Maakɩ 3

1Sɔ̃ɔ ɩ̃sʋɔ go Yesu chen tɩ kpɛ a lɔ̃ɔfʋ jie, ka a daba kɔ̃ɔ mɩ be be ka a wʋ nũpɛl kpi. 2Ka a nɩbɛ bamɩne na be be bʋɔrɔ ɩka ba gar a Yesu, be lɛ ba tɔɔ gbʋr kaara wʋ. Ka wʋn sãa naa a daba nũu baal a Pɛ̃nfʋ Bɩbir bɩɩ. 3Yesu 'yɛr kʋ a daba nũpɛl na kpi, "Ir ara a sɩ jaa nyɛ fʋ." 4Be lɛ ka a Yesu sʋʋr ba, "Tʋ̃buor sʋɔ lɛ tara sɔr a Pɛ̃nfʋ Bɩbir daar ɩka fʋ tʋ̃, a fʋ maal vɩla bɩɩ dɛɛr, fʋ faa nyɛvʋr bɩɩ fʋ kʋ wʋ?" Ka ba ɩ jaa gbulo gbulo. 5Wʋ kaa naa ba jaa gʋɔr nɩ suur, ka a wʋ pʋɔ sɔ̃ɔ a ba bachɛlfʋ jũu. Wʋ 'yɛr kʋ a daba 'lɔ nũpɛl na kpi, "Tur a fʋ nũu." Wʋ tur naa ka a nũpɛl wʋ jaa sa. 6Be lɛ ka a Faraseemɩne yi chen a Hɛrɔd nɩbɛ sɛ̃, a ba tɩ 'mataa guoro a Yesu, bʋɔrɔ sɔr 'lɔ ban na tu kʋ wʋ. 7Yesu nɩ a wʋ poturbo yin chen a man pɔ ka a nɩyɔɔ na yi Galilee wɛr tu ba. 8Nɩyɔyɔɔ mɩ yi naa Judiya wɛr, Jerusalɛm, Idumea wɛr nɩ a Jordan man gɔ̃ɔn, nɩ a tẽn na be Tire nɩ Sidon wɛr pɔ, wa a wʋ sɛ̃ bojũu ba wõ naa a lɛ jaa wʋn tʋ̃. 9A nɩyɔɔ jũu, Yesu 'yɛr kʋ a wʋ poturbo, "Yɩ kaa nyɛ gboro kʋ ma ka n sɛr bɩ̃lãa." Wʋ 'yɛr naa a lɛ bojũu waa bʋɔrɔ ɩka a nɩbɛ ba mɩl pɔɔ wʋ ɛ. 10A nɩbɛ yɔɔ wʋn sãa lɛ so, a baalsɩ dara taa bʋɔrɔ ɩka ba sɩɩr wʋ. 11A sɩdɛbɛ na ma wa nyɛ a Yesu ba ma da naa a nɩrɛ 'lɔ 'yɔ̃ɔ ban be lɔb tẽe tɩ tãna 'yɛrɛ nɩ, "Fʋ̃ʋ lɛ a Nãaŋmɩn Bie!" 12Tɩchɛ wʋ kpaal ban jũu, ka ba taa ɩrɛ wa 'yɛrɛ a nɩrɛ 'lɔ wʋn ɩ ɛ. 13Yesu do naa a tɔ̃ɔ ju tɩ bʋɔl a bala wʋn bʋɔrɔ ka ba do wa a wʋ sɛ̃. 14A ba pɔ lɛ wʋ kaa ir pie nɩ ayi, bʋɔlɔ ba nɩtʋ̃nsɩ, ka ba na be a wʋ sɛ̃, ka wʋ ma tʋ̃ ba ka ba chen tɩ mʋɔl 'yɛr a Nãaŋmɩn 'yɛr, 15tɩ tara kpɛ̃ɔ dire nɩ sɩdɛbɛ ka a yire. 16A nɩbɛ pie nɩ ayi bala wʋn ir yoe lɛ a anyã. Simon, wʋn lɛ kʋ wʋ yopaalaa Pita. 17Jemesɩ, nɩ a wʋ yɛbile Jɔɔn, a ba sãa yuor lɛ Jebedee, wʋ bʋɔlɔ ba naa Bɔɔnɛgasɩ, a par lɛ sa tãna bibiir. 