Maakɩ 5

1Yesu nɩ a wʋ poturbo gɔ̃ɔ naa a man, a Gerasenɩ nɩbɛ wɛr pɔ. 2Yesu na wa yi a gboro pɔ, daba na gele yi naa a yar par wa tuor wʋ. 3A gẽgelaa nyã kpɩɛrɛ naa a yar par ka nɩrɛ jaa ba be be na tʋ̃ɔ lũ wʋ nɩ bɔ̃jɔrsɩ gba ɛ. 4Ba ma lũ naa a wʋ gbɛɛ nɩ a nuur tɩchɛ ka wʋ ŋma, tɩ kar a kue ala bar. Nɩrɛ jaa ba be be na tʋ̃ɔ wʋ ɛ. 5Tɩ̃sɔɔ nɩ mɔ̃tɔ̃ɔ, wʋ ma be naa a yar par nɩ a tɔ̃n ju tãna tɩ ŋmara a wʋ mɩ̃ɛ nɩ kʋsɩbɛ. 6Wʋn wa nyɛ a Yesu na be tɛɛr, wʋ jo naa tɩ lo gbur dumo a wʋ niem, 7tɩ na wʋ ŋme chɛlma 'yɛrɛ, "Bo fʋ bʋɔrɔ ɩka fʋ ɩ ma? Fʋ ɩ naa a Nãaŋmɩn nyã na gar a jaa Bie pɔn Nãaŋmɩn ɩka fʋ kʋ̃ ge ma ɛ." 8Bojũu Yesu dɔ̃ɔ 'yɛrɛ kʋrɔ wʋ ɩka, "A fʋ̃ʋ sɩdɛɛr wa yi a daba pɔ." 9Be lɛ ka Yesu sʋʋr wʋ, "Bãa a fʋ yuor di?" Ka wʋ 'yɛr, "Sɩyɔɔ, bojũu sɩ waa naa." 10Ka wʋ sʋɔr a Yesu yãayãabɩlɛ ɩka wʋ ta dii wʋ bar a jie 'lɔ ɛ. 11Doyɔɔ mɩ ara na gbʋr a tɔ̃ɔ, dire. 12Ka a sɩdɛbɛ sʋɔr a Yesu, "Ir sɩ 'yɔ̃ɔ a dor ala pɔ na fʋ sɔɔ ka sɩ tɩ kpɛ a ba pɔ." 13Wʋ sɔɔ naa ka a sɩdɛbɛ yi tɩ kpɛ a dor ala. A ɩ naa dor tur ayi (2,000) ka a jaa tĩgbil suu tɩ kpɛ a man pɔ gbʋ̃m kpi kpi. 14A bala na kaara a dor jon kul a tẽe pɔ nɩ a tẽbil ala na gbʋr tɩ 'yɛr a lɛ na ɩ. Ka a nɩbɛ yi chen ɩka ba tɩ kaa. 15Ba wa naa a Yesu sɛ̃ wa nyɛ a daba 'lɔ na dɔ̃ɔ tara a sɩdɛyɔɔ gele ka wʋ chɩ su bonsɩ jɩ̃nɛ, ka a dãbɩ̃ɛ kpɛ ba. 16A bala na nyɛ 'yɛr kʋ a nɩbɛ a lɛ na ɩ a daba na dɔ̃ɔ tara a sɩdɛbɛ nɩ a dor 'yɛr, 17ka a nɩbɛ piel sʋɔrɔ a Yesu ka wʋ yi a ba wɛr pɔ. 18Yesu na wa kpɩɛrɛ a gboro pɔ ka a daba 'lɔ 'yɔ̃ɔ a sɩdɛbɛ na yi sʋɔr wʋ ɩka wʋ ɩ a ba 'mataa chen. 19Ka a Yesu ba sɔɔ ɛ, tɩ 'yɛr wʋ, "Kul a fʋ yir dẽme sɛ̃ tɩ 'yɛr kʋ ba a lɛ a Soro na ɩ kʋ fʋ, nɩ a lɛ wʋn jo a fʋ nɩbaal." 20A daba chen na wʋ tɩ piel 'yɛrɛ a lɛ a Yesu na maal kʋ wʋ a wɛr 'lɔ pɔ ban bʋɔlɔ a Dekapolisɩ. Ka a nɛɛr 'maa a nɩbɛ. 21Yesu na wa gɔ̃ɔ a man gɔ̃ɔn go, nɩyɔyɔɔ lɔ̃ɔ naa na ba jilʋ̃ wʋ. Wʋ chɛnɛ na ara a man nɛɛ, 22ka a ba lɔ̃ɔfʋ jie nɩkpɛ̃ɛ ɩ̃sʋɔ ban bʋɔlɔ Jairusɩ wa a be. Wʋn wa nyɛ a Yesu, 23wʋ gbur dumo a Yesu niem tɩ sʋɔr