Maakɩ 8

1A sɔ̃ɔ 'lɔ̃nɔ̃ pɔ, nɩyɔɔ lɛ lɔ̃ɔn taa go a Yesu sɛ̃, tɩ baa tara bon na di ɛ. Yesu bʋɔl a wʋ poturbo ka ba wa a wʋ sɛ̃ ka wʋ 'yɛr, 2"A nɩbɛ banyã ɩrɛ naa nɩbaal, bojũu ber ata nɩ nyã ban be a n sɛ̃, baa lɛ tara bon na di ɛ. 3Maa mɩ bar ba ka ba kulo nɩ a kɔ̃, ban tɩ lon sɔr pɔ, bojũu bamɩne yin tɛɛr." 4Ka a wʋ poturbo 'yɛr, "Tɩchɛ nyɩnɛ lɛ a kanaa a mɔgɔ̃ɔ pɔ nɩrɛ na nyɛ bʋ̃diir kʋ ba?" 5Ka a Yesu sʋʋr ba, "Paanʋ̃ɔsɩ aŋmɩnɛ lɛ yɩ tara?" Ka ba 'yɛr, "Paanʋ̃ɔsɩ ayopõi." 6Wʋ 'yɛr naa a nɩbɛ, ka ba jɩ̃nɛ tẽe, tɩ na wʋ de a paanʋ̃ɔsɩ ayopõi ala puor Nãaŋmɩn yãan, tɩ ŋma ŋma de kʋ a wʋ poturbo ka ba de põ a nɩbɛ. 7Ba tara naa a jɩ̃bil amɩne, ka wʋ de a ala mɩ puor Nãaŋmɩn yãan, tɩ 'yɛr ɩka a poturbo ba de põ a nɩbɛ. 8Ba di naa tɩɩ tɩ chɛ. Ka a wʋ poturbo wob a bʋ̃ŋmaara ala ban di faa 'yɔ̃ɔ pɛr ayopõi. 9Ba ɩ naa tur anaar. Ka wʋ bar ba a sɔr. 10Ajienaa, 'lɔ nɩ a wʋ poturbo 'mantaa kpɛ a gboro pɔ, na ba chen a Dalmanuta paal pɔ. 11Be lɛ a Faraseemɩne wa sʋrɔ wʋ yelsʋʋrsɩ, bʋɔrɔ ɩka ba bɛɛr wʋ kaa, na ba 'yɛr ɩka wʋ wiil ba jɩ̃nɛ kɔ̃ɔ ka ba bɔ̃ɔ ɩka wʋ yin a Nãaŋmɩn sɛ̃. 12Ka wʋ vʋʋr lɛ fãa tɩ 'yɛr, "Bo lɛ so ka a yɩn pʋ̃pãanyã nɩbɛ bʋɔrɔ jɩ̃nɛ ɩka yɩ nyɛ? Yelmɩ̃ɛ lɛ n 'yɛrɛ kʋrɔ yɩ, yɩ kʋ̃ nyɛ jɩ̃nɛ jaa ɛ." 13Wʋ bar ba naa tɩ kpɛ a gboro gɔ̃ɔnɔ̃ a man gɔ̃ɔn. 14A wʋ poturbo ĩin naa ba tara paanʋ̃ɔ ɛ, tɩ tara bʋ̃'yen tɛɛ a gboro pɔ. 15Ka a Yesu 'yɛr kʋ ba, "Yɩ bɔ̃ɔn a Faraseemɩne paanʋ̃ɔ dãbɩl nɩ a Hɛrɔd paanʋ̃ɔ dãbɩl mɩ." 16Ka a wʋ poturbo guor taa 'yɛrɛ, "Sɩn ba tara a paanʋ̃ɔ lɛ so." 17Yesu na bɔ̃ɔn a lɛ ban 'yɛrɛ, wʋ sʋʋr ba naa, "Bãa 'yɔ̃ɔ lɛ yɩ 'yɛrɛ ɩka yaa tara paanʋ̃ɔ ɛ? Yaa bɔ̃ɔ a par sɛrɛ ɛ? A yɩ nyãa kpɛ̃mɛ na mɩ? 18Yɩ tara na nɩbie tɩ ba nyɛrɛ ɛ, na yɩ tara tobo tɩ ba wõnõ ɛ. Yɩ ĩin bɩɩ? 19A paanʋ̃ɔsɩ anũu ɩn dɔ̃ɔ de ŋma kʋ a dɔɔr tur anũu, pɛr aŋmɩnɛ lɛ yɩ wob a bʋ̃ŋmaar na chɛ 'yɔ̃ɔ?" Ka ba 'yɛr, "Pɛr pie nɩ ayi." 20Ka a Yesu lɛ bɔ̃ɔ 'yɛr, "Ɩn lɛ de a paanʋ̃ɔsɩ ayopõi na n ŋma kʋ a nɩbɛ tur anaar, pɛr aŋmɩnɛ lɛ yɩ lɛ wob 'yɔ̃ɔ?" Ka ba 'yɛr, "Pɛr ayopõi." 21Ka wʋ 'yɛr kʋ ba, "Yaa bɔ̃ɔ a par sɛrɛ ɛ?" 22Ba wa ta na a Betɩsaida tẽe pɔ, ka a nɩbɛ bamɩne tara jɔ̃ɔ waan a Yesu sɛ̃ wa sʋɔr wʋ, ka wʋ sɩɩr a jɔ̃ɔ ka wʋ nyɛrɛ. 