kãnyir, tɩ ɩn yab fʋn a sãn.' 30"Ka wʋ tɔr, tɩ nyɔɔ wʋ chiin tɩ pɔɔ tɩ tãn a sɔ̃ɔ 'lɔ wʋn yab a sãn. 31A wʋ tʋ̃tʋ̃taaba na wa nyɛ a lɛ wʋn ɩ, ba pʋɔ sɔ̃ɔ naa, ka ba chen tɩ man a jaa kʋ a nɩkpɛ̃ɛ a lɛ jaa na ɩ. 32Ka a wʋ nɩkpɛ̃ɛ bʋɔl wʋ wa sʋʋr wʋ, 'Fʋ̃ʋ tʋ̃tʋ̃putuo sʋɔ. Fʋn sʋɔr ma jũu lɛ so ka n vɛ̃ a sãn bar fʋ. 33Fʋ mɩ kʋ̃ naa kaa a fʋ tʋ̃tʋ̃tɔ sʋɔ nyã nɩbaal nɩtãa a lɛ ɩn kaa a fʋ nɩbaal ɛ?' 34A wʋ nɩkpɛ̃ɛ suur ir naa ka wʋ de wʋ tɩr ɩka ba tɩ pɔɔ wʋ ge wʋ tɩ tãn a daar 'lɔ wʋn yab a sãn a jaa. 35"Lɛ mɩ lɛ a n Sãa na be a saaju na ɩ yɩ mɩ, yɩn baa vɛ̃ a yɩ yɛbɛ yelbier bar ɛ."

will be added

X\