wʋ, "Yãayãabɩlɛ, a n bipɔɔbile lɛ ɩ baal ɩrɛ na kpi. Wa dɔɔl wʋ a fʋ nũu ka wʋ sa ta kpi ɛ." 24Ka a Yesu nɩ a daba 'mataa chiine. Nɩyɔyɔɔ turo naa dara taa tɩɛrɛ wʋ. 25Pɔɔ kɔ̃ɔ mɩ ben be lo sɩɛ suoro faara yuomo pie nɩ ayi. 26Wʋ bal di dɔɔyɛ yɔɔ a tɩtɩɩlbɛ jie na wʋ sɔ̃ɔ bon jaa wʋn tara tɩ ba sa ɛ. Ka a baal tʋ̃ɔnɔ̃ wʋ. 27Wʋn wa wõ a Yesu yele, wʋ tu naa a puor tɩ sɩɩr a wʋ fuu, 28bojũu wʋ 'yɛr kʋ a wʋ mɩ̃ɛ. "Maa tʋ̃ɔ sɩɩr a wʋ fuu gba, ɩn sa naa, na n pɛ̃n." 29Wʋn wa sɩɩr a Yesu fuu nɛɛ wa baar, a jɩ̃ɩ ŋmaa naa a dẽdẽe daa ka wʋ bɔ̃ɔn ɩka a wʋ wʋʋr baar naa. 30Ka a Yesu mɩ bɔ̃ɔn a fɔɔ 'lɔ̃nɔ̃ a kpɛ̃ɔ na yi a wʋ sɛ̃. Ka a wʋ lɩɛb a nɩyɔɔ bala pɔ sʋʋr, "An lɛ sɩɩr a n fuu?" 31Ka a wʋ poturbo 'yɛr, "Nyɛ a lɛ a nɩyɔyɔɔ banyã na dara taa tɩɛrɛ fʋ, tɩchɛ a fʋ sʋrɔ a sʋɔ 'lɔ na sɩɩr fʋ!" 32Tɩchɛ ka a Yesu chɛnɛ kaara gʋɔrɔ ɩka wʋ nyɛ a nɩrɛ 'lɔ na sɩɩr wʋ. 33Ka a pɔɔ na bɔ̃ɔn a lɛ na ɩ, dãbɩ̃ɛ kpɛ wʋ naa ka wʋ mɩrɛ na wʋ wa gbur dumo a Yesu niem tɩ 'yɛr a lɛ jaa na ɩ. 34Ka a Yesu 'yɛr kʋ wʋ, "N yɛpɔɔ, fʋn sɔɔ ma jũu, fʋ sa naa. Kulo nɩ ɩ̃gãn 'maar, a fʋ dɔɔyɛ baar naa." 35A Yesu ba 'yɛr baar ɛ, tɩchɛ nɩbɛ kɔ̃ɔ yi a Jairusɩ yir wa 'yɛr wʋ, "A fʋ bie kpi naa. Bãa 'yɔ̃ɔ fʋ dɔ̃ɔnɔ̃ a wiwile go?" 36Yesu ba chɛlɛ a lɛ ban 'yɛrɛ ɛ, tɩ na wʋ 'yɛr kʋ a daba, "Taa joro dãbɩ̃ɛ ɛ. Sɔɔ ma dɛ." 37Yesu ba sɔɔ ka nɩrɛ jaa tu wʋ ɛ, ka Pita nɩ Jemesɩ nɩ a wʋ yɛbile Jɔɔn tɛɛ ba lɛ ɛ. 38Ban wa ta a Jairusɩ yir, Yesu nyɛ naa a nɩbɛ na kõnõ ŋmiere chɛlsɩ. 39Ka wʋ kpɛ tɩ sʋʋr ba, "Bãa lɛ yɩ kõnõ ŋmiere nɩ a chɛlsɩ a lɛ? A bie ba kpi ɛ. Wʋ gur naa." 40A ba laara tʋrɔ nɩ wʋ. Wʋ dii naa a nɩbɛ ba jaa bar ka ba yi tɩ wʋ tara a bie sãa nɩ a ma nɩ a wʋ poturbo bala wʋn 'mataa chiin, a ba kpɛ a jie 'lɔ a bikũu na be. 41Ka wʋ tɩ nyɔɔ a pɔɔbile nũu tɩ 'yɛr, "Talita kum!" A par lɛ a Yesu nɩbɛ kɔkɔr pɔ, "Pɔɔbile, ir!" 42Ka wʋ vaa ir chiine. Yuomo pie nɩ ayi bie lɛ. Ka a yele 'maa ba nɛɛ. 43Yesu kpaal ba naa jũu ka ba taa vɛ̃ ka a nɩrɛ jaa wõ naa ɛ. Tɩ 'yɛr ɩka ba kʋ a pɔɔbile bʋ̃diir ka wʋ di.

will be added

X\