Maakɩ 2

1A anyã puor, Yesu lɩɛb wa a Kapenahum, ka nɩbɛ wõ ka wʋ be naa a yir. 2Nɩyɔɔ wan wa duo na ba sɛɛ a die wa tɩ yin a yõo. Ka wa 'yɛrɛ a Nãaŋmɩn 'yɛr kʋrɔ ba. 3Be lɛ ka daba ɩ̃sʋɔ mɩ bɩɛrɛ, a wʋ nuur nɩ a wʋ gbɛɛ kpi naa, ka nɩbɛ anaar jɛ̃jɛl wʋ na ba waan a Yesu sɛ̃. 4Ka ba wa ta, ka jie ba be be a ba na tu kpɛ̃n a be a Yesu na be ɛ, a nɩyɔɔ jũu. Be lɛ ba do a gar ju na ba tɩ ŋmaa puo a jie 'lɔ a Yesu na ara, tɩ na ba de a daba nɩ a fɔbaa 'lɔ ban 'mɔɔn wʋ waan tur bar ka wʋ suu tɩ gã a Yesu niem. 5Be lɛ a Yesu na wa nyɛ a lɛ ban sɔɔ de wʋ, wʋ 'yɛr kʋ a dabaala, "N bie, n vɛ̃ naa fʋ yelbebe bar." 6Ka be lɛ ka a Mosesɩ Nɛɛ wiwiilbe bamɩne na be be tɩɛrɛ, 7"Ka nyɛ daba na ara fere na wʋ sɔ̃ɔnɔ̃ Nãaŋmɩn yuor tɛɛ. An lɛ na tʋ̃ɔ nɩrɛ yelbebe vɛ̃ bar, ka Nãaŋmɩn tɛɛ ba lɛ ɛ?" 8Ajienaa Yesu bɔ̃ɔn naa a lɛ ban tɩɛrɛ a ba pʋʋr pɔ, ka wʋ 'yɛr kʋ ba, "Bãa lɛ yɩ tɩɛrɛ a lɛ a yɩ pʋʋr pɔ? 9Buor sʋɔ lɛ ɩ kɔ̃mɔ̃kɔ̃mɔ̃, n 'yɛr ɩka n vɛ̃ naa wʋ yelbebe bar, bɩɩ, n 'yɛr ɩka a daba nyã wʋ ir, 'mɔɔ a wʋ bʋ̃gãnaa, na wʋ kulo nɩ? 10N bʋɔrɔ naa ɩka yɩ bɔ̃ɔ ɩka a Nɩsaal Bie tara naa kpɛ̃ɔ a wɛr pɔ na vɛ̃ nɩrɛ yelbebe kʋ wʋ." Be lɛ wʋ 'yɛr kʋ a daba 'lɔ nuur nɩ a gbɛɛ na kpi, 11"Fʋ̃ʋ lɛ n 'yɛrɛ, ir, na fʋ 'mɔɔ a bʋ̃gãnaa, na fʋ kulo nɩ." 12Be lɛ, ka wʋ vaa ir 'mɔɔ a bʋ̃gãnaa yin a nɩbɛ ba jaa niem. Nɛɛr 'maa ba naa ka ba dãna Nãaŋmɩn 'yɛrɛ, "Saa dɔ̃ɔ nyɛ a lɛ ɛ." 13Yesu lɩɛb chen a man nɛɛ ka nɩyɔɔ wa a wʋ sɛ̃ ka wʋ wile ba. 14A Yesu na wa chiine wʋ nyɛ naa a Alfayasɩ bie, Levi, ka wʋ jɩ̃nɛ a lõpo defʋ jie, ka Yesu 'yɛr kʋ wʋ, "Ir turo ma," ka wʋ ir turo wʋ. 15A lõpodierbe nɩ a yelbetʋ̃nbɔ yɔɔ turo naa a Yesu, ka 'lɔ nɩ a bamɩne nɩ a wʋ poturbo 'mataa dire a Levi yir. 16A Mosesɩ Nɛɛ wiwiilbe na ɩ a Faraseemɩne nyɛ a lɛ wʋn jɩ̃nɛ nɩ a lõpodierbe nɩ a yelbetʋ̃nbɔ 