Matiu 17

1A ber ayʋɔb daar, Yesu tara na Pita nɩ Jemesɩ nɩ a wʋ yɛbɛ Jɔɔn don tɔ̃wõo ju a ba tɛɛ. 2Wʋ chil wʋ mɩ̃ɛ a ba niem, ka a wʋ nie nyɩlɛ mɔ̃tɔ̃ɔ kaar, ka a fuu pɛl nyɩlɛ bũu kaar. 3Mosesɩ nɩ Elaija mɩ wa dũun yɩ ara a wʋ sɛ̃, ka ba wa 'mataa 'yɛrɛ. 4Pita 'yɛr kʋ Yesu, "N Soro, a vɩla na ka sɩn kpɩɛrɛ a ka. Ala ɩ fʋ sɔɔ naa, ɩn 'yɔ̃ɔn sɛɛr ata a ka na, ka fʋ so a ɩ̃sʋɔ, ka Mosesɩ mɩ so a ɩ̃sʋɔ, ka Elaija mɩ so a ɩ̃sʋɔ." 5Wʋn chɛnɛ 'yɛrɛ ka a julõjupɩla wa pɔɔ ba naa, ka Nãaŋmɩn kɔkɔr 'yɛr be a julõjuur pɔ, "Nyã lɛ a n Binʋ̃nãa, a n pʋɔ pɛl wʋ naa, yɩ chɛlɛ a wʋ 'yɛr." 6A poturbo na wa wõ a nɩtɔ̃ dãbɩ̃ɛ kpɛ ba naa ka ba lo kpa tẽe. 7Tɩchɛ ka Yesu wa sɩɩr ba tɩ 'yɛrɛ, "Yɩ ir, yɩ ta joro dãbɩ̃ɛ ɛ." 8Ban wa dʋɔ kaa, baa nyɛ nɩrɛ jaa ka a Yesu tɛɛ ba lɛ ɛ. 9Ban wa yi a tɔ̃ɔ ju suro, Yesu kpãa ba naa, "Yɩ taa 'yɛrɛ kʋrɔ nɩrɛ jaa a bon 'lɔ yɩn nyɛ ɛ, tɩ tãn a daar 'lɔ a maa Nɩsaal Bie na lɩɛb ir a kũu pɔ." 10Ka a wʋ poturbo sʋʋr wʋ, "Ŋmɩnɛ lɛ a ɩ ka a nɛɛ wiwiilbe 'yɛr ɩka Elaija lɛ na de nie wa?" 11Ka Yesu 'yɛr, "Sɩrɛ jaa lɛ, ɩka Elaija wa naa wa chɔɔr a bonsɩ a jaa. 12Tɩchɛ yelmɩ̃ɛ lɛ n 'yɛrɛ kʋrɔ yɩ ɩka Elaija den nie wa ka baa bɔ̃ɔ wʋ ɛ, tɩchɛ ba ɩ wʋn a lɛ na pɛl a ba pʋɔ. Lɛ mɩ lɛ a maa Nɩsaal Bie mɩ na di a dɔɔyɛ a ba nuur pɔ." 13Be lɛ a poturbo pãa bɔ̃ɔn ɩka Jɔɔn Kɔ̃suoro 'yɛr lɛ wʋ 'yɛrɛ. 14Yesu nɩ a wʋ poturbo na wa chen a nɩyɔɔ sɛ̃, daba wa gbur dumo a wʋ niem, 15tɩ 'yɛr, "N Soro, kaa a n bie nɩbaal, kpũgul lɛ wʋ loro na wʋ dire dɔɔyɛ yɔɔ, sɔ̃ɔ ɩ̃sʋɔ wʋ ma lon bũu pɔ bɩɩ kʋ̃ɔ pɔ. 16N tara wʋn waan a fʋ poturbo sɛ̃, tɩchɛ baa tʋ̃ɔ sãa wʋ ɛ." 17Ka a Yesu 'yɛr, "Yɩn dɩna nɩbɛ babãma dẽme, a yɩ sɔɔfʋ na ba jɩ̃ bon ɛ, n be a yɩ sɛ̃ naa tɩ tãn dabor? N tara nɩ yɩ kãnyir jɩ̃ ŋmɩnɛ?" Tɩ 'yɛr a daba, "Tɔɔ a bie wa kʋ ma." 18Yesu tãn a sɩdɛɛr ka wʋ yi a bie pɔ, a dẽdẽe daa ka a bie sa. 19A poturbo wan a Yesu tɛɛ sɛ̃ wa sʋʋr, "Ŋmɩnɛ a ɩ ka sɩn ba tʋ̃ɔ dii a sɩdɛɛr bar ɛ?" 20Wʋ 'yɛr kʋ ba, "Bojũu a yɩ sɔɔfʋ ba jɩ̃ bon ɛ. Yelmɩ̃ɛ lɛ n 'yɛrɛ kʋrɔ yɩ, yɩn tara sɔɔfʋ kʋ jɩ̃ a kɔ̃kɔ̃ɔ bir, yɩn 'yɛr kʋ a tɔ̃ɔ nyãna, ir a ka chen a be; wʋn ir chen. Tɩ yele jaa kʋ ɩ kpɛ̃ɔ kʋ yɩ ɛ." 22Ban wa lɔ̃ɔ taa a Galilee, Yesu 'yɛr kʋ ba, "Ban gar 'yɔ̃ɔ a maa Nɩsaal Bie ka n di dɔɔyɛ a nɩbɛ nuur pɔ. 23Ban kʋ maa naa, ka a ber ata daar ka n lɩɛb ir ɩ vʋr." Ban wõ a nɩtɔ̃, ba pʋʋr sɔ̃ɔ naa. 24A Yesu nɩ a wʋ poturbo na wa ta a Kapenahum, a puorfʋ yir lõpodierbe wa 'yɛr a Pita, "A yɩ wiwile maa yab a puorfʋ yir lõpoo bɩɩ?" 25Ka wʋ 'yɛr, "Ɔ̃ɔ, wʋ ma yab naa." Pita na wa ta a yir, Yesu lɛ de nie sʋʋr Simon, "Bo lɛ fʋ tɩɛr?" Ba boo lɛ ma yab a lõpoo kʋ a wɛr ju nãmɩne? A ba bibiir lɛ bɩɩ nɩyor lɛ ma yab? 26Pita na 'yɛr ɩka nɩyor sɛ̃, lɛ Yesu 'yɛr kʋ wʋ, "A lɛ a bibiir son ba mɩ̃ɛ. 27Tɩchɛ saa bʋɔrɔ ɩka sɩ sɔ̃ɔ a nɩbɛ banyãna pʋɔ ɛ, yɩ chen a man pɔ tɩ lɔb a jɩ̃pɩ̃ɩ, yin wa ir a jɩ̃dɔ̃ɔ 'lɔ yɩ yuo a nɛɛ, yɩn nyɛn libir, yɩ de ya a sɩ lõpoo. De a jɩ̃m 'lɔ fʋn dɔ̃ɔ nie nyɔɔ, fʋ̃ʋ wa haa a wʋ nɛɛ fʋn nyɛn libibir, de a 'lɔ yab a sɩ lõpoo."

will be added

X\