1 A ba kor ɛ tɩchɛ ka Yesu kpɛ a pʋɔ sãlsɔɔ tala a Pɛ̃nfʋ Bɩbir Daar. Kɔ̃ kpɛ̃n a wʋ poturbo, ka ba piel fɔrɔ a bʋ̃bie ɔɔrɔ. 2 A Faraseemɩne na wa nyɛ a lɛ, ba sʋʋr a Yesu, "Fʋ nyɛn lɛ na ba tu a nɛbinãa a fʋ poturbo na ɩrɛ a Pɛ̃nfʋ Bɩbir Daar ɔ?" 3 Ka a Yesu 'yɛr kʋ ba, "Yaa kar a Nãaŋmɩn gãn pɔ nyɛ a lɛ a Nãa David na dɔ̃ɔ ɩ nɩ a wʋ nɩbɛ a kɔ̃ na kpɛ ɛ? 4 Wʋ kpɛ̃n a Nãaŋmɩn yir ka 'lɔ nɩ a wʋ nɩbɛ tɩ de a paanʋ̃ɔ 'lɔ ban ben kʋ Nãaŋmɩn na ba 'wɔb na ba tara sɔr ɛ, ka ala ba ɩ a Juu nɩbɛ bɔɔrloro tɛɛ ba lɛ ɛ. 5 Bɩɩ yaa kar a Mosesɩ nɛbinãa pɔ lɛ a Juu nɩbɛ bɔɔrlorbo a Pɛ̃nfʋ Bɩbir Daar a puorfʋ yir pɔ na ma tʋ̃ tɩ na baa bʋɔlɔ a lɛ bier ɛ? 6 Yelmɩ̃ɛ lɛ n 'yɛrɛ kʋrɔ yɩ, nɩrɛ kɔ̃ɔ ben ka na gar a puorfʋ yir. 7 A Nãaŋmɩn 'yɛr a, 'Nɩbaal lɛ n bʋɔrɔ, a ba ɩ dʋ̃n yɩn kʋ chʋm kʋ ma ɛ.' Yɩn ta bɔ̃ɔ a yele nyã par, yɩ kʋ naa bʋɔlɔ nɩbɛ na ba maal dɛɛr ɛ, ɩka bier lɛ ba maal ɛ. 8 A maa Nɩsaal Bie lɛ ɩ a Pɛ̃nfʋ Bɩbir Soro." 9 Yesu yin a be chen a ba lɔ̃ɔfʋ yir pɔ, 10 tɩ nyɛ daba kɔ̃ɔ nũu na kpi. Ka ba sʋʋr wʋ, "A tara na sɔr ɩka fʋ sãa baal a Pɛ̃nfʋ Bɩbir Daar ɔ?" Ba sʋʋr a lɛ bʋɔrɔ ɩka ba nyɛ a wʋ pɔ 'yɛr 'yɛr. 11 Yesu sʋʋr naa, "Ala ɩ a yɩ ɩ̃sʋɔ tara na pɛr ka wʋ lo bulo pɔ a Pɛ̃nfʋ Bɩbir Daar, ŋmɛ lɛ fʋn ɩ? A ba ɩ fʋn ir wʋn a bɔɔ pɔ ɛ? 12 A nɩsaal gar pɛr. A lɛ jũu a sɩ nɛbinãa bar sɔr ɩka fʋ maal vɩla kʋ nɩrɛ a Pɛ̃nfʋ Bɩbir Daar." 13 Wʋ 'yɛr kʋ a daba 'lɔ nũu na kpi, "Tur a fʋ nũu." A wʋ tur ka a nũu wʋ jaa sa kaara a nũu nyã sʋɔ kaar. 14 A Faraseemɩne yin na ba piel guoro a Yesu kʋfʋ. 15 Yesu na wa bɔ̃ɔn a lɛ ban piel guoro ɩka ba ɩ wʋ, wʋ yin a jie 'lɔ ka nɩyɔɔ jaa turo wʋ. Wʋ sãan a bala an ɔɔrɔ. 16 Tɩ 'yɛr kʋ ba ɩka ba ta 'yɛr a wʋ yele kʋ nɩrɛ jaa ɛ. 17 Wʋ maal a nɩtɔ̃, ka a lɛ a Nãaŋmɩn na dɔ̃ɔ 'yɛr tu a 'yɛ'yɛrɛ Isaiya na ɩ yelmɩ̃ɛ, 18 "A n tʋ̃tʋ̃nɔ̃ lɛ a nyã ɩn kaa ir, a 'lɔ n na nʋ̃, a 'lɔ a n pʋɔ na pɛlʋ. Ɩn yɔ̃ɔ wʋn a n Sɩɛ, ka wʋ mʋɔl a n 'yɛr tɔɔrfʋ yele kʋ a nɩbɛ ba jaa. 19 Wʋ kʋ tara nɛchɩrɛ bɩɩ ŋmiere chɛlsɩ bɩɩ pɔɔrɔ gɔ̃mɔ̃ yõo ɛ. 20 Wʋn siir wʋ mɩ̃ɛ kʋ a bala na siir a ba mɩ̃ɛ, tɩ na wʋ maal vɩla kʋ a bala na ba tara sʋ̃nɔ̃ ɛ. Wʋn ara na kpɛ̃ɔ tɩ tãn a sɔ̃ɔ 'lɔ wʋn na vɛ̃ ka a nɩbɛ sɔɔ de a Nãaŋmɩn yeltorsɩ. 