'mataa dire, ka ba sʋʋr a wʋ poturbo, "Bãa lɛ so a daba nyã na 'mataa dire nɩ a lõpodierbe nɩ a yelbetʋ̃nbɔ?" 17Yesu wõ naa a lɛ ban 'yɛr, ka wʋ 'yɛr kʋ ba, "Nɩrɛ na kpɛ̃mɛ waa chiine tɩtɩlɛ jie ɛ. Baalaa lɛ ma chen. N ba wa ɩka n wa bʋɔl a nɩtorsɩ ɛ. N wa naa ɩka n wa bʋɔl a yelbebe tʋ̃nbɔ ka ba wa lɩɛb a tɩɛr." 18Jɔɔn poturbo nɩ a Faraseemɩne nɩbɛ gal kɔ̃, ka nɩbɛ wa sʋʋr a Yesu, "Ŋmɩnɛ lɛ a Jɔɔn poturbo nɩ a Farasee poturbo ma gal kɔ̃, tɩchɛ ka a fʋ̃ʋ poturbo maa gal kɔ̃ ɛ?" 19A Yesu 'yɛr kʋ ba, "Ŋmɩnɛ lɛ an ɩ ka nɩbɛ be a pɔɔ paalaa sɩrɛ jie tɩ tʋ̃ɔ kɔ̃ gal? Wʋn chɛnɛ be a ba sɛ̃, ba kʋ̃ tʋ̃ɔ ɛ. 20A daar 'lɔ ban wa de a pɔɔ paalaa sɩrɛ, ban gal a kɔ̃. 21"Nɩrɛ maa ŋmaa fɔpaalaa sɛ 'yɔ̃ɔ fɔkoraa pɔ ɛ. 'Lɔ be sɛ 'yɔ̃ɔ a lɛ, a fɔpaalaa na tɔɔ naa a fɔkoraa chɩɛr. 22Nɩrɛ maa de dãbɩ̃ɩn 'yɔ̃ɔ wɔkoraa pɔ ɛ. 'Lɔ 'yɔ̃ɔ, a wʋɔ na pur naa, ka a dãa nɩ a wʋɔ sɔ̃ɔ. Wʋ ma 'yɔ̃ɔ naa dãbɩ̃ɩn wɔpaalaa pɔ." 23A Pɛ̃nfʋ Bɩbir Daar, Yesu nɩ a wʋ poturbo kpɛ̃n tala puo sãlsɔɔ, ka a wʋ poturbo piel fɔrɔ a bʋ̃bie. 24Ka a Faraseemɩne 'yɛr kʋ a Yesu, "Nyɛ lɛ a fʋ poturbo na ɩrɛ. Bo lɛ so ka ba tʋ̃nɔ̃ a Pɛ̃nfʋ Bɩbir? A ba tara sɔr ɛ." 25Ka a Yesu 'yɛr kʋ ba, "Yaa bɔ̃ɔ a par a lɛ yɩn kar kaa a Nãaŋmɩn gãn pɔ a nãa David nɩ a wʋ nɩbɛ na ba dɔ̃ɔ tara bon na di ɛ! 26A ber ala pɔ Abiyata lɛ ɩ a Juu nɩbɛ bɔɔrlo nɩkpɛ̃ɛ, kɔ̃ dɔ̃ɔ kpɛ ba, ka wʋ kpɛ a Nãaŋmɩn yir, ka a Abiyata de a paanʋ̃ɔ ala ban bin kʋ Nãaŋmɩn kʋ wʋ, ka wʋ 'wɔb. A paanʋ̃ɔ ala a Juu nɩbɛ bɔɔrlorbo tɛɛ lɛ ma 'wɔb, a ba tara sɔr ɩka nɩyuo wʋ 'wɔb ɛ, tɩchɛ ka David 'wɔb tɩ de kʋ a bala na be a wʋ sɛ̃, ka ba mɩ 'wɔb." 27Be lɛ ka a Yesu 'yɛr kʋ ba, "A Pɛ̃nfʋ Bɩbir ben be a nɩbɛ 'yɔ̃ɔ, a ba ɩ a nɩbɛ ben be a Pɛ̃nfʋ Bɩbir 'yɔ̃ɔ ɛ. 28Ala lɛ so ka a Nɩsaal Bie ɩ a Soro lɔ̃ɔn a Pɛ̃nfʋ Bɩbir gba."

will be added

X\