Matiu 15

1A Faraseemɩne nɩ a nɛɛ wiwiilbe bamɩne na yi a Jerusalɛm wan a Yesu sɛ̃ wa sʋʋr wʋ, 2"Ŋmɩnɛ a fʋ poturbo ba turo a sɩ sãakpãmɩne wiilfʋ ɛ? Ba maa pɛɛ a ba nuur tɩ di ɛ." 3Ka a Yesu 'yɛr kʋ ba, "Ŋmɩnɛ ka yɩ sɔ̃ɔ a Nãaŋmɩn nɛbinsɩ tɩ na yɩ turo a yɩ mɩ̃ɛ wiilfʋ? 4Nãaŋmɩn 'yɛr naa, ''Yɔ̃ɔnɔ̃ a fʋ sãa nɩ a fʋ ma,' ka 'Nɩrɛ jaa wa pɔ 'yɔ̃ɔ a wʋ sãa bɩɩ a wʋ ma, ba kʋ wʋ.' 5Tɩchɛ yɩn 'yɛr ɩka nɩrɛ 'lɔ jaa na 'yɛr a wʋ sãa bɩɩ ma ɩka, sʋ̃ʋfʋ 'lɔ jaa ɩn tara naa kʋ fʋ, n den kʋ Nãaŋmɩn. 6Tɩchɛ na waa de a wʋ bʋ̃tarsɩ 'yɔ̃ɔnɔ̃ nɩ a a wʋ sãa ɛ, yɩn ɩ a lɛ, yɩ sɔ̃ɔn Nãaŋmɩn nɛɛ, tɩ na yɩ turo a yɩ mɩ̃ɛ binfʋ. 7Yɩn nɛɛr ayi dẽme! Isaiya 'yɛr yelmɩ̃ɛ nɩ wʋn dɔ̃ɔ 'yɛr ɩka, 8'A nɩbɛ banyãna den a ba nɛɛr 'yɔ̃ɔnɔ̃ nɩ ma tɩchɛ a ba nyãn pɔ, ba tɔɔn jãan ma. 9A ba puorfʋ ba tara tɔ̃nɔ̃ kʋ ma ɛ, nɩsaal wiilfʋ lɛ ba wile.' " 10Yesu bʋɔl a nɩyɔɔ a ba wa a wʋ sɛ̃, ka wʋ 'yɛr kʋ ba, "Yɩ chɛlɛ na yɩ bɔ̃ɔ a par. 11A ba ɩ bon 'lɔ na ma tu a nɩsaal nɛɛ pɔ kpɛ lɛ ma sɔ̃ɔ wʋ ɛ, tɩchɛ bon 'lɔ na ma yɩ a nɩsaal nɛɛ pɔ lɛ ma sɔ̃ɔ wʋ." 12A poturbo wa 'yɛr kʋ wʋ, "Fʋ bɔ̃ɔn naa an kpɛ a Faraseemɩne ban wõ a 'yɛr nyã fʋn 'yɛr ɔ?" 13Ka wʋ 'yɛr, "Tɩɛ 'lɔ jaa a n Sãa na be a saaju na ba sɛl ɛ, ɩn vʋ̃ɔ wʋn bar. 14Yɩ bar ba, jɔ̃n lɛ tɔɔrɔ jɔ̃n. Jɔ̃ɔ wa tɔɔrɔ a wʋ jɔ̃ɔ tɔ sʋɔ ba jaa ma lon bɔɔ pɔ." 15Tɩchɛ ka Pita 'yɛr kʋ wʋ, "Wiil a sʋkpa nyã par kʋ sɩ." 16Be lɛ wʋ 'yɛr, "A yɩn mɩ na ɩ a n poturbo ba bɔ̃ɔ a par ɛ? 17Yaa bɔ̃ɔ ka bon 'lɔ jaa na tu a nɛɛ pɔ kpɛ a pʋɔ pɔ ma tun a par bɔɔ pɔ yi bɩɩ? 18Tɩchɛ bon 'lɔ na ma yi a nɛɛ pɔ, yin a tɩɛr pɔ, anyãna lɛ ma sɔ̃ɔ a nɩsaal. 19A nɩsaal tɩɛr pɔ lɛ a tɩɛr dɛbɛ ma yi, nɩrɛ kʋfʋ, pɔɔdeyele, sɛ̃sɛ̃yele, nãnyiyele, jir dãasɩɛ, nɩ a gagaryele ma be. 20A anyãna lɛ a bonsɩ ala na ma sɔ̃ɔ a nɩsaal tɩchɛ nɩrɛ na din nũdɛbɛ ba sɔ̃ɔnɔ̃ wʋ ɛ." 21Yesu yin a be chen a Tire paal nɩ Sidon paal pɔ. 22Be lɛ a pɔɔ na yi a Kanaan paal pɔ yi piel ŋmiere chɛlsɩ, "N Soro kaa a n nɩbaal David Bie, a sɩdɛɛr lɛ tara a n bipɔɔ." 