21 A wʋ yuor pɔ lɛ a nɩbɛ ba jaa na tara tɩɛrtɔ fʋ jie." 22 Ba waan na daba na ɩ jɔ̃ɔ tɩ ɩ wõo na tara sɩdɛbɛ Yesu sɛ̃. Wʋ sãn a daba baal, ka wʋ nyɛrɛ tɩ lɛ 'yɛrɛ jaa chɛchɛ. 23 Nɛɛr 'maan a nɩyɔɔ ka ba sʋrɔ taa ɩka, kaa 'lɔ lɛ ɩ a Nãa David Bie bɩɩ? 24 Tɩchɛ a Faraseemɩne na wa wõ a lɛ ba 'yɛr naa, "Wʋ dire na sɩdɛbɛ ka a yire bojũu, a sɩdɛbɛ nãa Beeljebul lɛ kʋ wʋ a kpɛ̃ɔ ka wʋ dire nɩ a sɩdɛbɛ." 25 Yesu na bɔ̃ɔn a lɛ ban tɩɛrɛ, a wʋ 'yɛr kʋ ba, "Tẽe 'lɔ na ŋma dẽdẽme jɛɛrɛ taa kʋ kor ɛ. Tẽe 'lɔ bɩɩ yir kpɛ̃ɛ 'lɔ na ŋma dẽdẽme jɛɛrɛ taa kʋ ara ɛ. 26 Ala ɩ a Satan diin Satan kʋ yi na wʋ ŋma dẽdẽme ŋmɛ lɛ a wʋ nãalʋ̃ʋ na ɩ ara? 27 Ala ɩ Beeljebul lɛ kʋ ma a kpɛ̃ɔ ka dire nɩ a sɩdɛbɛ, tɩ a bala na ɩ a yɩ poturbo, bo lɛ ba tara dire nɩ a sɩdɛbɛ? A lɛ jũu bala lɛ na ɩ a yɩ 'yɛr tɔɔrbɔ. 28 Ala ɩ Satan diin Satan kʋ yi na wʋ ŋma dẽdẽme ŋmɛ lɛ a wʋ nãalʋ̃ʋ na ɩ ara? Ala ɩ Nãaŋmɩn Sɩɛ lɛ kʋ ma a kpɛ̃ɔ ka dire nɩ a sɩdɛbɛ ka a yire wiil ɩka a Nãaŋmɩn nãalʋ̃ʋ ta yɩ naa. 29 "Ŋmɩnɛ lɛ nɩrɛ na tʋ̃ɔ ɩ kar kpɛ gãdaa yir de a wʋ bonsɩ, 'lɔ ba de nie lũ a gãdaa nyã tɩ de a wʋ bonsɩ ɛ? 30 "Nɩrɛ 'lɔ na ba be a n sɛ̃ ɛ, tara man nɩ 'yɛr, nɩrɛ 'lɔ na ba pʋɔ ma a sɩ kaal lɔ̃ɔ taa ɛ wʋ ma yɛ̃yɛl bar. 31 A lɛ jũu n 'yɛrɛ na kʋrɔ yɩ ɩka nɩbɛ na nyɛn yelbier jaa nɩ 'yɛrdɛɛr jaa ban 'yɛr vɛ̃ kʋ fʋ, tɩchɛ nɩrɛ 'lɔ na 'yɛr 'yɛrdɛɛr 'yɔ̃ɔ a Nãaŋmɩn Sɩɛ kʋ nyɛ yelbier vɛ̃ kʋ fʋ ɛ. 32 Nɩrɛ 'lɔ jaa na 'yɛr 'yɛrdɛɛr 'yɔ̃ɔ a maa Nɩsaal Bie na nyɛn yelbier vɛ̃ kʋfʋ, tɩchɛ nɩrɛ 'lɔ na 'yɛr 'yɛrdɛɛr 'yɔ̃ɔ a Nãaŋmɩn Sɩɛ kʋ nyɛ yelbier vɛ̃ kʋ fʋ ɛ. Dɩna nɩ daar kɔ̃ɔ. 33 "Ala ɩ tɩɛ vɩɛlɛ na wʋ ma wɔ̃n wɔ̃vɩɛl, ala ɩ tɩɛ ɩn tɩdɛɛr wʋ ma wɔ̃n wɔ̃dɛbɛ. Tɩɛ jaa a wʋ wɔ̃mɔ̃ lɛ ba ma de bɔ̃ɔn wʋ. 34 Yɩn waa bibiir! Ŋmɩnɛ lɛ yɩn tʋ̃ɔ 'yɛr 'yɛr vɩɛlsɩ ala