23Yesu nyɔɔ naa a jɔ̃ɔ nũu tɩ tɔɔ wʋ yin a tẽe chɛchɛ. Wʋ tɩ chɩr nataar 'yɔ̃ɔ a daba nɩbie pɔ tɩ dɔɔl wʋ a nũu tɩ sʋʋr wʋ, "Fʋ nyɛn bon bɩɩ?" 24Ka a daba dʋɔ kaa tɩ 'yɛr, "N nyɛn nɩbɛ na kaara tɩɩr kaar na ba vire yʋɔrɔ." 25Ka a Yesu lɛ de a wʋ nuur pɔɔ a daba nɩbie, ka a wʋ nɩbie yuo, ka wʋ nyɛrɛ pãa nyɛ bomo a jaa chɛchɛ. 26Ka a Yesu 'yɛr kʋ wʋ, "Kulo, ta lɛ kpɛ a tẽe pɔ ɛ." 27Yesu nɩ a wʋ poturbo chen naa a tẽn ala naa gbʋr Sisariya Filipai. A sɔr pɔ ban be chiine, a Yesu sʋʋr ba naa, "An lɛ a nɩbɛ 'yɛrɛ ɩka n ɩ naa?" 28Ka ba 'yɛr, "Bamɩne 'yɛr naa ɩka fʋ̃ʋ lɛ a Jɔɔn 'lɔ na dɔ̃ɔ suoro a nɩbɛ a Nãaŋmɩn kʋ̃ɔ. Ka bamɩne mɩ 'yɛr ɩka Elaija. Ka a bamɩne mɩ chɛnɛ 'yɛrɛ ɩka fʋ ɩ naa Nãaŋmɩn 'yɛ'yɛrɛ ɩ̃sʋɔ na dɔ̃ɔ be be." 29Ka a Yesu sʋʋr ba, "Tɩchɛ an lɛ yɩ mɩ 'yɛr ɩka n ɩ naa?" Ka a Pita 'yɛr, "Fʋ̃ʋ lɛ a Nɩ-iraa, a Nãaŋmɩn na tʋ̃ ɩka fʋ faa a wʋ nɩbɛ." 30Ka a Yesu kpãa ba, "Yɩ taa ɩrɛ wa 'yɛrɛ a n 'yɛr kʋrɔ nɩrɛ jaa ɛ." 31Yesu piel wile ba na wʋ 'yɛrɛ ɩka a Nɩsaal Bie na din dɔɔyɛ yele yɔɔ pɔ, ka a Juu nɩbɛrɛ, nɩ a ba bɔɔrlo nɩbɛrɛ nɩ a Mosesɩ Nɛɛ wiwiilbe tɔr wʋ bar, na ba kʋ wʋ. Tɩchɛ a ber ata daar wʋn ir naa a kũu pɔ ɩ vʋr. 32Wʋ 'yɛr naa anyã chãa pɔ, ka a Pita tara wʋ yin chɛ̃chɛ̃ɛ tɩ piel mii 'yɔ̃ɔ wʋ. 33Tɩchɛ ka a Yesu lɩɛb kaa a wʋ poturbo tɩ mɩ mii 'yɔ̃ɔ a Pita 'yɛrɛ, "Tɔɔ chen be, Satan! A fʋ tɩɛr ɩn nɩrɛ tɩɛr, waa ɩ Nãaŋmɩn tɩɛr ɛ." 34Be lɛ wʋ bʋɔl a nɩyɔɔ nɩ a poturbo ka ba wa a wʋ sɛ̃, ka wʋ 'yɛr kʋ ba, "Nɩrɛ 'lɔ jaa na bʋɔrɔ ɩka wʋ turo ma, a nɩnyɩnɛ na 'laara a wʋ mɩ̃ɛ tɩ de a daa na ɩ dɔɔyɛ nɩ kũu, tɩ turo ma. 35Nɩrɛ 'lɔ jaa na bʋɔrɔ a wʋ nyɛvʋr, a wʋ nyɛvʋr na bɔr na, tɩ nɩrɛ 'lɔ na sɔɔ a wʋ nyɛvʋr bɔrfʋ a maa nɩ a 'yɛr nʋ̃ɔ nyã jũu, na faa wʋ naa. 36Ala ɩ nɩrɛ tara naa a wɛr nyã bonsɩ a jaa tɩ a wʋ sɩɛ wɛ, bo tɔ̃nɔ̃ lɛ be be? 37Bɩɩ bo lɛ nɩrɛ na de tɛɛn a wʋ sɩɛ? 38Ala ɩ nɩrɛ mɩ nyɛ naa a maa nɩ a n 'yɛrbie ka a ɩ vɩ̃ yele a nɩbɛ banyã na tɔr Nãaŋmɩn bar, nɩ a putudẽme sɛ̃, a Nɩsaal Bie mɩ na kaa naa a nɩnyɩnɛ 'lɔ ka wʋ ɩ vĩ sʋɔ a sɔ̃ɔ 'lɔ wʋn wa lɩɛb wa nɩ a wʋ Sãa tɩɩr 'matãan a malaka chɛchɛsɩ."

will be added

X\