23Tɩchɛ a Yesu ba 'yɛr 'yɛr jaa kʋ wʋ ɛ. Ka a wʋ poturbo wa 'yɛr kʋ wʋ, "Dii wʋ bar, wʋ pɔɔrɔ sɩn gɔ̃mɔ̃." 24Ka wʋ 'yɛr, "A piir ala na bɔr a Isɩral nɩbɛ pɔ tɛɛ 'yɔ̃ɔ lɛ ba tʋ̃ ma." 25Tɩchɛ ka a pɔɔ wa gbur dumo a wʋ niem 'yɛr, "N Soro, sʋ̃ʋ ma." 26Ka a Yesu 'yɛr, "A ba sɛɛ ɩka fʋ de bibiir bʋ̃diir lɔb 'yɔ̃ɔ baar ɛ." 27Ka a pɔɔ 'yɛr, "Ɔ̃ɔ, n Soro, a baar gba ma dire na a bʋ̃di pʋr pʋr ala na ma ŋmara loro a ba nɩkpɛ̃ɛ dakɔɔ pĩlem." 28Ka Yesu 'yɛr kʋ a pɔɔ, "Pɔɔ, a fʋ sɔɔfʋ bɛrma naa! A ɩ kʋ fʋ a lɛ fʋn bʋɔrɔ." A wʋ bipɔɔ sa naa a dẽdẽe daa 'lɔ̃nɔ̃. 29Yesu na wa yi a be, wʋ den a Galilee man yal kõkoor 'lana, na wʋ tɩ do tɔ̃ɔ ju jɩ̃nɛ. 30A nɩyɔɔ tara na a nɩbɛ gbɛɛ na kpi kpi, nɩ jɔ̃n, nɩ a gbɛrsɩ, nɩ a wõn 'matãan baalsɩ yɔɔ waan a wʋ sɛ̃. Ba wa bin ban a wʋ niem a wʋ sãa a ba jaa baalsɩ. 31Nɛɛr 'maan a nɩbɛ ban wõ ka a wõn 'yɛrɛ, ka a gbɛrsɩ sa chiine ka a bala a gbɛɛ nɩ na kpi kpi mɩ sa ka a jɔ̃n mɩ nyɛrɛ. Ka ba dãna a Isɩral nɩbɛ Nãaŋmɩn. 32Yesu bʋɔl a wʋ poturbo wa 'yɛr kʋ ba, "Nɩbaal kpɛ ma naa nɩ a nɩyɔɔ banyãna bojũu ba ben a n sɛ̃ ber ata tɩ ba di bon jaa ɛ, n ba bʋɔrɔ ɩka n vɛ̃ ka ba lɩɛb chiine kɔ̃ ɛ, amɩne ban wa lon sɔr pɔ." 33Ka a wʋ poturbo 'yɛr kʋ wʋ, "Nyɛ lɛ sɩn nyɛ paanʋ̃ɔ a dãlpʋɔ nyã pɔ tʋ̃ɔ kãan a nɩyɔɔ banyãna?" 34Ka Yesu sʋʋr ba, "Paanʋ̃ɔ aŋmɩnɛ lɛ yɩ tara?" Ka ba 'yɛr, "Ayopõi nɩ jɩ̃mɛ bɩ̃lãa." 35Wʋ vɛ̃n ka a nɩbɛ jɩ̃nɛ tẽe. 36Ka wʋ pãa de a paanʋ̃ɔsɩ ayopõi nɩ a jɩ̃bɩ̃lãa ala na wʋ puor Nãaŋmɩn yãan, tɩ na wʋ ŋma de kʋ a wʋ poturbo, ka ba de põ a nɩbɛ. 37Ba jaa din tɩɩ, ka a poturbo wob a bʋ̃ŋmaar 'yɔ̃ɔ pɛr ayopõi. 38A bala na di ɩn dɔɔr tur anaar, ka pɔbɔ nɩ bibiir nũu ba pʋɔ ɛ. 39Wʋn wa vɛ̃ ka a nɩbɛ yaar baar wʋ kpɛ̃n a gboro na wʋ chen Magadan paal pɔ.

will be added

X\