18Andiru, Filip, Batolomi, Matiu, Tomasɩ, Jemesɩ na ɩ Alfayasɩ bidaba, Tadius, Simon na mʋ̃ɔ nɩbir nɩ a wʋ wɛr yele, 19nɩ a Judas Isɩkariyot, 'lɔ lɛ na wa de a Yesu tɩr. 20A Yesu na lɩɛb wa a yir, nɩyɔɔ wa naa wa lɔ̃ɔ go, ka 'lɔ nɩ a wʋ poturbo ba tara jaa gba na di ɛ. 21Be lɛ a wʋ yir dẽme na wa wõ a lɛ, ba chen naa ɩka ba tɩ ka wʋ, bojũu ba 'yɛr naa ɩka, "Burbur kpɛ wʋ naa." 22Ka a Mosesɩ Nɛɛr wiwiilbe bamɩne na yi a Jerusalɛm mɩ 'yɛrɛ, "A Beeljebul, lɛ pɔb wʋ! A sɩdɛbɛ nãa lɛ wʋ ma de dire nɩ a sɩdɛbɛ ka a yire." 23Yesu bʋɔl naa a nɩbɛ na wʋ lɔb sʋkpar kʋ ba, "Ŋmɩnɛ lɛ a Satan na ɩ lɛ dii a Satan? 24Ala ɩ nãa ir jɛɛrɛ nɩ a wʋ mɩ̃ɛ nãalʋ̃ʋ, ŋmɩnɛ lɛ wʋn ɩ ara? 25Yir nɩbɛ mɩ ir jɛɛrɛ taa, a yir 'lɔ nɩbɛ kʋ̃ tʋ̃ɔ 'mataa kpɛ ɛ. 26Ala ɩ a Satan ir naa na wʋ jɛɛrɛ nɩ a wʋ mɩ̃ɛ, wʋ mɩ kʋ̃ tʋ̃ɔ ara ɛ, a wʋ baaraa lɛ. 27Yelmɩ̃ɛ, nɩrɛ jaa kʋ̃ tʋ̃ɔ kpɛ gãdaa yir tɩ ju a wʋ bonsɩ ka waa de nie lũ wʋ ɛ. 'Lɔ wa lũ wʋ a lɛ wa baar, wʋn pãa tʋ̃ɔ naa a wʋ yir bonsɩ ju. 28Sɩrɛ lɛ n 'yɛrɛ kʋrɔ yɩ, yeldɛbɛ nɩ ferfʋ a jaa nɩbɛ na fere sɔ̃ɔnɔ̃ nɩ Nãaŋmɩn yuor ban nyɛn vɛ̃ kʋfʋ. 29Tɩchɛ nɩrɛ 'lɔ na fere nɩ a Nãaŋmɩn Sɩɛ kʋ̃ nyɛ vɛ̃ kʋfʋ ɛ, bojũu wʋ lo naa a yeldɛɛr 'lɔ pɔ, na ba tara baarfʋ ɛ." 30Ban 'yɛr ɩka wʋ tara naa a sɩdɛɛr lɛ so ka wʋ 'yɛr a lɛ. 31Be lɛ ka a Yesu ma nɩ a wʋ yɛɛr wa. Ba ara naa a yõo tɩ tʋ̃ nɩrɛ ka wʋ bʋɔl wʋ. 32Nɩyɔɔ jɩ̃nɛ naa jilʋ̃ a Yesu tɩ ba 'yɛr wʋ, "A fʋ ma nɩ a fʋ yɛɛr be naa a yõo bʋɔrɔ fʋ." 33Ka wʋ sʋʋr ba, "An lɛ ɩ a n ma nɩ a n yɛɛr?" 34Be lɛ wʋ kaa a bala na jɩ̃nɛ jilʋ̃ wʋ tɩ 'yɛr, "Banyã lɛ ɩ a n ma nɩ a n yɛɛr! 35Nɩrɛ 'lɔ jaa na turo a Nãaŋmɩn sɔr, 'lɔ lɛ a n yɛbɛ nɩ a n yɛpɔɔ nɩ a n ma."

will be added

X\