ɩ yɩ ɩn yelbe-ɩrbɛ? A ala na sɛɛ a pʋɔ lɛ a nɛɛ ma 'yɛr. 35 A nɩsʋ̃ a yelsʋ̃n ala na be a wʋ pʋɔm lɛ wʋ ma 'yɛr, ka a nɩdɛɛr mɩ ma 'yɛr a yeldɛbɛ ala na be a wʋ pʋɔm. 36 Yelmɩ̃ɛ jaa lɛ n 'yɛrɛ kʋrɔ yɩ ɩka, a 'yɛr tɔɔrfʋ daar, nɩrɛ jaa na man 'yɛrdɛɛr 'lɔ jaa bʋrɔ na dɔ̃ɔ yi a wʋ nɛɛ pɔ. 37 A fʋ 'yɛrbie lɛ na wiil a lɛ fʋn be, naa wiil a fʋ sɔ̃ɔnaa." 38 Be lɛ ka a nɛɛ wiwiilbe nɩ a Faraseemɩne bamɩne 'yɛr, "Wiwile, sɩ bʋɔrɔ na ɩka sɩ nyɛ nɛ'maa tʋ̃mɔ̃ na ɩ jɩ̃nɛ a fʋ jie." 39 Tɩchɛ ka wʋ 'yɛr kʋ ba, "A yɩn banyãna na ɩ a putudẽme nɩ sɛ̃sɛ̃nbɛ tɩ bʋɔrɔ ɩka n tʋ̃ nɛ'maa tʋ̃mɔ̃ ka a na ɩ jɩ̃nɛ, tɩchɛ yɩ kʋ̃ nyɛ ɩ̃sʋɔ jaa ɛ ka a Nãaŋmɩn 'yɛ'yɛrɛ Jona jɩ̃nɛ ba lɛ ɛ. 40 Nɩtãa lɛ a Jona na dɔ̃ɔ gã a jɩ̃nele pʋɔm ber ata nɩ tɩ̃sɔɔ gbulo ata lɛ mɩ lɛ a Maa Nɩsaal Bie mɩ na gã a yaa pɔ ber ata nɩ tɩ̃sɔɔ gbulo ata. 41 A 'yɛr tɔɔrfʋ daar Ninive nɩbɛ na yin 'yɔ̃ɔ a yɩn dɩna nɩbɛ 'yɛr, bojũu ba lɩɛb a ba tɩɛr a Jona na dɔ̃ɔ 'yɛr a Nãaŋmɩn 'yɛr kʋ ba, tɩchɛ yɩ kaa, a 'lɔ na gar a Jona ben ka. 42 A pɔɔ nãa na yin be a par a 'yɛr tɔɔrfʋ daar na wʋ wa 'yɔ̃ɔ a yɩn dɩna nɩbɛ 'yɛr, bojũu wʋ dɔ̃ɔ yi be a tẽtɛɛr wa chɛl a Nãa Solomon yɛ̃ 'yɛr, tɩchɛ yɩ kaa a 'lɔ na gar a Solomon ben ka. 43 "Sɩdɛɛr wa yɩ nɩrɛ pɔ, wʋ ma chen dãlpʋʋr pɔ tɩ bʋɔrɔ pɛ̃nfʋ jie 'lɔ baa wa nyɛ ɛ, 44 wʋ ma 'yɛr naa ɩn lɩɛb kul a yir 'lɔ pɔ ɩn dɔ̃ɔ yɩ. Wʋ wa nyɛn a yir ka wʋ ɩ yirkpolo na wʋ vɩɛlɛ, 45 ka wʋ chen tɩ bʋɔl sɩdɛbɛ ayopõi na tara a putuo gar wʋ ka ba tɩ kpɩɛrɛ a be. Ka a nɩrɛ nyã pãa ɩ dɛɛr gar a lɛ wʋn dɔ̃ɔ be. Lɛ lɛ an kaara a yɩn putudẽme a dɩna." 46 Wʋn chɛnɛ 'yɛrɛ nɩ a nɩyɔɔ, a wʋ ma nɩ a wʋ yɛɛr wa ben yõo bʋɔrɔ ɩka ba nyɛ wʋ. 47 Nɩrɛ ɩ̃sʋɔ 'yɛr kʋ wʋ, "Nyɛ a fʋ ma nɩ a fʋ yɛɛr lɛ be yõo bʋɔrɔ ɩka ba nyɛ fʋ." 48 Tɩchɛ Yesu sʋʋr a nɩrɛ 'lɔ na 'yɛr a 'yɛr kʋ wʋ, "An lɛ a ɩ ma nɩ ba boo lɛ ɩ a n yɛɛr?" 49 Wʋ lɩɛb tur a wʋ poturbo nũu tɩ 'yɛr, "Nyɛ a n ma nɩ a n yɛɛr! 50 Nɩrɛ 'lɔ jaa na maala a lɛ a n Sãa na be a saaju na bʋɔrɔ lɛ ɩ a n yɛɛr nɩ a n ma."
